ده‌وله‌تا كوردی دناڤبه‌را ئابووره‌كێ بهێز وگه‌نده‌لیێ دا
گه‌له‌ك وه‌لات و ملله‌تان سه‌روه‌ت و سامانێن باش هه‌نه كو تێرا هه‌موو تاكێن وه‌لاتی بكه‌ت ب خوشگوزه‌رانی بژین، لێ خراب ب كارئینانا وی و نه‌دادپه‌روه‌ری د به‌لاڤكرنێ دا و هه‌بوونا ده‌ستهه‌لاته‌كا گه‌نده‌ل و سیسته‌مه‌كێ ب رێڤه‌برنێ یێ خراب و نه‌بوونا چاڤدێریێ ل سه‌ر چاوانیا مه‌زاختیان، وه‌كریه ئه‌و ملله‌ت ب ره‌نگه‌كێ گشتی د هه‌ژاریێ دا بژین و ب تنێ هژماره‌كا كێم وه‌كو مشه‌خور ل سه‌ر به‌رژه‌وه‌ندیا گشتی خوه قه‌له‌و بكه‌ن و گرێنتیا نفشێن ل دووڤ خوه ژی دا بكه‌ن بێی هێچ دودلی یان ترس وه‌كو دبێژن پارێزه‌رن و دزێن سامانی نه د ئێك ده‌م دا.
ئه‌م ل هه‌رێما كوردستانێ ژ مه‌ردینیا خودایی مه‌زن ل گه‌ل ئاخ و وه‌لاتێ مه گه‌له‌ك سه‌روه‌رت و سامانێن باش یێن هه‌ین كو ملله‌تێ مه هه‌كه سیسته‌مه‌كێ كارگێری یێ دروست هه‌بیت و حوكمه‌ته‌كا ته‌كنوقرات و دادپه‌روه‌ری د به‌لاڤكرنا داهاتان دا هه‌بیت، دێ شێین ب باشترین شێوه ژیانا خوه ببه‌ینه سه‌ر و ئه‌و چینا گه‌نده‌ل ل گه‌ل هه‌موو ته‌خێن دی یێن جڤاكی دێ ب خوه‌شگوزه‌رانی ژین و هه‌موو پێدڤیێن ژیانێ ژی دێ ب ساناهی ب ده‌ست هه‌موو وه‌لاتیان كه‌ڤن، لێ ژ به‌ركو ئه‌وا ل سه‌ری مه ئاماژه پێدایی نه‌بوویه له‌ورا سامانێ مه هه‌موو یێ ب رێیێن نه شه‌رعی و دروست دچیت و جڤاكێ یێ د باره‌كێ ده‌رونی و ئابووری یێ نه ئارام دا دژیت.
ل هه‌رێما كوردستانێ پتریا پوست و پایان ب رێیێن نیاسینی و حزبایه‌تی و عه‌شیره‌تی و به‌رژه‌وه‌ندگێری دهێنه دانان، نه‌كو ب شاره‌زایی و لێهاتی و باوه‌رنامه و تایبه‌تمه‌ندی و سیڤی و سه‌ربووڕ، له‌ورا په‌یڕه‌وكرنا سیسته‌مێ ب رێڤه‌برنا كارۆبارێن وه‌لاتیان و خزمه‌تگوزاری ل سه‌ر ئاستێ هه‌موو یه‌كێن كارگێری ب شاشی و نه‌باشی ب رێڤه دچیت و گلله و گازندێن وه‌لاتیان ژی د زورن، نه‌بوونا یاسا و رێسا و رێنمایێن پێدڤی ل گه‌ل چارچووڤێ ده‌ستهه‌لاتداریا هنده‌ك رێڤه‌به‌ر و به‌رپرسان به‌ره‌لایه‌ك د كارێ وان دا په‌یداكریه و ده‌لیڤا بكارئینانا نه‌دروست یا كورسیكا خوه ب كاردئینن و ل دووڤ حه‌ز و ڤیان و به‌رژه‌وه‌ندیا خوه یا كه‌سوكی كاردكه‌ن، هه‌كه‌ر هنده‌ك رێنما و قانوون هه‌بن ژی هه‌ر وه‌كو لاستیكی دكێشن و به‌ر دده‌ن و كا چه‌وا بۆ وی باشه وه‌سا ب كار دئینن.
