ده‌ه كورته چیرۆكێن سه‌رده‌مێ كۆرۆنایێ..
خالد عه‌لی سلێڤانه‌یی
سیسته‌مێ به‌رگیریێ
كه‌رنتیكرنه، ناهێلن ئه‌ز بچم تاخێ دی یێ باژێری، نزانن ب تنێ دیتنا وێ سیسته‌مێ به‌رگیریا جان و له‌شێ من ب هێز دئێخت.
هاتن و چوون
باژێر و جاده و ده‌رگه‌ه داخستینه، ب تنێ هاتن و چوون بۆ ترسێ یا مایی.
دلسۆزی
ژ مرنێ ناترست، لێ رۆژانه پشتی ژ كاری ڤه‌دگه‌ڕت مال، خوه سێ جارا ب پاككه‌ران دشۆت، پیره‌مێر و پیره‌ژنه‌ك یێن د ژۆرا دی ڤه.
ژڤانێ عشقێ
گۆتێ: خوه ل پشت وێ ده‌مامكێ ژی، خوه‌زی ته زانیبا لێڤێن ته چه‌ند شرینن.
ئێكسه‌ر لێ ڤه‌گێرا و گۆت: خوه ل پشت وان ده‌ستگۆركا ژی، خوه‌زی ته زانیبا، ده‌ستێن ته چه‌ند نه‌رمن.
مالێ دنیایێ
ـ ته دیت چاوا خه‌لكی پاره ژی شووشتن؟!
ـ ئه‌رێ، له‌ورا مه‌زنا گۆتی قرێژا ده‌ستانه.
به‌رگرتن
هندی من خوه كوخاند، هه‌ر هاته ده‌ستێ من، ژ هینگێ وه‌ره بتله‌كی كۆلۆنیایێ یێ د به‌رووكا من دا.
20 چركه
سابوون د ده‌ستێن وی دا نیڤی دبوو، و نه‌دزانی پاك بوون یا نه، رابوو ده‌مژمێره‌ك ب سه‌ر ده‌ستشۆیێ ڤه هه‌لاویست.
تانج
ــ خوه نه ترسینه، ڤایرۆسه‌كێ بچووكه چو هزرا بۆ نه‌كه.
ــ ڤایرۆسه‌كی ب تانجه و شاهه، شاه چو هزرا بۆ كه‌سێ ناكن، مامۆ خولام.
قه‌ده‌غه
جاده هه‌می ڤالانه، ته‌یرك ناڤڕت، ده‌رگه‌ه داخستنیه، ب حێبه‌تی و برسی، پشیك ل سه‌ر گیفكا چاڤه‌ڕێی ترۆمبیلا گلێش نه.
ئۆنلاین
هه‌می تشتێ وی د ژیانێ دا ئۆنلاین، خه‌ونێن وی تێ نه‌بن.
هه‌موو تشت دیلڤری بۆ دهێن، خوه‌شیێن وی تێ نه‌بن.
