ده‌مێ لێبۆرین شه‌رى دكه‌ت!
ئه‌حمه‌د عارف ئامێدى
رۆژ بۆ رۆژ ئه‌م ل هه‌رێما كوردستانێ پتر پێدڤى به‌لاڤكرنا ڤیانێ و لێبۆرینێنه ل ناڤا ته‌ڤا خه‌لكى، و ل ژێر هنده‌ك ده‌رزێن سیاسى یێن ل ناڤ هێز و لایه‌نێن سیاسى دا و تایبه‌ت ژى ل ده‌سپێكێن پێكئانینا حوكمه‌تان و ل ده‌مێ پرۆسه‌یێن هه‌لبژارتنان یان په‌یدابوونا ئاریشه‌كا رۆژانه ل سه‌رانسه‌رى هه‌رێمێ، ژبه‌ر هندێ ئه‌ڤرۆ ئه‌ڤ ئه‌ركێ نشتیمانى و یێ ره‌وشتى دكه‌ڤیته سه‌ر ملێن مه هه‌میان بۆ پتر ئاڤه‌دانكرنا هه‌رێمێ ب وى شێوه‌یێ ل گه‌ل ژیوارێ مه و یێ ده‌وروبه‌رى مه دگونجیت و بلندكرنا ناڤێ هه‌رێمێ ل جیهانێ، كو كار بۆ نه‌هێلانا په‌رژانێ كه‌ربوكینێ د ناڤبه‌را خوه ب خوه دا بكه‌ین، وه‌كو رۆخیانا دیوارێ په‌رلینێ، ئه‌ڤ ڤیان و لێبۆرینه ئه‌ڤرۆ پێدڤى ب رۆژ و هه‌یڤ و هه‌یامانه دا بكارین ب ئاشتیانه ل ناڤ رووبه‌رێن هه‌رێمى دا بژین، ئه‌م دكارین ب سه‌ربۆرا خوه تۆڤێ ئه‌ڤێ ڤیانێ و لێبۆرینێ ل سه‌رانسه‌رى ئه‌ردى بهاڤێژین و به‌لاڤه بكه‌ین، چونكو ئه‌ڤرۆ رێك نێزیكتر بووینه ژ دوهى كو ده‌نگ و سیمایێ مه بگه‌هیت و ناڤوده‌نگیا مه ده‌نگڤه بده‌ت، ئه‌ڤ ئێكه ژى نه‌ئه‌وه دێ ب نڤیسینێ یان ئاخفتنێ هێته دى، به‌لێ ئه‌و هه‌ست ژ ناڤا ره‌هوریشالێن مرۆڤى ده‌ردكه‌ڤیت، مرۆڤێ نه‌رمونیان و هیڤیدار كو ئه‌شقا ئه‌ردێ هه‌رێمێ د دلێ وى دا هه‌بیت، بكارین سه‌قایێ هشك و توند بكه‌ته بایه‌كێ فێنك و هوین، واته ئه‌و كه‌سێ وه‌لاتپارێز حه‌زژ هه‌رێما خوه بكه‌ت، دڤێت ژدل كار بكه‌ت و به‌ند و هشكاتیا هه‌ست و نه‌ستێن مرۆڤاتیێ بشكێنیت، وى ده‌روونێ داگرتى ژ ره‌هێن توندیێ كو ژ ئه‌نجامێ هنده‌ك دۆخێن نه خوازارو په‌یدا بووین و بوویه سه‌ده‌ما زێده‌بوونا فشارێن ده‌روونى ل سه‌ر هه‌ڤوه‌لاتیێ هه‌ژار ل ناڤبه‌را ده‌مه‌كى ویێ دى دا ژ به‌ر وان كاودانێن ئه‌م دبینین، و بده‌ستڤه‌ئینانا وان كه‌سان به‌ر ب رێیا راست كو هه‌ر كه‌سێ خوه‌دى ماف مافێ وى پێ بهێته دان!