دودلیا ده‌رۆنی و كوچكرن و راگه‌هاندن
پشتی ئارامیا چه‌ند ساله‌كان و ڤه‌ژاندنا ئابوری ل كوردستانێ، كومه‌كا پرس و قه‌یرانێن ده‌رڤه و ناڤخوی روی ل هه‌رێما كوردستانێ كرن، و هه‌می ب به‌رنامه و نه‌خشه دارێژتی بۆن و هه‌ر ئێك ژ یا دیتر مه‌زنتر و كاریگه‌رتر بوو، و هه‌می بوونه ئه‌گه‌رێ دوو دلیا ده‌رۆنی و دل راوكیێ و تا راده‌كێ ژی بوونه ئه‌گه‌رێ په‌یدابونا دودلیا ده‌رۆنی و هزری و مێشكی، نه‌ك ب تنێ بۆ چینه‌كێ یان قوناغه‌كا ته‌مه‌نێ خه‌لكی، نه‌خێر ڤێ دودلیا ده‌رۆنی هه‌می ته‌خ وچین و ره‌گه‌ز و قوناغێن ژیێن هه‌مه‌جۆر یێن خه‌لكێ كوردستانێ ڤه‌گرتن (زارۆك، ژن، گه‌نج و پیر) و تا راده‌كێ ژی گه‌له‌ك خه‌لكێ باوه‌ریی ب مانا خۆه و باشتر لێكرنا ژیانا خۆه نه‌مایه و نه‌شێن خواندنه‌كێ بۆ پێشه‌رۆژا خۆه بكه‌ن، وه‌كو ب ئاخفتنا گشتی دبێژن (یێن سه‌ر كوره بوین)، چونكه رۆژانه خه‌لكێ مه یێن چاڤێن خۆه دگه‌ل هنده‌ك كێشه و پرسێن نوو ڤه‌دكه‌ن (موچه نه‌هات، كاره‌ب نینه، ئاڤ نینه، پانزین نینه، پرۆژه راوستان، ده‌رمان گران بوون، نشته‌گه‌ری دگران بوون، بازار گران بوو، داعش هات، كێمیا هاڤێژت.. هتد). و ل سه‌ر ڤان هه‌میانرا پرسا سه‌رۆكی و ده‌ستهه‌لاتێن سه‌رۆكی هاتنه د رۆژه‌ڤێ دا، ئه‌ڤه هه‌می پرسن و د سه‌رێ هه‌ڤولاتیێ كورد دا ل باشورێ كوردستانێ له‌یزوكێ دكه‌ن و د لڤلڤن و ل به‌رسڤێ دگه‌ریێن، و پشتی چ به‌رسڤێن درست و پێ رازی ب ده‌ست وه‌لاتیان نه‌كه‌ڤن، دودلیا ده‌رۆنی دێ بالێ خۆه ب سه‌ر دا كێشیت و ئێخیته بن گڤاشتنێن توندڤه و ئێدی نه‌شێت خۆه ژێ قورتال بكه‌ت، و هێدی هێدی دێ ژێ ره‌ڤیت، و ره‌ڤین ژی دبیته ئه‌گه‌رێ په‌یداكرنا هنده‌ك رێكێن دیتر یێن شاش، كو دبیت زیانێ بگه‌هینیته وی و هه‌تا جڤاكێ وی ژی.
بارێ ل سه‌ر مللێن تاكێ كورد ئه‌ڤرۆكه گه‌له‌ك یێ گرانه و ژ هێزا وی گرانتره و نه‌شێت هه‌لگریت، له‌ورا ل خۆه دگه‌ریێت و خۆه نابینیت، و هه‌ر ده‌رگه‌هه‌كێ ب كه‌ڤیته به‌ر سینگێ وی دێ قوتیت، یان چ لایه‌نێ خۆه ل كێشێن وی كره خودان بێی پرسیار و ئێك ودو ودێ خۆه گه‌هینیتێ چونكه ب دیتنا وی بتنێ تیشك و ڤه‌بونا ده‌رگه‌هێ رۆناهیێ ژ وی لایه‌نی بۆ دهێت، ژبه‌ر كو بێ ئومێد بویه و كه‌سێ خۆه ل ئاریشێن وی نه‌كریه خودان، ئه‌ڤه ل وی ده‌می ئه‌گه‌ر ئێكی خۆه لێ كره خودان، به‌لێ به‌رۆڤاژی ئه‌گه‌ر كه‌س نه‌بوو ئه‌و كێشه و ئاریشه رۆژ ب رۆژێ دێ دمێشكێ ویدا كار كه‌ن و مه‌زنبن و ئێدی هه‌می ده‌رگه‌هێن ژیانێ دێ ل به‌رسینگێ وی هێنه گرتن. له‌ورا دێ ریا شاش هه‌لبژێریت.
