دهمێ كاودانێن سهقاى د نهخۆش بن ڤان ئاميران ڤهمرينه
دهما ئهم پێشبينيێن سهقايى دبينين و ههست ب نێزيكبوونا باهۆزهكێ دكهين، ئێكسهر هزرا مه دچيته سهر هندێ كا مه جلك يێن رايخستى يێن هشكاتيێ ههنه یان پهنجهره يێن ڤهكرى نه. ب گوهلێبوونا ئێكهم دهنگێ بريسيێ، ئهم ب لهز دچين جلكان كۆم دكهين و پهنجهران دگرين، بهلێ ئهم ئاميرێن ئهلكترۆنى يێن ب كارهبێ كار دكهن ژبير دكهين.
د راستیێ دا، ئهڤ چهنده ژ خالێن بهرى نوكه گرنگتره، چونكى ههكه بريسيهكا نێزيك ب كهڤيته ئهردى، دێ تهزوويا وێ د ناڤ تهلێن كارهبێ دا هێته ڤهگوهاستن و ئهو ئاميرێن ب كارهبێ ڤه دێ خراب بن، زێدهبارى هندێ كو دێ بيتە ئهگهرێ هندهك كێشهيان كو د فاتۆرا كارهبێ دا ديار بن.
ل دووڤ گۆتنا كۆمپانیا (ئیبەردڕۆلا)، ئهڤ چهنده ژ بهر هندێ دبيت كو بريسى كورتترين رێ دگرته بهر دا بگههيته ئهردى، و پتر حهز دكهت د ناڤ مهعدهن و ئهو تشتێن كارهبێ دگههينن دا ب بوریت. ئهڤه دبيتە ئهگهر كو تهلێن كارهبێ ببنە وهك رێيهك كو تهزوويا كارهبێ پێ دگههيته ههر ئاميرهكێ ب وان ڤه بيت. لهوا ئهگهر باهۆز نێزيك بوو، پێشنياز دهێته كرن ئهو ئاميرێن سهرهكى ژ كارهبێ بهێنه ڤهكرن دا كو ژ زيان و مهترسيێن ل مالێ دوور بن.
تێلهڤزيۆن ئێكه ژ وان ئاميرێن زێدهترين زيان دگههيتێ، بلندبوونا ئێكسهر يا تهزوويا كارهبێ دێ گههيته ئاميرى و دێ بيته ئهگهرێ سۆتنا بازنێن وێ يێن ناڤخۆيى. تهنێ گرتنا وێ ب “ريمۆتێ” نهبهسه؛ ههكه هێشتا ب كارهبێ ڤه بيت، دێ ههر ل ژێر مهترسيێ بيت. لهوا بۆ پاراستنا وێ ب تهمامى، دڤێت د دهمێ باهۆزێ دا ب ئێكجارى ژ كارهبێ بێته كێشان.
بێگۆمان، ئاميرێن ناڤمالێ يێن سهرهكينه. سهلاجە و ئاميرن جلكشووشتنێ و ئامانشوو دبيت زيانێ ژ بلندبوونا تهزوويا كارهبێ ببينن، كو دبيته ئهگهرێ تێكچوونا مۆتۆران يان بۆردێن وان، زۆربهيا جاران تێچوونا چێكرنا وان گهلهك گران دكهڤيت. لهوا ئهگهر باهۆز يا ب هێز بوو و مالا ته ل جههكێ وهسا بيت كو باهۆز لێ زۆر بن، باشتره ب شێوهيهكێ دهمكى ژ كارهبێ ڤهكهى دا كو چ زيانێن دى نهگههنێ.
ههروهسا پێشنياز دهێته كرن كو لاپتۆپ و كۆمپيوتهرێن “دێسكتۆپ” ژ كارهبێ بهێنه ڤهكرن، ههتا ئهگهر ئاميرێن پاراستنێ ژى ل گهل بن. ئهڤه ژ بهر هندێ يه كو ئهو رێكار نه ههموو جاران د بهس نه بۆ بهرهنگاربوونا تهزوويا زۆر بلند يا بريسكان. ژ بهر كو ئهڤ ئاميره پرتێن ئهلكترۆنى يێن نازك و پێزانیێن كهسى يێن گرنگ تێدانه، باشتره ژ كارهبێ ڤهكهى دا كو دلێ ته یێ ئارام بیت.
