دوبارە ژیان
ئاشتی یونس
ژنوو بەرەف قۆناغا تەمەنێ خوە یێ گەنجاتیێ ڤە چوویە، ژخەوا شرین رابوو، دەست بکارێ خوە کر و چوو قوتابخانەیا خوە، زەنگا بێهنڤەدانا قوتابخانەیێ لێدا، ژنشکەکێڤە چاڤێن وی دزڤڕن وگێژ دبیت و دکەڤیت، لێ ڤێ جارێ چوونا وی یا جودا بوو، ژدەمێ وی یێ بۆری، ب حەزکرنا خودێ پێشبینیەکا نە چاڤەرێکری دهێتە رویدان، قەدەرێ نەهێلا ئەڤ جارە ڤەگەڕیتە مالا خوە، بەلکو ئێکسەر بۆ نەخوشخانەیێ هاتە ڤەگوهاستن، بابێ وی سەردانا وی دکەت، ب بیهیستنا ڤی خەبەری دلێ وی گەلەك دسۆژیت و تژی ئاواز لێدان و ژ ترساندا رانەوەستیا، بۆ جەگەرا خوە یێ ئێکانە وەکو زارۆکان دکرە گری، و دەستەکێ گولێن سروشتی دگەل خوە بۆ وی ئیناینە، کوڕێ وی چاڤێن خوە ڤەکرینە تێر وی ماچ و هەمبێز دکەت.
پاشان پشکنین دەرکەڤتن، نۆژدار بتنێ دگەل بابێ وی دپەیڤیت و دبێژیت:
ب لێبۆرینڤە، نەخوەشیا پەنجەشێرێ یا هاتیە کوڕێ تە، دڤێت ئەو ل بن چاڤدێریا مە ب مینیت داکو چارەسەریا وی بهێتە وەرگرتن، لێ خوە گەلەك نە ترسینن ئەز تە پشت راست دکەم ئەڤ جۆرێ نەخوەشیا کوڕێ تە، نە گەلەك یا ب مەترسی یە، و نابیت هوین چ جاران خوە ژدلۆڤانیا خودێ بێ هیڤی بکەن.. خودێ سلامەتیێ بۆ فڕێ بکەت.
هەر ژ رۆژا ئێکێ ژ ڤێ نەخوەشیێ و هەتا یا دوماهیکێ، دەما هاتیە من و ژ من چووی، و ئەز ژێ قورتال بوویم، بابێ من ئێکەمین و مەزنترین پشت و پەنا بوو دگەل من، و وەکو چیایەکی ل پشت من بوو، ئەز خودانێ خوە و بابەکێ وەکو وی نموونە بووم، ژبەر هندێ خودان ئیرادەیەکا گەلەك مەزن و بهێز بووم، و من هەموو هێزا خوە و باوەریا خوە ژ حەژێکرن و ڤیانا وی یا بێ سنوور دگەل من وەردگرت، بەلێ مخابن وێ سالێ من نەشیا بەردەوامیێ بدەمە خواندنا خوە و بۆ سالا پاشتر من پاشئێخست، من گەلەك حەز ژ خواندنا پەرتووكان دکر و دەستێ نڤیسینێ من هەبوو، ژبەر هندێ پرانیا دەمێ خوە یێ ڤالا من ب خواندنێ و نڤیسینێ ڤە دبۆراند، هەر جارا بابێ من یێ خوەشتڤی سەردانا من کربایە ئەز بێ بەهر نە دکرم؛ دا بۆ من پەرتووکان دگەل خوە دیاری ئینیت؛ ژبەرکو وی دزانی ئەز گەلەك حەز ژێ دکم، هەتا وی رادەیی جارەکێ من بریاردا ئەز پەرتووکەکێ لسەر بیرهاتنێن خوە دگەل ڤێ نەخوەشیێ بنڤیسم، ئینا پاشی من گۆتە بابێ خوە و گەلەك کەیفا وی هات و بێ دودلی رازی بوو، پشتی من ب داوی ئینای سوپرایزەکا نە چاڤەرێکری بۆ من چێکر؛ ب هاریکاری وپشتەڤانیا وی پەرتووکا من كو بەرهەمێ من یێ ئێکانە هاتە چاپکرن، بناڤێ ( دوبارە ژیان) و ب هەلکەفتنا رۆژا جیهانییا پەنجەشێرێ ئەز وەکو بەهرەمەند و رزگاربوویەکێ ڤێ نەخوەشیێ هاتمە مێهڤان کرن دبەرنامەیەکێ تیڤیێ دا، پشتی من بۆ بینەران خوە دایە نیاسین و ب کورتی من باسێ ناڤەرۆکا پەرتووکا خوە کری، ل دوماهیکێ پێشکێشکاری گۆتە من: پەیڤا تە یا دوماهیکێ چیە؟ تە چ پەیامەك هەیە بێژی؟ فەرموو.
من بڤی رەنگی بەرسڤا وی دا و گۆتێ: دنیایەك سوپاس بۆ هاریکاری وپشتەڤانییا بابێ من یا تایبەت و سەرەکی دگەل من، ئەز قەد نەشێم ب چەند پەیڤەکان یان ژی ب چەند دێرێن نڤیسینێ یان ژی ب چەند خۆلەکەکان هەستێ خوە دەرببڕم بەرامبەری رولێ وی یێ گەلەك گرنگ و مەزن دگەل من و ب نرخینم، ئەو گەلەك یێ ب من ڤە گرێدای بوو و دگەل من دژیا، ئەوی ئەز نەهێلامە بتنێ، ئەوی حەزژێکرن و ڤیان دناڤ ناخ و دلێ من دا چاندن، ئەو بوو ئەگەر ئەز گەلەك حەز ژ ژیانێ بکەم و جوان ب بینم و لبەر من گەلەك شرین کر، سۆز بیت ئەز قەردارێ وی بم هندی هەبوونا من یا زیندی بیت قەد ژبیر نەکەم، ل دوماهیکێ من دڤێت بێژم ئەز دکەمە دیاری بۆ هەموو توشبوویێن پەنجەشێرێ، و ل پشت کامیرێ ل ستودیۆیێ ڤە چاڤێن من ب بابێ من کەفتن.. رۆندکێن خوەشیێ و کەیفێ دباراندن.
