دوژمنێن كـوردان د لاوازن لێ كـورد ئێكگرتی نینن
ئەڤین بارزانی
هەكە ئەم بەرێ خوە بدەینە سەد سالێن بۆری چو دەمەكێ وەكو نها دوژمنێن كوردان لاواز نەبووینە، دو وەلاتێن داگیركەرێن كوردستانێ ئانكو سووریێ و ئیراق نها د رەوشەكا گەلەك لاواز دانە و ل ئیرانێ و توركیا ژی دەستهەلات د ناڤ ناكۆكیێن گەلەك مەزن دانە، لێ مخابن كورد د ناڤ خوە دا ئێكگرتی نینن كو بشێن دەلیڤەیێن هەی باش بكار بینن و ئێدی ببنە هێزەكا هەری كاریگەر ل رۆژهەلاتا ناڤین.
بەرۆڤاژی هندەك كەسان كو وەسا دبینن دەستهەلاتا نها یا بەغدا بهێزە و دژبەریا كوردان دكەت راستی وەسا نینە، بەغدا گەلەك یا لاوازە و ئەو یەك د دەمەكێ دایە كو پێگەهێ كوردان ل ئیراقێ باشە، لێ ناكۆكیێن ل هەرێما كوردستانێ وەسا كرینە بەغدا بهێز دهێتە بەرچاڤ، ئانكو هندەك هێز ل هەرێما كوردستانێ ژ بۆ بەرژەوەندیێن خوە یێن تەنگ هەردەم وەسا نیشا ددەن كو بەغدا یا بهێزە و دڤێت هەرێما كوردستانێ هەموو تشتێن بەغدا دڤێت بجه بینیت، ئەو یەك د دەمەكێ دایە كو نیەتا بەغدا چارەسەركرنا پرسێن نها نینە، بەلكو هەر دەستهەلاتەك ل بەغدا كار بۆ ڤێ یەكێ دكەت هەرێما كوردستانێ و ناكۆكیێن هەی بۆ كۆمكرنا دەنگان بكار بینیت، یا نها سودانی دكەت بەردەوامیا سیاسەتا بەری نها یا مالكی و عەبادی یە.
هەكە ئەم بەرێ خوە بدەینە دو سالێن دووماهیێ براستی ژی حوكمەتا هەرێما كوردستانێ ب سەرۆكاتیا بەرێز مەسرور بارزانی گەلەك بزاڤ كرن كو پرسێن هەی ل گەل بەغدا ب رێیا دانوستاندنان چارەسەر بكەت، ب سەدان شاندێن هەرێمێ چوونە بەغدا و بەرپرسێن بەغدا ژی گەلەك جاران سۆز دان كو دێ پرسا مووچێ فەرمانبەرێن كوردستانێ چارەسەر بیت، لێ هەتا نها ژی رەوش وەكو خوە مایە، ئانكو هەر جارێ بەهانەیەكێ دئینن دا هەرێما كوردستانێ و رایا گشتی یا خەلكێ كوردستانێ ب بابەتێ مووچەیی ڤە مژوول بكەن و ئەو یەك سیاسەتا بەغدایە ل هەمبەر هەرێما كوردستانێ، مخابن هندەك هێز ل هەرێما كوردستانێ ژی هاریكاریا سیاسەتا بەغدا كرینە و ئەو یەك ژی بوویە ئەگەر بەغدا بەردەوامیێ بدەتە سیاسەتا برسیكرنێ و زێدەباری دەستێوەردانێن دەرەكی كو پرسا مووچەیی چارەسەر بیت لێ هەتا نها ژی رەوش هەر یا ئالۆزە.
د دەمەكێ وەسا دا دڤێت ئێدی هەرێما كوردستانێ بریارا خوە بدەت، ئەز باوەرم ناكەم ل هەرێما كوردستانێ ژ بلی هندەك هێزێن بناڤ ئۆپۆزسیۆن كو كارێ وان هەردەم دژبەریا هەرێما كوردستانێ یە، چو كەسێن دی ژ رەوشا نها رازی بن، ئانكو هەكە پێكڤەكاركرن هەبیت و هێزێن سیاسی ب تایبەتی ژی یێن نها ژ بەغدا توورە نە پێكڤە هەلوەستێ نیشا بدەن و جڤاكێ نێڤدەولەتی ژی ئاگەهدار بكەن و د ئاستێ جیهانی دا رەوشا هەی بگەهیننە وەلاتێن دوستێن هەرێما كوردستانێ دێ رەوش هێتە گوهۆڕین، دڤێت ژبیر نەكەین گەلەك وەلاتێن جیهانێ پشتەڤانیێ ل هەرێما كوردستانێ دكەن و هەكە كارەك باش بهێتە كرن دێ فشارەكا گەلەك زێدە ل بەغدا هێتە كرن و دێ بەغدا نەچار بیت دەست ژ سیاسەتا خوە یا برسیكرنا خەلكێ كوردستانێ بەردەت، ئانكو بریار ل هەولێرێ یە، ڤێجا دڤێت لەز د بریاردانێ دا بهێتە كرن، چونكی رەوشا ژیانا خەلكی باش نینە و ئەز باوەرم هەر بریارەكا حوكمەتا هەرێمێ و هێزێن كوردستانی ل دژی بەغدا بدەن دێ خەلك ب هەموو هێزا خوە یا پشتەڤان بیت و ئەو یەك ژی بێگومان گەلەك یا گرنگە.
