دوپاتی ل سەر گەهاندنا پڕۆژەیێن خزمەتگوزاری بۆ خەلكێ دەڤەرداریا ئامێدیێ هاتە كرن
د. عەلی تەتەر، پارێزگارێ دهۆكێ سەرا بارەگایێ لقێ 18 یێ پارتی دیموكراتی كوردستان ل ئامێدیێ دا و بەرپرسێ لقێ و پارێزگارێ دهۆكێ دوپاتی ل سەر گەهاندنا پڕۆژەیێن خزمەتگوزاری بۆ خەلكێ دەڤەرداریا ئامێدیێ كر.
د هەڤدیتنەكێ دا ل گەل بەرەڤان حەمدی، بەرپرسێ لقێ 18 یێ پارتی دیموكراتی كوردستان و دەڤەردارێ ئامێدیێ و چەند ئەندامێن لقێ بەحسێ رەوشا دەڤەرێ و پێدڤیێن خەلكێ دەڤەرێ ب پڕۆژەیێن خزمەتگوزاری هاتە كرن.
پارێزگارێ دهۆكێ و بەرپرسێ لقێ 18 دوپاتكرن، كو بەردەوام كار ل سەر گەهاندنا پڕۆژەیێن خزمەتگوزاری بۆ خەلكێ دەڤەرداریا ئامێدیێ دێ هێنە كرن، بۆ وێ یەكێ ژین و ژیارا وەلاتیان بهێتە خوشكرن.
دیسا ل رۆژا چارشەمبیا بۆری د. عەلی تەتەر، پارێزگارێ دهۆكێ، ب ئامادەبوونا چەندین رێڤەبەرێن پەیوەندیدار و كەسوكارێن رەڤاندیان ل پانۆراما ئازادی ل باژێرێ دهۆكێ پێشوازیا وان شەش كچێن ئێزدی كر، ئەوێن ل ڤان رۆژان ژ دەستێن تیرۆرستێن داعشێ هاتینە رزگاركرن.
پارێزگارێ دهۆكێ د پەیڤەكێ دا سوپاسیا سەرۆك “مەسعود بارزانی” و “نێچیرڤان بارزانی “سەرۆكێ هەرێما كوردستانێ و ”مەسرور بارزانی” سەرۆكێ حكومەتا كوردستانێ كر، هەمبەر هەول و بزاڤێن وان یێن بەردەوام بۆ رزگاركرنا هەموو رەڤاندیێن ئێزدی و خوشحالیا خوە دیاركر هەمبەر ئازادكرنا وان شەش كچان و پیرۆزباهیا كەسوكارێن وان كر و هیڤی خواستن رەڤاندیێن دی ژی ب زووترین دەم بهێنە رزگاركرن و ب باوەشا خێزان و كەسوكارێن خوە شاد ببن.
هەر بڤێ هەلكەفتێ بەرپرسێ نڤێسینگەها رزگاركرنا رەڤاندیان ل دهۆكێ د پەیڤەكێ دا سوپاسیا سەرۆك بارزانی و سەرۆكێ هەرێما كوردستانێ و سەرۆكێ حكومەتا كوردستانێ و پارێزگارێ دهۆكێ كر بۆ ئازادكرنا رەڤاندیان و تەكەزكر كو هەول و بزاڤێن نڤێسینگەها رزگاركرنا رەڤاندیان دێ د بەردەوام بن هەتا هەموو رەڤاندی دهێنە رزگاركرن.
بۆ زانین هەتا نوكە سێ هزار و 568 رەڤاندی ژ كچ و ژنێن ئێزدیان هاتینە رزگاركرن.
