ده‌وله‌تا كوردی ژ خه‌ونێ به‌ر ب راستیێ!!
گه‌لێ كورد ل ده‌مێن دیرۆكا دوور و درێژا خوه، گه‌له‌ك خه‌ون و هیڤی هه‌بووینه و گه‌له‌ك جاران به‌رێ ره‌نج و خه‌بات و هه‌ولێن خوه ژ ده‌ست داینه، هنده‌ك ژ ڤان ژده‌ستدانان ئه‌و بخوه لێ به‌رپرسیاره و هنده‌كان ژی دوژمن و ده‌ستێن ده‌ره‌كی هۆكارێن سه‌ره‌كی بوون. ل ده‌مێ پتر ژ سه‌ده‌یه‌كێ خه‌باته‌كا بێ بڕین كریه و خوین و مالێ خوه به‌خشیه ل پێناڤی خه‌ونا سه‌رخوه‌بوونێ، هه‌ر چه‌نده ده‌مێ دۆزا گه‌لێ كورد گه‌له‌ك درێژ بوویه و هه‌تا نها هه‌موو هیڤی و ئۆمێدێن خوه بجه نه‌ئیناینه، لێ هێشتا بێ ئۆمێد نه‌بوویه و به‌رده‌وام خه‌ونان ب وێ رۆژێ دبینیت كو د ناڤ وه‌لاته‌كێ سه‌ربخوه یێ كوردیدا چاره‌نڤیسێ خوه ببینیت، په‌یمانناما سیڤه‌ر گه‌لێ كورد ژ بجهكرنا ڤێ خه‌ونا نه‌ته‌وه‌یی نێزیك كربوو و د ناڤا به‌ندێن وێ یێن توماركریدا مافێ قه‌واره و حوكمێ خوه‌بخوه بۆ گه‌لێ كورد سه‌لماند بوو، لێ ئه‌ڤ په‌یماننامه بوویه قوربانی به‌رژه‌وه‌ندیێن هه‌ڤپشك د ناڤ داگیركه‌رێن كوردستانێ و زلهێزێن جیهانێ، ئه‌و بوو مۆركرنا رێككه‌فتنناما لۆزانێ داخوازی و مافێن گه‌لێ كورد كرینه قوربانی ڤان به‌رژه‌وه‌ندیان. سه‌ركردێن خه‌باتا دوهی هه‌موو هه‌ولێن خوه چڕكرن داكو گه‌لێ كورد وه‌كو هه‌موو گه‌لێن ده‌ڤه‌رێ ببیته خودانێ وه‌لاتێ خوه یێ سه‌ربخوه. بارودۆخ هه‌ر ب چو ره‌نگێ بیت و هێزا داگیركه‌ران د هه‌ر ئاسته‌كێ سه‌رسۆرهێنه‌ر دا كاودان برێڤه بربن، ئه‌وان ژ داخوازیێن گه‌لێن خوه پاشه‌كشه نه‌كریه. گومان د وێ ئیكێ دا نینه هه‌موو شه‌ڕ و ڕووبڕووبوونێن گه‌لێ كورد ل گه‌ل سۆپایێن ب هێز یێن ئوسمانی و پاشان توركی و عیراقی و به‌ریتانیدا شه‌ڕێ نه به‌رانبه‌ر و شۆره‌ش و راپه‌رین د ناڤ بارودۆخه‌كێ هه‌ستیار و دژوار دا بوو، لێ هه‌ول و مه‌رجێن داگیركه‌رێن كوردستانێ ئه‌و ئێك سه‌پاندیه كو بارودۆخه‌ك دروستكریه ژده‌رڤه‌ی داخوازی و ئیرادا گه‌لێ كورد هاتیه خولقاتدن، سه‌ركردێن بزاڤا رزگاریخوازا كوردی ژ داخوازیێن خوه‌یێن ره‌وا پاشه‌كشه نه‌كریه ژ مافێن