دووماهی ژڤان
سیپان مستەفا باپیر
دووماهییا چیڕۆکا من و تە گەلەک ڤەکێشا، رێیا من درێژکر، دزانم بێ ئاگەهییا تە ئەزم، ترسێ و شەرمێ خوە دگەل هەڤدو گونجاندن و دگەل دلێ من بوونە هەڤرێک، لێ وی دەمێ کو من تێدا داڤێن دلێ خوە بۆتە هاڤێتین، هێشتا زارۆک بووم، ئەگەر من ل وی دەمی دیتنا خوە بۆ تە شرۆڤەکربا دا بێ دیناتی بەرنیاس بم، دگەل بارینا هەر بارانەکێ د زڤستانا سار دا و د گەل لێدانا بیریسییان روونبوونا ئەرد و ئەسمانان، شەمالکا ل ناڤ دل و جانێ من رۆناهییا وی دێمێ من یێ هێشتا ل زاروکینیێ ژبەر ڤیانا تە نیشانێن پیراتیێ گرتین گەش دبوو، خەون دبوونە راستی.. ئەها د وی دەمیدا ئاسمان ب کڤانێ كەسكوسۆری زەلال دبوو، بەلاتینکێن دلێ من ژ دیواران ڤەدبوون، خوینا دلێ من مینا شەپۆلێن دەریای بلند دبوون، لەرزینا دەستان ب وان دیمەنێن دگەل تە ئەز دخاپاندم ژ تە دویری دکرم. ئەها د ڤی دەمیدا، پرسیارێن من زووردبوون..
من دڤیا ئەوا ب سالان من د گیانێ خوە دا ڤەشارتی، د هەر چرکەکێدا دگەل هەر هەناسەکێ روحەکا دی بوو دگەل من سەما دکر، دگەل هه ر کاودانەکیدا من تو لگەل خوە بەشدار دکری، لبەر خۆدیکا خوە هەر تشت بۆتە دگۆتن، من هەمی پرسیار لێک ڤاڤارتن؛ داکو خوە ژێ ئارام بکەم و بەرسڤا وان نە دەم، دڤالەهییا ژیانا خوە دا، من تو ژبیر نە دکری.
من دڤیا هەڤرکییا من و ترس و شەرمێ ب داوی بینم، وێ جەنگا ب سالان دگەل من ژیای ب ئارامی چارە بکەم، رێیا من یا خراب بوویی ب ساناهی دەرباس ناکەم، هەوار و گازیێن من هەمی دەرگەهین گرتی یێن قوتاین بێ ئاگەهییا وژدان و هەستین وان من مەندەهۆش دکەن! بۆچ ڤان مرۆڤان هەستێن خوە بن ئاخ کرنە؟ دەمەکیدا، دەستێن بێ دەستهەلاتان دگرتن، جارەکادی پرسیاران دەرگەهێ دلێ من لێدا..
ئەڤێ جارێ رەڤین نینە، دڤێت بەرسڤا وان بدەم، چ بوویە ئەگەر کو هەست نە مینن؟ ئەها ل ڤێرێ من بەرسڤ زانی! کو هەرکەسی ب برسێ مەزن بووی دێ ل دووماهیی هەرتشتەکی تە بۆ کری ژبیر کەت، بریارا من ئەو بوو کو تە ب داوی بینم، من نە زانی د کێلەکیدا هەستا ل دەسپێکێ سەما دگەل دەنگێ تە دکر.. دەستپێکا چیڕۆکەکا ژخەیالان هاتی کرە راستی.
د ڤی دەمیدا، گرێدانا دیتنا بەرزە دبوو، چیڕۆک دشاراندنێ دابوو، ئاگرێ وێ دەوروبەر گەرم دکرن، د زڤستانا سارا دلێ مندا، حەیرانۆک وگوتێنێن لاوێ من جارەکادی زارۆکینی لدەڤ من ئاڤاکر، خۆزیا ئەزمان ل من لال کر، ئاشۆپ و خەیالان داهاتی دەسپێکرن، کراسێ بووكانییێ لبەر پێن من شۆڕ بوو.. دگەل گرتنا دەستێ ئارامکەرێ روح و گیانێ من، هەناسەیا من نوی دبوو و خەونا سالان راستیەکا ڤەشارتی ڤەدگێڕا، ب هیڤیبوون ژخەونا گیانێ خوە دیربکە.
