دوبلاجكرنا زنجیره دراما و پهیڤهكا پێدڤی …
هزرهك
دوبلاجكرنا زنجیره دراما و پهیڤهكا پێدڤی …
د. رهشید فندی
ل نیڤهكا بازارێ دهۆكێ دوو برادهرێت نیاسێت من سلاڤ كر و گۆته من: چارهسهریهكێ بۆ كارێ دوبلاجكرنا زنجیرێت بیانی ل كهنالێت مه یێت كوردستانێ ببینین, كو ئهو كهسێت ب كارێ وهرگێرانێ رادبن ل كهنالێت مه یێت تهلهفزیۆنی, زمانێ كوردی پێشێل دكهن و نه شارهزاییا وان د زمانێ كوردیدا یا دیار و خۆیایه و كوردیا وان یا لاوازه.
بهری بچمه سهر وی بابهتی, براستی, ئاریشا ژ وێ مهزنتر ئهوه, بابهتێ وان زنجیرایه, ئهوێت ل تهلهفزیۆنێت مه تێنه بهلاڤكرن و رهوشا جڤاكی و رهوشهنبیریا مللهتێ مه تێكدا.
هندهك زنجیرێت تركی و بیانی تێنه بهلاڤكرن، كو رهوشا گهنجێت مه ژ كور و كچا تێكددهن و هندهك كاروكریار و ئاخفتنێت وهسا لێ تێنه گۆتن، كو گهلهك د دویرن ژ رهوشتێت مللهتێ مه. ئارمانج ژی ههر پێ ئهوه، گهنجێت مللهتێ مه د سهردا ببهن و بهرێ وان بدهنه رێ یێت شاش و بهرزهبوون دێ بیته ئهنجاما وان، نهمازه كهلهك سنێله و گهنجێت مه تهماشه د كهن.
بهری ههمیان، فهره وهزارهتا رهوشهنبیریا ههرێما كوردستانێ وهك ئهركهكێ فهرمیێ وان، لسهر ڤان بابهتان راوهستن و یا درست بكهن، ههر چونهبیت لیژنهیهكا لێنێرینێ ههبیت بۆ دیتنا وان زنجیران بهری بهلاڤكرنێ، ههر وهسا فهره بۆ رێڤهبهریێت كهنالێت تهلهفزیۆنی ژی ل ههرێما كوردستانێ ڤی رهنگێ زنجیرا هاورده نهكهنه د ناڤ مللهتێ مه دا.
ل دۆر وێ پسیارا وان ههڤالا ژ من كری، ئهز دبێژم راسته، كارێ وهرگێرانێ ژ زمانهكێ بیانی بۆ زمانێ كوردی، كارهكێ بساناهی نینه، چنكی كارێ وهرگێرانێ بخۆ هونهرهكه و ههمی كهسا شیانێت وی هونهری نینن و بههمی كهسان ڤه ناهیت، لێ بهلێ ههر چاوا بیت ئهم پێدڤی وهرگێرانێ ینه و دنیایا نوكه ب رێڤه ناچیت، ئهگهر مه های لێ نهبیت .لهوما باشتره هندهك كهسێت شارهزا د وارێ وهرگێرانێدا وی كاری بكهن، ههر وهسا فهره پشتی وهرگێرانێ، ئهو دهق ژ لایێ بسپۆرهكێ زمانی ڤه بێته دیتن، دا زمانێ ب سهقهتی نه ئێته نیشادان.
لێ ههر چاوا بیت، ئهو كهسێت كارێ وهرگێرانێ دكهن و دوبلاجكرنا وان زنجیرا دكهن، دشێن پشتی وهرگێرانێ، وی كارێ وهرگێرای نیشا شارهزایهكێ زمانی بدهن، دا پێداچوونهكێ لسهر كارێ وان بكهن، ب وی كاری ههر دێ وهرگێرانا وان چێبیت و ههر دیسان دێ ژ لایێ شارهزایهكی ڤه ئێته راستڤهكرن و پهسهندكرن، لێ تشتێ ژ كوردا تێته زانین ئهوه كو چو جارا كهسێ كورد نابێژیت دا نیشا شارهزایهكی بدهم، چنكی ل دویف هزرا وی كهس ژ وی شارهزاتر نینه!!.
