دوو نەخوەشخانە ل زاخۆ دێ هێنە ئاڤاكرن
زاخۆ، دلۆڤان هالۆ:
سیروان ئەحمەد، ڕێڤەبەرێ گشتی یێ ساخلەمیا زاخۆ بۆ ڕۆژناما ئەڤرۆ دیار كر كو ب پشتەڤانیا حوكمەتا هەرێما كوردستانێ و ئیدارەیا سەربخوە یا زاخۆ، دو نەخوەشخانە ل زاخۆ دێ هێنە ئاڤاكرن.
ڕێڤەبەرێ گشتی یێ ساخلەمیا زاخۆ، ئاماژە ب وێ چەندێ ژی كر كو نەخوەشخانا ئێكێ یا هاوارهاتنێ یا 30 تەختی یە و ل دەڤەرداریا باتیفا دێ هێتە ئاڤاكرن، هەتا نوكە 15% هاتیە بجهئینان و بڕیارە د دەمێ خوە یێ دیاركری دا بهێتە تەمامكرن و بكەڤیتە د خزمەتا خەلكێ دەڤەرداریا باتیفا و گوندێن دەوروبەر دا، ئێدی هەر نشتەرگەریەكا ب لەز و نەخوەشەكێ تەنگاڤ هەبیت ل ڤێ نەخوەشخانێ دێ هێتە چارەسەركرن و پێدڤی ناكەت ئێدی نەخوەش بۆ نەخوەشخانا هاوارهاتنا زاخۆ بهێنە ڕەوانەكرن.
سیروان ئەحمەد گۆت: «نەخوەشخانەیا دویێ ژی یا زاڕۆكانە و پێكهاتیە ژ نەخوەشخانەكا 90 تەختی و ل سەنتەرێ دەڤەرداریا زاخۆ، ل تەنشت نەخوەشخانا ئافرەت و زاڕۆكبوونێ دێ هێتە ئاڤاكرن، ئەڤ نەخوەشخانە دێ بارسڤكیەكا مەزن ئێخیتە سەر كەرتێ ساخلەمیێ ل زاخۆ، ئێدی دێ ڕەوانەكرنا نەخوەشان بۆ دهۆكێ گەلەك كێم بیت، ب تنێ ئەو نەخوەشێن تووشی نەخوەشیێن دەگمەن دبن بۆ دهۆكێ دێ هێنە هنارتن».
