ده‌وله‌تبوون یا نێزیك دبیت
پشتی وێ سه‌ره‌دانا سه‌ركه‌فتیا سه‌رۆك بارزانی بۆ وه‌لاتێن ئه‌مریكا و هنگاریا وچیكێ و ڤه‌گه‌ریانا وی ب گرنژینڤه بۆ باوه‌شا كوردستانێ ب من وه‌ره نیشانێن ده‌وله‌تبوونێ یێ دیار دبن و ئێدی ئه‌و وه‌لاتێن زلهێز ژی یێن گه‌هشتینه وێ باوه‌ریێ كو دڤێت چاره‌یه‌كا بنه‌ره‌تی ل كێشا كوردی بهێته كرن، له‌ورا هه‌موو بۆچوون ژبۆ هندێ دچن كو ئێدی ب له‌زتر و رژدتر كار ل سه‌ر وێ چه‌ندێ بهێته كرن.
بێگۆمانه سه‌ره‌دانا سه‌رۆكی و شاندێ ل گه‌لدا ژ چو ڤالاهیان نه‌هاتبوو، به‌لكو پشتی وێ چه‌ندێ هات ده‌مێ جیهانێ هه‌موویێ ب چاڤێن خوه دیتی كا چاوا پێشمه‌رگه‌ی دربێن كۆژه‌ك ل تیرۆرستێن داعش دان و باشڤه‌برن، هه‌لبه‌ت ئه‌و هه‌موو دزانن شكاندنا داعشێ ل سه‌ر ده‌ستێن پێشمه‌رگه‌ی ب هیمه‌ت و سه‌رپه‌رشتیا راسته‌وخوه‌یا سه‌رۆك بارزانی بوو، ئه‌وان هه‌موویان دیت كا چاوا سه‌رۆكی ل گه‌ل كۆڕ و برا و كه‌سێن نێزیكی خوه خیڤه‌تێن خوه ل به‌رۆكێن شه‌ری دانان و شه‌ڤ و رۆژێن خوه دكرنه ئێك و ئه‌ز ئێك ژ وانم كه‌سانم یێن كو د ئاگه‌هدار گه‌له‌ك شه‌ڤان هه‌تا سپێدی سه‌رۆك خۆله‌كه‌كا ب تنێ ژی نه نڤیت و به‌رده‌وام سه‌رپه‌رشتیا به‌ره‌یێن شه‌ڕی دكر و رێنما و راسپارده ددانی، له‌ورا پێشمه‌گه‌ی سه‌ركه‌فتن ل دووڤ سه‌ركه‌فتنێ تۆماردكرن و ب ڤێ چه‌ندێ بۆ ئه‌مریكا ژی دیاربوو كو كوردو پێشمه‌رگه دۆستێن وان یێن نێزیكن و هه‌رده‌م دحازرن به‌ره‌ڤانیێ ژ ئاخ و نه‌ته‌وا خوه بكه‌ن.
دا پتر بهێمه د ناڤ بابه‌تێ خوه دا كا بۆچی من گۆتیه (ده‌وله‌تبوون یا نێزیك دبیت، بێگۆمان ئه‌ڤ گۆتنه هۆسا ب ساناهی ژ ده‌ڤێ من ده‌رنه‌كه‌فتیه، به‌لكو ژ ڤه‌رێژا وێ گرنگیێ بوویه یا كو ب سه‌ره‌دانا سه‌رۆكی و شاندێ ل گه‌لدا هاتیه دان، ب تابیه‌ت ژی ل وه‌لاتێ ئه‌مریكا كو ژ لایێ سه‌رۆك ئۆبامای و مه‌زنه په‌رپرسێن وی وه‌لاتی هاته پێشوازیكرن و ئه‌ز ب باوه‌رم هه‌كه سه‌رۆك بارزانی ل ده‌ف هند یێ گرنگ نه‌بایه ئۆبامای ئه‌و پێشوازیا گه‌رم لێكر و ئه‌ڤه ب خوه وێ چه‌ندێ دگه‌هینیت كو ئیدارا ئه‌مریكا گرنگیه‌كا مه‌زن ب كوردو هه‌رێما كوردستانێ دده‌ت، ل به‌راهیا وان هه‌موویان ژی كه‌سایه‌تیا به‌رێز مه‌سعود بارزانی سه‌رۆكێ هه‌رێما كوردستانێ كو ئیرۆ بوویه سۆمبۆله‌ك ل ناڤه‌ندێن جیهانی، كو هه‌تا كورد هه‌نه وی ژبیر ناكه‌ن.
هه‌روه‌سا تشتێ دی یێ ئه‌ز گه‌له‌ك پێ كه‌یف خۆشكریم ئه‌و بوو، ده‌مێ سه‌رۆكێ د دیداره‌كا خوه دا گۆتی ( ئه‌و پێشبینیا مه بۆ ڤێ سه‌ره‌دانێ دكر مه‌زنتر لێ هات) ئانكو هه‌كه مرۆڤ ب هووری هزرێن خوه د ڤێ ئاخفتنێ بكه‌ت دێ گه‌له‌ك رامان ژێ چن و هه‌كه ئه‌ڤ چه‌نده یا گرنگ نه‌با سه‌رۆكی ب خوه ئه‌و گۆتن نه‌دگۆت، له‌ورا دێ جاره‌كا دی ب پشت راستیڤه بێژم ده‌وله‌تبوونا كوردستانێ یا نێزیك دبیت و ئێدی خه‌لكه‌كی بڤێت نه‌ڤێت دێ ده‌وله‌تا كوردی ئه‌وا ب هزاران شه‌هید بۆ هاتینه دان دێ ژدایك بیت، ئێدی ملله‌تێ كورد ب تایبه‌تی ژی خێزان و كه‌سوكارێن شه‌هیدێن كوردستانێ دێ د ده‌وله‌ته‌كا تازه و ئارامدا سه‌ر بلندتر ژین.