سه‌رخوه‌بوونێ و ئازادیا خاكا وه‌لاتێ خوه. حه‌ز و ڤیانا سه‌رخوه‌بوونێ ل ده‌مێ نها ژبلی سه‌رۆك بارزانی د ناخێ سه‌ركرده‌یێن نها دا ناهێته دیتن، له‌و ئه‌ز دێ بێژم ده‌نگ ژ ده‌سته‌كێ ب تنێ ناهێت!! نهو ژبۆ په‌رده‌پووشكرنا ڤێ بێ ئیراده‌یێ، به‌حسێ نه گونجاندنا بارودۆخێ سیاسی و هه‌لومه‌رجێن نێڤده‌وله‌تی و هه‌رێماتیێ دهێته‌كرن، ل ده‌مه‌كی بارودۆخێ گونجای و ل گه‌ل پێشهات و ده‌لیڤه‌یێن روخسای بۆ گه‌لێ كورد ل ده‌مێ دو ده‌ه سالێن بووری چه‌ند جاره‌كا هاتیه پێش، لێ لاوازیا ئیراده و نه به‌رهه‌ڤیا مێشكێ نه‌ته‌وی ل لایێ هنده‌ك لایه‌نێن سیاسی یێن كوردی د ڤێ قووناغێدا ئه‌و ده‌رفه‌ت ژ ده‌ستداینه. سه‌رۆك بارزانی پشت ب پێگه‌ه و هێزا خوه‌مالی و ڤیانا نه‌ته‌وه‌یی مه‌رجێن نێڤده‌وله‌تی و ده‌ڤه‌رێ بستوه‌خوه ڤه گرتینه، ئه‌وا ل ڤی ده‌می بۆ گه‌لێ كورد و دۆزا وی یا نه‌ته‌وی هاتیه ره‌خساندن هه‌گه‌ر هه‌موو لایه‌نێن سیاسی یێن هه‌رێما كوردستانێ هاروكارێن سه‌رۆك بارزانی ببان، نها ده‌مه‌ك با وه‌لاته‌كێ سه‌ربخوه هاتبا دامه‌زراندن. ئاڤاكرنا وه‌لاته‌كێ سه‌ربخوه بۆ ده‌مه‌كێ درێژ خه‌ونا هه‌موو سه‌ركرده‌یێن كورده ل نهو و ده‌مێ بووریدا، لێ ئه‌ڤ خه‌ونه ل لایێ سه‌رۆك بارزانی نه یا مه‌حاله، نهو ئه‌وا رێگر ل هه‌مبه‌ر بجهئینانا خه‌ونا وه‌لاته‌كێ كوردی نه‌بوونا ئێكده‌نگی و ئێكرێزیا ناڤمالا كوردی یه، كو ئه‌و ژی ب سه‌ده‌مێ هنده‌ك لایه‌نێن كوردی ئاڤا وان خراب هاتییه رژتن و بووینه دارده‌ست و كرێگرتیێن وه‌لاتێن هه‌ڤتوخیب، سه‌رۆك بارزانی هه‌موو ده‌مان ب عه‌قلیه‌تا حزبی سه‌ره‌ده‌ری نه كریه و نوونه‌رێ ته‌خه‌كا حزبی نینه، به‌لكو ب عه‌قلیه‌تا نه‌ته‌وه‌یی نوونه‌راتیا سه‌رجه‌م پێكهاته‌یێن كوردستانێ كریه، هه‌موو ده‌مان ل هه‌مبه‌ر روودان و پێشهاته‌یاندا ده‌ستبه‌ردای نه‌بوویه و ب ڕوویه‌كێ نووخواز و مودرێن ل هه‌مبه‌ر كه‌ڤنه په‌رستا راوه‌ستایه، ئه‌وا نهو د گوره‌پانێدا هه‌ی جهێ ئومێد و هه‌ول و سیاسه‌تا حه‌كیمانه یا بارزانی یه، هیڤیه ئه‌م هه‌موو هاریكار و پشته‌ڤان بین.