كه‌س نینه خۆشی و ژیانه‌كا خۆش نه‌ڤێت یان هه‌ست پێ نه‌كه‌ت، كه‌س نینه نه‌زانیت به‌ر ل جهێ خۆ یێ ب قه‌دره، به‌لێ ئه‌گه‌ر خورتی ل به‌ری هاته كرن و ژجهێ وی هاته قه‌لپدان، دێ گرێل بیت و خودێ دزانیت دێ ل كیرێ راوستیت؟، پشتی گه‌نج یان هه‌ڤولاتیێ كورد بێ هیڤی دبیت كو ئێدی ژیان ل كوردستانێ گه‌هشتیه نه‌ژیانێ وكێشه و ئاریشه گه‌هشتینه ده‌رگه‌هێن گرتی و بن به‌ست نه‌چار دبیت هزر ل رێكه‌كا دیتر دا بكه‌ت بلا چه‌ند مه‌ترسی و زه‌حمه‌ت و مرن تێدا هه‌بیت، ئه‌و ژی كوچكرن بۆ ولاتێن ده‌رڤه و بیانی و ئاماده‌یه هه‌می مالداری وسامانێ خۆه ل سه‌ر دانیت (به‌س) بگه‌هیته جهه‌كێ ئارام و دادوه‌ری و ئارامی و ژیان تێدا بیت، و ئێك ژ هوكارێن گرنگ یێن دبنه ئه‌گه‌رێ كوچكرنێ نه‌مانا باوه‌ریا ب حكومه‌ت و سیاسه‌تمه‌دارێن وولاتییه، چونكه ئه‌گه‌ر رۆژ بۆ رۆژێ كێشه و ئاریشه مانه هه‌لاویستی یان به‌ره‌ڤ خرابیێ چوون، ئه‌و باوه‌ریا هه‌ڤولاتی ب حكومه‌ت و سیاسه‌تمه‌دارێن خۆه هه‌یی دێ ژده‌ست ده‌ت و باوه‌ری نامینیت، له‌ورا بجه هێلان بۆ وی دبیته باشترین چاره‌سه‌ری، نوكه ئه‌م دبینین ب ده‌هان كێشه‌یان ل كوردستانێ سه‌رهلدایه و بێ چاره‌سه‌ری ماینه و پرس و كێشه‌یێن گه‌له‌ك مه‌زنتر ژ پرسا سه‌روكێ هه‌رێمی و ده‌ستهه‌لاتێن سه‌رۆكی ل كوردستانێ هه‌نه، وه‌كو پرسا (موچه‌یێ و كاره‌بێ و ئاڤێ شه‌رێ داعشێ ئاسایشا نه‌ته‌وه‌یی.. هتد). پێدڤی بوو لایه‌نێن سیاسی ل سه‌ر راوه‌ست بانه، به‌لێ موخابن لایه‌نێن سیاسی ب رۆژان و حه‌فتیان ل سه‌ر پرسه‌كا وه‌كو پرسا سه‌رۆكێ هه‌رێمی و ده‌ستهه‌لاتێن سه‌رۆكی راوه‌ستیاینه و كومبون دبێژیته كومبونێ جهێ من بكه، و هه‌می دبێ ئه‌نجام بوینه.
لێ ب دیتنا من، ژبۆ ڤه‌شارتنا وان پرس و كێشه و ئاریشێن ل كوردستانێ سه‌رهلداین پرسا سه‌رۆكێ هه‌رێمێ هاڤێته دگوره‌پانێ دا ژ بۆ لارێدا برن و مژویلكرنا مێشكێ خه‌لكی، دا كو هزر د كێشێن ل سه‌ری هاتینه به‌حس كرن دا نه‌كه‌ن و ئه‌ڤ پرسه بوویه شوونگرا هه‌می پرسا و هه‌ر وه‌كو چ كێم و كاسیێن دیتر د كوردستانێ دا نه‌بوینه، و یا ژ وێ خرابتر راگه‌هاندن ب هه‌می تایێن خۆڤه یێن گوه لێبون و دیتن و خواندنێ ژی یێن بوینه پالێن ڤێ پرسێ و هندی دی بزۆتا پێش دكه‌ن و مه‌زن دكه‌ن و (ژمێشێ دكه‌نه گامێش)، و رۆژانه چه‌ندین مێزگه‌رد وسیاسه‌تمه‌داران مێڤان دكه‌ن ل سه‌ر پرسێ، كو ل وی ده‌می ئه‌ركێ راگه‌هاندنێ یه ب هه‌می شیانێن خۆه ل سه‌ر ئارام كرن و هێوركرنا بارودوخێ هه‌رێمێ راوه‌ستێت و ئێدی (به‌س) مێشكێ خه‌لكی تێك بده‌ت، چونكه ئه‌و دزانن كارتێكرنه‌كا راسته‌وخۆه ل سه‌ر مێشكێ هه‌ڤولاتی دكه‌ن و بێی جودایی (ژن، زارۆك، گه‌نج و پیر) هه‌می دكه‌ڤنه ژێر وێ كارتێكرنێ ڤه، و ب دیتنا من سه‌ره‌ڕای وان هوكارێن هاتینه دیاركرن هوكارێ سه‌ره‌كیێ كوچكرنێ راگه‌هاندنه و روله‌كێ ئێكجار مه‌زن دڤی بواریدا گێرایه و هانده‌ره‌كێ سه‌ره‌كی بویه ژ بۆ كوچكرن و ئاراندنا جادا گشتی ل كوردستانێ و ب ره‌نگه‌كێ نه‌راسته‌وخۆ گه‌نجان هاندده‌ت بۆ كوچكرنێ، چونكه به‌رده‌وام دناڤ جڤاكی دا راپورتان چێدكه‌ن وپرسیارێن ئاراندنێ، ل سه‌ر كاودانێن نه‌خۆش ئاراسته‌ی گه‌نجان دكه‌ن و بزاڤێ ناكه‌ن ولاتێ وان ل به‌ر شرین بكه‌ن یان هه‌ستا نه‌ته‌وه‌یی ل جه‌م وان بلند بكه‌ن و بۆنمونه، پسیار ژێ بكه‌ت به‌ری كوچ بكه‌ت دڤێت هزر د مالبات ولاتێ خۆدا بكه‌ت دێ بۆ كێ هێلیت؟ نه‌خێر ئه‌ڤه پرسیاره نینه، له‌ورا دڤێت هزر د هه‌ر راپورته‌كێ دا بهێته كرن و ب تایبه‌تی یێن دیتنێ و تێله‌فزیونێ.
