دورزیێن سـووریێ داخوازەکێ ژ ئەمریکا دکـەن
رێبەرێ رۆحانی یێ دورزیان ل سووریێ داخواز ژ سەرۆکێ ئەمریکا دکەت هاریکاریا دەستهەلاتا نها یا شامێ نەکەت، چونکی ئەحمەد شەرع و کەسێن ل گەل وی هەکە بهێز کەڤن دێ بنە مەترسی ل سەر هەموو پێکهاتەیێن ل سووریێ و دێ گەلەک خەلک بنە قوربانی.
حکمەت هیجری رێبەرێ رۆحانی یێ دورزیان ل سووریێ داخواز ژ دۆنالد ترامپێ سەرۆکێ ئەمریکا کر، کو د رەوشا نها یا ئالۆز دا ب چو رەنگەکێ هاریکاریا دەستهەلاتا ئەحمەد شەرعی نەکەت، چونکی نها ل سووریێ چو لەشکر نینن، یێن وەکو لەشکرێ سووریێ خوە ددەنە نیاسین ژ گرۆپێن توندرەو پێکهاتینە و دەستێ وان د کوشتنا عەلەویان و دورزیان دا هەیە، هەکە ئەمریکا پشتەڤانیێ ل ئەحمەد شەرعی بکەت و ئەو بشێت پێگەهێ خوە ل سووریێ بهێز کەت دێ دەست ب کوشتنا خەلکێن عەلەوی، دورزی و کوردان کەت و ژ بەر ڤێ یەکێ ژی دڤێت ئەمریکا د رەوشا نها یا هەستیار دا ب چو رەنگەکێ هاریکاریا شامێ نەکەت.
ناڤهاتی ئەو یەک ژی دیار کر، د رەوشا نها یا هەستیار دا پێدڤیا سووریێ ب دستوورەک نوو و دیموکراتی هەیە کو تێدا مافێن هەموو پێکهاتەیێن ل سووریێ بهێتە پاراستن، مخابن هەتا نها تشتەک وەسا ل سووریێ نینە و دەستهەلاتا توندرەو یا شەرعی ژی هەکە دەلیڤە بۆ دروست ببیت دێ جارەکا دی ئێرشی سوەیدایێ کەت، د ئێرشێن بەری یێن نها ل سەر سوەیدایێ دا گەلەک وەلاتیێن سڤیل یێن دورزی هاتنە کوشتن و یا ئەحمەد شەرعی کری تاوانەک مەزن بوو و گۆت: (داخواز ژ سەرۆکێ ئەمریکا دکەم ب چو رەنگەکێ هاریکاریا شامێ نەکەت، د رەوشا نها دا بهێزبوونا شامێ دێ بیتە مەترسی ل سەر هەموو پێکهاتەیێن ل سووریێ، هێشتا ژی باوەریا ئەحمەد شەرعی و دەستهەلاتا وی ب ئاشتیێ و پێکڤەژیانێ نینە، ژ بەر ڤێ یەکێ ژی نابیت ئەمریکا هاریکاریا دەستهەلاتەکا وەسا توندرەو بکەت).
رێبەرێ رۆحانی یێن دورزیان ئەو یەک ژی دیار کر، دڤێت بەری هەر تشتەکێ ئەحمەد شەرع و دەستهەلاتا وی هەبوونا پێکهاتەیێن ل سووریێ قەبوول بکەن و دەست ب دانوستاندنان بکەن، مخابن هەتا نها ل گەل کوردان ژی چو دانوستاندن نەهاتینە کرن و هەکە دەستهەلاتا نها یا شامێ دەلیڤە پەیدا بکەت دێ ئێرشی کوردان ژی کەت و گۆت: (بهێزبوونا شامێ مەترسیە بۆ هەموو پێکهاتەیێن ل سووریێ، ژ بەر ڤێ یەکێ ژی دڤێت ئەمریکا راستیا هەی قەبوول بکەت، نابیت پشتەڤانیا ئەمریکا یا بۆ شامێ ببیتە ئەگەرێ ڤێ یەکێ هێزێن سەر ب ئەحمەد شەرع دەست ب کوشتنا خەلکێ سڤیل ل سوەیدا و دەڤەرێن دی یێن سووریێ بکەت، دڤێت رێگری ل بهێزبوونا شامێ بهێتە کرن).
