ده‌ما ئیران ژ لانا خوه ده‌ردكه‌ڤیت
ئیران ئه‌ڤ هێزا مه‌زن یا مرۆڤی و ئابووری ل ده‌ڤه‌را رۆژهه‌لاتا ناڤه‌راست، گه‌له‌ك ئه‌رك یێن دایینه به‌رخوه، یا یاریه‌كا مه‌زن دا دكه‌ت. ره‌نگه هه‌ر دیده‌ڤانه‌كێ سیاسی یێ شه‌هره‌زا ده‌ما ب له‌ز چاڤخشاندنه‌كێ د بزاڤا ئیرانێ دا بكه‌ت چ ژ لایێ سیاسی ڤه یان ژی له‌شكری ڤه دێ وه‌كو یاریزانه‌كێ سه‌ره‌كی د ناڤ ڤێ یاریێ دا دێ بینیت. لێ پرسیارا كو ل ڤێره سه‌رێ خوه هه‌لده‌ت، ئه‌رێ ئیرانێ ئه‌ڤ هه‌موو شیانه هه‌نه داكو ب ڤی رۆلی رابیت؟ یانكو ئیران به‌ر ب كیڤه دچیت؟ یان ژی ئیران ژی وه‌كو هه‌ر لایه‌نێكی دی ل ڤێ ده‌ڤه‌رێ یاری پێ دهێته‌كرن؟
ب دیتنا من ئه‌ڤا نها ل رۆژهه‌لاتا ناڤه‌راست دهێته ئه‌نجامدان یاریه‌كا مه‌زنا سه‌رمایه‌داریا جیهانی یه، كو گه‌له‌ك ئارمانج یێن هه‌یی، ئێك ژ وان ئارمانجان ئه‌ڤه‌یه..
پشتی به‌رپابوونا شۆره‌شا ئیسلامی ل ئیرانێ و دروستبوونا قه‌یرانه‌كا مه‌زن و درێژ ده‌م دنێڤبه‌را ده‌ستهه‌لاتا نوویا یا ئیرانێ و سه‌رمایه‌داریا جیهانێ دا كو بوویه ئه‌گه‌را كه‌فه‌كرن ل سه‌ر به‌رژه‌وه‌ندیێن وان ل ڤی وه‌لاتی چونكو ئیران پشتی شۆره‌شا ئیسلامی بوو وه‌لاته‌كێ داخستی به‌رامبه‌ر سه‌رمایه‌داریا جیهانی و پتر ده‌ستهه‌لاتا شۆره‌شێ پووته ب ئابووریا ناڤخوه دا و پووته ب گه‌شه‌كرنا مرۆڤێ ئیرانی دا هه‌تاكو گه‌هشته خوه‌تیركرنه‌كا ئابووری ل گه‌له‌ك بیاڤێن ئابووری دا. گه‌مار و دانه‌كا درێژ ده‌م ل سه‌ر خوه سه‌پاند و پێكۆل كر كو بگه‌هیته خوه‌تێركرنه‌كا ل سه‌رانسه‌ری د هه‌موو بیاڤێن ئابووری دا و ب رێیا هنده‌ك په‌یوه‌ندیێن كێم ل گه‌ل هنده‌ك وه‌لاتێن دژی سیاسه‌تا سه‌رمایه‌داریا جیهانی، ئه‌ڤچا چ یێن ناوچه‌یی بن یان ژی وه‌لاتێن دوور وێ بن.
ئیران پشتی ڤێ شۆره‌شێ یابوویه هێزه‌كا (ئابووری، له‌شكری) یا مه‌زن و ب زحمه‌ت بهێته كونترۆلكرن و نها تاكه هێزه كو ل ده‌ڤه‌را رۆژهه‌لاتا ناڤه‌راست كو بشێت دژی هنده‌ك سیاسه‌تێن سه‌رمایه‌داریا جیهانی راوبه‌وه‌ستیت، هنده‌ك جاران ژی دبیته ئه‌گه‌را تێكدانا هنده‌ك ئه‌جیندایێن وێ ل ڤێ ده‌ڤه‌رێ. كو دووماهی یاری گرۆپا تیرۆرستی یا داعشێ یه، كو ب رێیا ڤی گرۆپی دڤێت هنده‌ك گوهۆرینان ل ڤێ ده‌ڤه‌رێ بكه‌ت.
لێ هه‌كه هنده‌ك بینینه بیرا خوه، ره‌نگه هه‌مان سیناریۆ یا به‌ریا نها بكارهاتی ل گه‌ل ئیكه‌تیا سۆڤی یاس به‌رێ یا دوباره دبیته‌ڤه ل گه‌ل ئیرانێ، مه‌به‌ست ژێ چوونا ئێكه‌تیا سوڤیێتا به‌رێ بۆ ناڤ ئه‌فغانستانێ، ل ڤێره ئه‌ڤ پرسیاره دهێته ئازراندن، ئه‌رێ كیژ وه‌لات (عیراق، یه‌مه‌ن، سووریا یان.. . ) دێ بنه ئه‌فغانستانا ئیرانێ.