ژلایه‌كێ ل دور بیاڤێ دارایی: سیسته‌مێ دارایی و ئابووری د حوكمرانیێ دا ب هه‌ر دوو لایێن خوه ڤه (داهات و مه‌زاختی) ب مه‌به‌ستا دارایا گشتی دهێت، له‌ورا كه‌رتێ گشتی واته حوكمه‌ت ژێ به‌رپرسیاره و هه‌موو سه‌روه‌ت و سامانێ گشتی یێ ڤی خه‌لكێ ئه‌مانه‌ته د ده‌ستێ ده‌ستهه‌لاتێ دا و هه‌رده‌مێ ب باشتی سه‌ره‌ده‌ریێ ل گه‌ل بكه‌ت و چو بیاڤ و ده‌راڤكێن رشتن و به‌رزه‌بوونا داهاتی نه‌بن وه‌كو گه‌نده‌لیا دارایی، دێ داهاتێ گشتی شێت ب باشی تێرا مه‌زاختیێن گشتی بكه‌ت و ره‌وشا ژین و ژیارا وه‌لاتیان دێ گه‌له‌ك یا باش بیت ژلایێ خوه‌شكوزه‌رانیێ ڤه و ب ساناهی دێ ژێرخانه‌كا ئابووری یا توكمه‌ن ل كوردستانێ په‌یدابیت كو نفشێن داهاتی ژی ب شیانێن باب و باپیرێن خوه د سه‌ر بلندبن.
ده‌رباره‌ی سیسته‌مێ چاڤدێریێ: گه‌له‌ك یا پێدڤیه ل هه‌رێما كوردستانێ هه‌موو سازیێن په‌یوه‌ندیدار ب چاڤدێریكرنا دارایی و ئابووری و سیسته‌مێ كارگێری د كارا و ئه‌كتیڤ بن، ب نموونه دڤێت ده‌سته‌یا ده‌ستپاكیێ ب شیان و وێره‌كی چاڤدێریا هه‌موو لایه‌ن و سازیێن حوكمه‌تێ بكه‌ت ل سه‌ر چاوانیا بجهئینانا كارو ئه‌ركێن خوه یێن ب رێڤه‌برنێ و مه‌زاختنێ، دیسان لیژنا ده‌ستپاكیێ ل په‌رله‌مانی دڤێت دوور ژ به‌رژه‌وه‌ندیێن حزبی و لایه‌نگیری و به‌رته‌نگ ب تنێ بۆ به‌رژه‌وه‌ندیا گشتی كار بكه‌ت و ب شه‌ڤ و رۆژ چاڤ و گوهێن وێ د ڤه‌كری بن داكو گه‌نده‌لیێ ب ئێكجاری نه‌مینیت یان هه‌ر چونه جارێ كێم ببیت.
ب ڤان خالان ئه‌م دێ شێن ل پاشه‌رۆژێ بۆ خوه و نفشێن داهاتی ده‌وله‌ته‌كێ درۆست كه‌ین كو شیانێن باش یێن خوه برێڤه‌برنێ هه‌بن و ل رۆژهه‌لاتا ناڤین ببیته رۆگه‌ها راكێشانا وه‌به‌رهێنانا بیانی و نافخۆ و تێكرایێ داهاتێ گشتیێ نه‌ته‌وه‌یی و داهاتێ تاكه كه‌سی ل دووڤ پیڤه‌ر و ستانداردێن وه‌لاتێن پێشكه‌فتی بیت، لێ هه‌كه ئه‌و خال نه‌هێنه ب جه ئینان دبیت كاودانێن ده‌ڤه‌رێ و سیاسه‌تا رۆژه‌ڤێ یا گونجایی بیت بۆ راگه‌هاندنا ده‌وله‌ته‌كا سه‌ربه‌خوَ لێ دێ ده‌وله‌ته‌كا گه‌نده‌ل بیت و ژیێ وێ گه‌له‌ك یێ درێژ نابیت و ئه‌و خوزیا ب هزاران سال خه‌لكێ مه ل هیڤیێ دێ بیته خه‌یال و خوزیان ل جاران ڤه‌گێرینین.