، ئه‌ڤرۆ گه‌له‌ك ژ كوڕێن هه‌رێمێ به‌حس ل هندێ كه‌ن كو ئه‌و حه‌ژ هه‌ریمێ ناكه‌ن و ژیبوونا وان یا كێمه و بهانه‌یان دئینن، كو وه‌لاتى چو بۆ وان پێشكێش نه‌كریه ژ به‌ر قه‌یرانان یان بێكاریێ و رێژه‌یا هه‌ژاریێ و هه‌لویستێن گه‌نده‌لیێ ل گه‌له‌ك جهان، ئه‌ڤه ژى دبیته هۆیى ژێكژێكبوونا وه‌لاتى، و ئه‌ڤ كێم ژیبوونا هه‌نێ ل ناڤا ده‌روونا هه‌ر مرۆڤه‌كى دا په‌یدا دبیت ده‌مێ تووشى ڤان هه‌مى فشاران و ده‌رده‌سه‌ریان دبیت!. به‌لێ دبێژم كو گه‌له‌ك ژ گه‌لین دونیایێ ئه‌ڤ جۆره ئاریشه و قه‌یرانه هه‌نه ژ هه‌ژاریێ و گه‌نده‌لیێ و شه‌رێن ناڤخوه، به‌لێ مه نه‌بهیستیه كو ئه‌و گه‌لین هه‌نێ كه‌رب ژ وه‌لاتێن خوه ڤه‌دبن و چو خێره‌ك و به‌رقه‌راریه‌ك بۆ وارێ نه‌ڤین!.
ئه‌ڤرۆ ل سه‌ر ئه‌ردێ ژیوارى سه‌ربۆرا هه‌رێمێ پێدڤى ب میدیایه‌كێ هه‌یه هه‌مى ڤالاهیێ دابگریت ل ده‌ف ئه‌ڤێ ته‌خا جڤاكى، كو نه‌هه‌ما هنده‌ك رێكخراو بن بۆ ناڤێ خوه و چنینا هنده‌ك مالیه‌تێ ژ كیستێ حوكمه‌تێ یان ژ هنده‌ك لایه‌نێن ده‌رڤه ل سه‌ر كیستێ كارى یان كارێن خێرخوازى، به‌لێ د ناڤه‌رۆك و ئه‌جینده دا به‌رژه‌وه‌ندیێن تایبه‌تن. ئه‌وا ئه‌م ل سه‌ر ئه‌ردێ ژیوارى دبینین، فه‌ره رۆژانه و حه‌فتیانه مه ده‌سپێشخه‌رى د پڕانیا تۆڕێن میدیایى دا هه‌بن و هه‌مى رێكخراوێن كاریگه‌ر و وه‌زاره‌تێن ده‌وله‌تێ و جڤاتێن پارێزگه‌هان كو زمانێ لێبۆرینێ و ڤیانێ بوه‌شینن ب ره‌وشه‌نبیره‌كێ كو هه‌مى ب هه‌ڤرا ل ناڤ ده‌زگه‌هێن میدیایێ و خواندنگه‌ه و ئۆفیس و كارگه‌هان به‌لاڤه بكه‌ن، واته په‌روه‌رده‌كێ كو هه‌مى پێكڤه وه‌كو تاك و وه‌كو كارمه‌ندێن فه‌رمى كو ئه‌ڤى تۆڤێ خومالى یێ نیازپاكیێ بوه‌شینن، بزانن خوه دوورخستن ژ گیانێ كه‌ربوكینێ و به‌رژه‌وه‌ندیێن تایبه‌ت تشته‌كى ل نفشێن داهاتى زێده ناكه‌ن ژ بلى داكه‌فتنێ و پاشكه‌فتنێ، چونكو ئه‌ڤینا وه‌لاتى د ناڤبه‌را خه‌لكى دا پێدڤى ب ئافراندنا “ڤیانێ” یه و پێدڤیاتى ماكا ئافرینێ یه، ئه‌رێ ما كى ژ مه پتر وه‌كو هه‌رێما كوردستانێ پێدڤى ب ڤێ ڤیانا پاكه یا كو ناڤا ره‌هوریشالێن مرۆڤى دا بچیته خار.
و/ ئه‌ڤرۆ
