ده‌وله‌تا كوردی و بنه‌مایێن ده‌وله‌تبوونێ
كانێ بنه‌مایێن ده‌وله‌تا كوردی ژ به‌ر كو ملله‌تێ كورد ژ كه‌ڤنترین ره‌گه‌زێن مرۆڤاتیێ یه و ئاڤاكه‌رێ شارستانیا هه‌ره كه‌ڤنا دیرۆكێ یه و وه‌كی هه‌ر ملله‌ته‌كێ ژ هه‌ژی ده‌وله‌تبوونێ یه و ل شوونا ده‌ستێن وی ل هه‌می جیهانێ و ل سه‌ر شكه‌فتێن ده‌سپێكا په‌یدابوونا مرۆڤاتێیه و نه‌خش و نیگارێن وان چێكرین هێشتا ماینه و خه‌لك بۆ خوه شانازیێ پێ دبه‌ت و ڤه‌كۆلینان ل سه‌ردكه‌ت و به‌ری هزاران سالان به‌ری زایینی و ل سه‌رده‌مێ سۆمه‌رییان ده‌وله‌تووكین باژێران دامه‌زراندبوون و ژبلی ده‌مێن شانشینێن میتانیان و خۆریان وخۆلدیان و لۆلۆبییان و كۆتیان و سۆپارییان و هه‌تا دگه‌هینه ده‌وله‌تا میدییان و میرگه‌هێن بۆتان و بابان و داسنیان و شۆره‌شێن ئارارات و ئاگری و شۆره‌شێن بارزان و كۆمارا مهاباد و شۆره‌شێن ئیلۆن و گولان و سه‌رهلدان و ئازادیا كوردستانێ و عیراقێ. هه‌لبه‌ت رووبارێن خوینی و سه‌دان داستان و رۆندكێن دایكان و شه‌هید قوربانی و مه‌رگه‌ساتێن جه‌رگبڕ ب سه‌رێ ملله‌تێ مه دا هاتینه هه‌تا گه‌هشتیه ڤێ قووناغا نازك و مه‌ترسیدار و چاره‌نڤیسساز كو ل شوونا هه‌می جیهانێ و ب هاریكاریا وان شه‌ڕێ درنده‌ترین چه‌كدارێن هۆڤانه دكه‌ین و ب سه‌رۆكاتیا سه‌رۆكێ كوردستانێ ل سه‌نگه‌رێن پێشیا شه‌ڕی ل دژی داعشێن خوینڕێژین هۆڤن دكه‌ن، وه‌ك رۆخسار و پێگه‌ه و په‌یوه‌ندیێن ناڤده‌وله‌تی كوردستان ژ گه‌له‌ك ده‌وله‌تان پتر ناڤوده‌نگ و ئابوورێ ب هێز و مافێ مرۆڤی و پێكڤه‌ژیان و هه‌تا راده‌كی باش دیۆمكراسی و حوكمه‌ت و په‌رله‌مان و داموده‌زگه‌ه كاره‌كی باش دئێته‌كرن، لی مخابن مه‌ترسیه‌كا مه‌زن هه‌یه ل سه‌ر ڤان هه‌می ده‌سكه‌فت و دیرۆك و پێگه‌هان، هه‌كه هات ل خوه‌نه‌زڤڕن به‌لێ لخوه‌زڤریین نه‌ئێنه كرن د هه‌می وارێن ژیانێ دا؟ وه‌ك پێداچوونێن ڕژد و هوور د هه‌می مۆڤكێن حوكمه‌تێ و پارتان و پێرابوونێن دادوه‌رانه و چاره‌سه‌ریا زۆربه‌ی ئاریشێن گه‌نده‌لیێ و مرۆڤكانێ و خێله‌كیێ و مافیایێن كۆمپانیان و قورخكرنا بازرگانیێ و به‌ره‌لاهیێ د نه‌بوونا پێرابووناندا و كه‌سێ ژ هه‌ژی ل جهێ هه‌ژی بیت و پاراستنا به‌رژه‌وه‌ندیا گشتی و ب تایبه‌ت یا چینێن هه‌ژار و كیمده‌رامه‌ت و ده‌ستكورت كو ئه‌وان شۆره‌ش كرینه و قوربانی داینه و هه‌ر ئه‌و مان ل ژێر و خودان مرۆڤ وخوه‌فرۆشێن به‌رێ ل ژۆر، هه‌می كه‌س ڤان راستیان دزانیت به‌لی مخابن بێهیڤیه‌كا مه‌زن په‌یدابوویه ژ نه‌بوونا پێرابوونان ل به‌رامبه‌ر سه‌رپێچیان و گه‌نده‌لیان و بازرگانیكرنێ بخوین و ژیان و چاره‌نڤیسێ وه‌لات و ملله‌تی؟ ئه‌ڤجا ده‌وله‌تبوون خه‌ونا هه‌می شه‌هیدان بوو و ئۆمێدا هه‌ر كورده‌كێ ب شه‌ره‌فه، لێ د ڤان سه‌روبه‌ران دا و ب ڤان پیڤه‌رێن نه‌ره‌وادا زۆر ئه‌سته‌مه و ب دیتنا مه، دڤێت ب ده‌سته‌كی شه‌ڕێ تیرۆرا داعشێ بكه‌ین و ب ده‌ستێ دی شه‌ڕێ گه‌نده‌لیی و به‌رژه‌وه‌ندیێن به‌رته‌نگێن كه‌سایه‌تی و پارتایه‌تی و نه‌بوونا هه‌ستێ به‌رپرسیاریی بكه‌ین چونكی ئه‌و ژی هه‌ر تیرۆره، ب ئۆمێدا سه‌ركه‌فتنا پێشمه‌رگه‌هێن كوردستانێ و ئازادكرنا هه‌ر بهۆسته‌كا ئاخا مه‌یا پیرۆز و ئازادكرنا كه‌ج و ژنێن شنگالا بریندار و ب هیڤیا سالا 2015 ببیته سالا ده‌وله‌تبوونا كوردستانا منا ده‌لال و دێرین و ره‌نگین كو ئه‌وه ناڤه‌ندا په‌یدابوونا مرۆڤاتیێ یه.
