ده‌وله‌تبوونا مه كوردان. .. دیالوَگه‌ك تایبه‌ت دخازیت
ئه‌و كه‌سێن وه‌سا هزر دكه‌ن كو ده‌وله‌تبوون و سه‌ربه‌خوَیا سیاسی و ئابوریا كوردستانێ و هه‌ما ڕاگه‌هاندنا داخویانیه‌ك ئانكو خواندنا گوتاره‌كێ یان په‌یڤه‌كا جه‌ماوه‌رییه و ژلایێ مه‌سعود بارزانی سه‌روَكێ هه‌رێمێ ڤه دێ هێته خواندن، ئه‌و پڕ شاشن و تێگه‌هشتنه‌ك به‌روڤاژی ل هه‌مبه‌ر بویه‌رێن سیاسی و ڕوویدانێن ڕوَژه‌ڤێ هه‌نه. ئه‌و كه‌سێن ژ دلسوَزیا نه‌ته‌وه‌یا خوَه ب ڕه‌نگێ په‌رچه‌كردار و هه‌ڤڕكی، داخازا له‌زكرن و په‌له‌په‌لكرنێ د چاره‌نڤیسێ هه‌رێمێ دا دكه‌ن، ژ هه‌ردوو ئالیێن ئابووری و سیاسی ڤه، ئه‌و ژی پێدڤی ب پێداچوونه‌ك نوو و تازه‌نه. لێ داكو ئه‌م بكارین د چارچوڤێ یاسایی دا پشته‌ڤانیا نێڤده‌وله‌تی و جڤاتا ئێمناهیێ سه‌باره‌ت ب پاشه‌ڕوژا گه‌لێ خوَه ب ده‌ست ڤه‌بینین، ئه‌م پێدڤی ب (( دیالوَگه‌ك تایبه‌ت )) ین، پێدڤی ب دانوستاندن و گه‌نگه‌شێینه د گه‌ل خوَه و لایه‌نێن به‌رامبه‌ر، پێدڤی ب ئه‌زمانه‌كێ نه‌رمین ژ بوَ ئاڤاكرنا پرێن كورتكرنا ڕووبه‌ر و مه‌ودایێن درێژ، پێدڤی ب له‌شكره‌كێ ئابوری و چالاكیێن لوَژیكی و عه‌قلانی نه.
له‌وڕا دبێژین دیالوَگ. . دیالوَگ. . و پاشی دیالوَگ. گه‌لوَ دیالوَگ چی یه ؟ نه‌ریت و هونه‌رێن وێ چنه ؟ دكارین ب دیالوَگێ چاره‌نڤیسا خوَه ب سه‌پینین؟ دیالوَگێ شیانێن دروستكرنا ووه‌ڵاتێن نو و تازه هه‌نه ؟ , ڕوَژهه‌لاتا ناڤینا نو دیالوَگێ قه‌بوول دكه‌ت ؟ , چه‌ندین ئه‌گه‌ر و پرس و پرسیارێن دی د رێكا سه‌رخه‌بوون و ده‌وله‌تبوونا مه كوردان دا هه‌نه و ته‌نێ دانوستاندن و دیالوَگ دكارن شیكارا وێ بكه‌ن.
دانوستاندن، چالاكییه‌ك عه‌قلی و هزرییه , لایه‌نێن پشكدار كومه‌كا به‌ڵگه و گروڤه و سه‌لماندنان ژ بوَ ڕاستیا بوچوونێن خوَه پێشكێش دكه‌ن و پێكولێ دكه‌ن بو گه‌هشتن ب نه‌خشه‌رێگه‌یه‌كێ داكو دوَزێن خوَه چاره‌سه‌ر بكه‌ن. ژ نه‌ریتێن دیالوَگێ ژی، پێدڤیه شاره‌زایی و پێزانینێن تمام لسه‌ر بابه‌تێ دانوستاندنێ هه‌بن و په‌یڤ و ڕسته و هه‌ڤوَكێن گونجای بكار بهێن و ئارمانج بهێنه ده‌ست نیشان كرن و گوهداریا هه‌ڤ بكه‌ن و نه‌رمی و شیانێن ده‌ربرینێ هه‌بن. كه‌واته دیالوَگ پڕوَسه‌یه‌كا ره‌وشه‌نبیری و فه‌لسه‌فی و سیاسی یه و مه كوردان سه‌ربوَڕ و ئه‌زموونێن دیروكی دگه‌ل هه‌نه.
ناهێته ڤه‌شارتن كو د پڕوسه‌یا دانوستاندنێ دا هه‌رده‌م و گاڤ سه‌ركردایه‌تیا سیاسی یا كوردان ب نه‌فه‌سه‌كا درێژ ئه‌ركێ خوَه ئه‌نجامدایه، لێ به‌لێ ده‌ستهه‌لاتێن ناڤه‌ند فێری نه‌ریت وتیتالێن دیالوَگێ نه‌بووینه و ب هونه‌رێ خاپاندن و سه‌ردابرن و ژ ده‌ست دانا ده‌می و مفاوه‌رگرتن ژ ده‌لیڤه‌یان مێزێن گه‌نگه‌شێ به‌رهه‌ڤكر دكرن، له‌وڕا ئه‌م دوێ باوه‌ڕێ داینه كو حوكمڕانێن ڕوَژهه‌لاتا ناڤین سه‌رباری ( پایزا عه‌ره‌بی )، هه‌تا نهوَ ژی عه‌قلیه‌تا دیالوَگێ قه‌بوول ناكه‌ن و هێش د وان هزر و خه‌یالان دانه كو ده‌ستهه‌لات واته ناڤه‌ند و ناڤه‌ند واته ده‌ستهه‌ڵات.
ئه‌ڤه‌نه فندو فێلێن حوكمرانێن ناڤه‌ند، به‌غدا ئێكه ژ وان ناڤه‌ندان، ئه‌گه‌ر به‌رسڤا وێ نێگه‌تیڤ بیت، به‌رسڤا هه‌رێمێ سه‌ربه‌خوَییا ئابوریه و ده‌وله‌ت و كوَمپانیێن كڕیارێن پتڕوَلا كوردستانێ پشته‌ڤانیه‌ك نێڤ ده‌وله‌تی بوَ جودابوونا هه‌رێمێ ژ به‌غدا ناڤه‌ند ڕادگه‌هینن. ئاژانسا هه‌والگریا توركی د ڕاپوَرته‌كێ دا ئاشكرا دكه‌ت كو چه‌ندین جارا ئه‌مریكا داخاز ژ وان كریه پشته‌ڤانیا ده‌وله‌ته‌كا سه‌ربه‌خوَیا كوردان بكه‌ن ل باشوور به‌رامبه‌ر مفا وه‌رگرتن ژ پتڕوَلا كوردستانێ و به‌ریتانیا ژی پرسا سه‌ربه‌خوَیا كوردان گرێدده‌ت ب دیالوَگا كوردان دگه‌ل ناڤه‌ندێ ڤه.
كه‌واته پێدڤیه كوردان دوو پڕوَژه یاسایێن گه‌نگه‌شێ د ئه‌جندایێن خوَه دا بوَ دیالوَگێ توَمار بكه‌ت. یان چێكرنا ووڵاته‌كێ تازه و نوو، یان جودابوون ژ عیراقه‌كا ژ هه‌ڤ جودا. ئه‌ڤ هه‌ردوو هه‌لبژارده حه‌تمیه‌ن ژی دیالوَگێ دخازن
