ده‌نگ و ره‌نگ و دل
عارف حیتۆ
ده‌نگێ من.. ل عه‌ڤره‌كی سوار دبیت و
به‌ر ب ره‌هه‌ندێن دوورڤه دچیت
هه‌می ستێرێن ئاسمانی خوه د هه‌مبێزێ دا مت دكه‌ن
هه‌كو دكه‌ڤیت خاتوونا فه‌خرا ڤه‌دگریت…
د ئاییرده‌ك بخووراوی و مشت نزا دا دوجان دبیت و
ده‌نگه‌ك دی یێ خورت ژێ دبیت..
هه‌یڤ هنده‌كێ ژ رۆناهیا خوه، دكه‌ته به‌ر و
پف دكه‌ته گوڕیا ئاگرێ د ده‌ستێ (برومیتۆس)دا گه‌ش
كو پشكه‌كێ ژ تاریزۆلماتا عه‌ڤرێ ره‌ش رۆهن بكه‌ت
رێیا كاروانێ ب رێڤه جادده‌یه‌كا قێركری بیت
هه‌ر ماهینا ب دووڤ هه‌سپێ (صلاح الدین)ڤه حێنجبوویی
دێ هوڕ كه‌ته كانی یێن زه‌لال و دێ ل هیڤیا ده‌نگی مینیت
مه‌مێ شڤا.. ل سه‌ر عه‌رشی یێ هێڤ دكه‌تێ و بۆ دگرنژیت
ده‌نگێ من پێ مه‌زن دبیت و عه‌ڤر ئێدی تێرا ناكه‌ت،
كو وی جانێ قورس و قه‌به.. د گه‌وریا خوه‌دا راگریت
هه‌می دارێن سه‌ماكه‌ر ب سینگێ زه‌ڤیێ ڤه
گه‌شبینن كو ده‌نگێ بلند، دێ مه‌ودایێ عه‌ڤری بڕیت.
بارانه‌ك دێ باریته سه‌ر گولی یێن گه‌نمی و
سترانه‌ك دێ به‌روبیاڤان ڤه‌گریت…
ره‌نگێ من.. سترانه، سترانه‌كا ره‌سه‌ن و گه‌رم
ئاوازا خوه، ژ بژیێن نێرگزه‌كێ ڤه‌كرن و
ل سه‌ر سینگێ رۆژا ل ئاڤا كره ئالا
ب تیشكێن رۆژێ ڤه دهه‌ژیێت و وه‌ك خوهه‌ك سار
دبرسقیت، ل سه‌ر ئه‌نیا سوار و په‌رگالا
هه‌ر مزگینیا (مه‌هاباد)ێ ڤه‌شارتی ل ناڤ هه‌گبا سالا
گه‌ردێن بێره‌نگێن (ئاراس)ی دێ كه‌نه ره‌نگ
ل سه‌ر په‌ڕاڤێ زه‌ریا ته‌نا، دێ بیته زه‌نگ
ل ئێكشه‌مبیێ دهێته لێدان و ده‌نگڤه‌دده‌ت ل نهالا
ئه‌ڤ ره‌نگێ ب من ڤه نێرگز و ب داركاژێ ڤه
بوویه خه‌ربه‌ندێ متالا..
دێ ل شه‌هیانا هه‌یڤێ و رۆژێ، زڕنابێژێ ئێكانه بیت
ب روویێ عه‌ردی ڤه دێ سه و سیهوانه بیت
كو توڕ بكه‌ت به‌نده‌مانیێ و پڕ بكه‌تن دلێن ڤالا…
دلێ من یێ عێلنجگرتی..
مه‌هێن وی یێن دچنه پێكه‌ك شه‌رابا سپی
ته‌ڤ دارمێوێن ب سینگێ ره‌زی ڤه یاخیبووی
ره‌نگێ تری و ده‌نگێ ئاخێ پێڤه متبووی
یێ ل به‌ندا خه‌نده‌یه‌كا یارا من یا ژ من سلبووی
ئه‌و یارا من ل ئێڤاریه‌كێ عه‌جباندی و
ل ئه‌لندا سپێده‌یه‌كێ ژ خوه ره‌ڤاندی!
ئوو ب سیحرا ژڤانه‌كی، ب تنێ ب تنێ، ژڤانه‌كی
ئاڤز دكه‌ت ته‌ڤ (پۆر)ێن ل ئاقاری خرشبووی
مه‌وكبه‌كێ كیسه‌لێن رووبارێ گۆیینێ، د رێ دا قیتبووی
ب فیتیه‌كێ هێلانه د ناڤ گه‌ڕه‌كێ دا، مڕیتۆبووی!..
كه‌وه‌كی دادا سه‌ر ملێ من یێ راستێ و
مێكه‌وه‌كا د جانێ یارا من دا كوركبووی!
جێژڤانێن كوتر ل دۆر، پێشوازیا زه‌رزویریا دكه‌ن
داكو هه‌كو باران دباریت، ده‌نگ و ره‌نگێ من ته‌ڕ ببن
ئه‌ز حه‌ز ژ هه‌مبێزێن هشك ناكه‌م!
دلێ من عێلنجی دهێنێ و هنده دێ ب ده‌نگی ڤه رابیت
ل سه‌ر رێیا ئه‌وان سۆزێن ب نه‌هاتنێ لالۆته‌بووی
دێ بیت له‌هی و دێ هه‌می ره‌نگان ڤه‌گریت
جاما شه‌رابا من یا سپی، ئه‌وا ل به‌ندا من ترشبووی
دێ بیته به‌ندكێ تابڕكا و عه‌شقا دادای هنداڤی من
دێ بیته ره‌نگێ شه‌فه‌قێ و ده‌نگێ بلندێ ئاسمانی…
دێ قێر كه‌ته سترانه‌كێ، وه‌ك كولیلكێ نوو دبیته‌ڤه و
د جێهه‌ڤبینا من دا گه‌شبووی…
*
