ده‌میرتاش د خه‌نده‌كا شه‌ری دا خه‌ندقى؟!
دبیت پترى (800) سالان بیت تورك ده‌وله‌ت و دبیت د ڤان سالان دا هیچ وه‌خته‌كێ ده‌وله‌ته‌كا بێ شه‌ر و خوین رشتن نه‌بوویه، ئانكو تورك و ئالوزى و شه‌ر هه‌ڤال جێمكێن ئێكن، بۆ توركا شه‌ر گه‌له‌ك ژ ئاشتى و (التزاماتێن) ئاشتیێ خوشتره، بۆ توركا شه‌ره‌كێ بێ هه‌ڤسه‌نگى دگه‌ل بزاڤه‌كا پارتى زانى ل هنده‌ك چیایێن ئاسێ زۆر خوشتره ژ ئاشتیه‌كا بهێز و ل كولانێن پایته‌ختى، ئاشكراتر بێژم پارتیا كریكارێن كوردستانێ و (پاشكوێن خوه) باشترین خزمه‌تێ بۆ توركیا دكه‌ن وه‌ختێ توركیا دكێشن شه‌ره‌كێ بێ هه‌ڤسه‌نگى دا، ده‌مێ دووماهیكێ ب ئاشتیه‌كا سار دئینن هینگێ ژنوو هیڤیێن توركیا گه‌ش دبن. توركیا كلتوره‌كێ شه‌رانگیزى یێ درێژ ژ به‌لقانا تا قه‌وقاسیا تا حجاز و یه‌مه‌نێ و ژ ئیرانێ تا یونانێ ب درێژیا میژوویێ یى هه‌ى، تورك هه‌لگرێن چ ئایدۆلۆژیه‌كا سیاسی بن بسپۆرن د شه‌رێن بچووك و نیمچه ناوچه‌گه‌رى دا.
(په‌كه‌كێ) تا نوكه به‌رنامه‌كێ ئاشكرا و داخوازیه‌كا لۆژیكى و نینه. هنده‌ك بنه‌ما بۆ خوه ل چیایێن كوردستانێ خولقاندى نه ل هیچ فه‌رهنگه‌كا سیاسى ناچن. ئاشكرا بوو هه‌رچاڤدێره‌كێ سیاسى ئه‌سته‌مه بزانیت نوكه (په‌كه‌كێ)چ دڤێت؟! سیاسه‌تا (خه‌نده‌كا) پشتى نه‌مانا پرۆسا ئاشتیێ راستى بریاره‌كا سه‌یر و پرى ئه‌نجامێن كاره‌ساتى بوو. ڤه‌گوهاستنا شه‌رى بۆ كولانێن باژێرێن كوردێن باكور راستى رویێ دى یێ درنده‌یا توركیا بوون، ئاشتى ب هه‌مى كێماسیێن خوه‌ڤى د خزمه‌تا كوردستانێ و گه‌لێ كورد دابوو ل باكورێ كوردستانێ، لێ بێ به‌رنامه و ستراتیژیه‌كا ئاشكرا هه‌مى به‌رهه‌مێ ئاشتیێ بن گور بوون. ئه‌ردوغان و پارتیا خوه هینگێ دێ بۆ ئاشتیێ زڤرن وه‌ختێ لاوازى ناسناما ئالیێ كوردى بیت، دیاره ژى دێ د ڤێ تاكتیكێ دا سه‌ركه‌ڤیت، باشترین نموونه ژى ژ(82) په‌رله‌مانتارا بوونه(40) پشتى خه‌باتا خه‌نده‌كا؟! باجا ئاشتیێ بۆ ئه‌ردوغانى و حزبا وى گه‌له‌كا مه‌زن بوو، لێ په‌كه‌كێ نه هێلا؟! سه‌ر ئه‌نجام هه‌مى سمبولێن سیاسى یێن باكور بوونه ئێخسیرێن بریارێن سه‌ر مه‌ستانه یێَََََََََََََن بالێ هشكباوه‌ریا په‌كه‌كێ، ده‌میرتاش و هه‌ڤالێن خوه د ناڤبه‌را ژیانا په‌رلمانى و په‌رده‌پوشكرنا شه‌رێ خه‌نده‌كا دا خه‌ندقین؟! سیاسه‌تا خولقاندنا ئاریشا وه‌ك ره‌ڤین ژ چاره‌سه‌ریێ ئه‌ردوغان تێدا (سه‌یدایه) پرسا نه‌ته‌وه‌كا بێ ناسنامه نه‌ته‌وه‌كا بن ده‌ست نوكه بوویه ئازادكرنا فلانى و عه‌لانى؟! كوردێن باكور پێدڤى یه پشتى پترى (30) سالا ڤێ پرسیارێ ژ په‌كه‌كێ و پاشكوێن وێ بكه‌ن. ئه‌رێ كا به‌رهه‌م؟! خوینێ، كا به‌رنامێ وه یێ به‌رئاقل، كا نه‌خشا ئاخا هین خه‌باتێ بۆ دكه‌ن؟.
