دودلی کارتێکرنێ ل ژیانا مرۆڤی دکەت
بێوار حەمدی:
دەروونناسەکی دیار کر کو گەلەک جاران ئەو دودلییا لدەف مرۆڤی پەیدا دبیت یا سرۆشتییە و مرۆڤ بتنێ پێدڤی ب هاریکاری و هشیارکرنێ یە و گۆت؛ دودلی نە یا گرێدایە ب ژییەکێ دەستنیشانکری ڤە.
دەرونناس یاسر سەعید، دیار کر دودلی هەستەکێ سرۆشتییە و هەموو مرۆڤ د کاودانێن ژیانا خۆدا د ڤی هەستی دا دژین و گۆت؛ دودلی هەستکرنە ب تڕسێ ژ تشتەکی کو دبیت د پاشەڕۆژێ دا چێببیت، لێ جاران ژ سنورێن خۆ یێن سرۆشتی دەردکەڤیت و کارتێکرنێ ل ژیانا مرۆڤی یا ڕۆژانە و پەیوەندی و ساخلەمیا مروڤی دکەت.
یاسر ئەو چەندە ژی دیار کر کو دودلی نەیا گرێدایە ب ژییەکێ دەستنیشانکری ڤە، دبیت هەر ژ بچویکاتیێ لدەف مروڤی دیار ببیت و یا بەردەوام بیت دگەل مرۆڤی و گۆت: دەما دودلی ژ بچویکاتیێ دەستپێدکەت زارۆک هەست ب ترسێ دکەت دەمێ ژ دایکا خۆ دویر دکەڤیت کو دبێژنێ “دودلیا ژێکڤەبۆنێ” دیسان ل ئەزمونان ژی تووشی دوودلیێ دبیت دەمێ ژ ئەنجامان یان بۆچونێن دەوروبەران دترسیت.
دەرونناسی د بەردەوامیا ئاخفتنێن خۆدا دیار کر، گەلەک جاران دودلیا مروڤی یا سرۆشتییە و مروڤ بتنێ پێدڤی ب هاریکاری و هشیارکرنێ یە، لێ هەکە دژوار و بەردەوام بو رەنگە ببیتە تێکچۆنەکا دەروونی و پێدڤیە مرۆڤ چارەسەریێ وەربگریت و گۆت؛ چارەسەری ژی ب گەلەک ڕێیان هەیە وەکو وەرزش، نڤستنەکا ڕێکخستی، ئاخفتن دگەل کەسەکێ نێزیک، هەلکێشانا هەناسەیێن کویر یان ژی سەرەدانا نوژدار و چارەسەرکارێن دەروونی بکەت.
