دوژمن رێككه‌فتن و ئه‌م لێككه‌فتین
كوردستان وه‌لاته‌كێ سه‌یره، هندی ئه‌ز پتر حه‌ز ژێ دكه‌م ئه‌و پتر من دئێشینیت، ئه‌ز یێ بوویمه به‌نده‌وارێ ئه‌ڤینا وێ و د عشقا وێ دا دین و هار بوویم، ئه‌ز خه‌ریبێ زارۆینیا خوه مه یا من د هه‌مبێزا كوردستانێ دا بۆراندی، به‌لێ ئه‌ز حه‌ز ژ ره‌فتارێن ته ناكه‌م كوردستان، مه‌زناهیا ته ل سه‌ر سه‌رێ من و كێم پووته‌دانا ته ب من، من بێ ئومێد دكه‌ت، هه‌می ده‌مان ل به‌ر سینگێ ته دگرنژم و زوو دچم و ب بێده‌نگی دكه‌مه گری، ئه‌ز هه‌می رۆژان خوه به‌رهه‌ڤ دكه‌م دا بهێمه دیدارا ته و گوه ل ده‌نگێ ته‌ببم، لێ عاشقێن ته‌یێن دره‌وین یاریا ب دلێ من و ته دكه‌ن، به‌لێ چ بكه‌م نه تو د خه‌یالێ دا ژ من ڤه‌دبی و نه ژی د كه‌تواری دا دبیه وه‌لاتی من.
تو وه‌لاته‌كێ سه‌یری كوردستان، هندی گه‌نج خوینێ بۆ ته درێژن تو وه‌كو دوزه‌خێی و هه‌ر دبێژی “هل من مزید؟”، عویرێ ته گه‌له‌كێ مه‌زنه و هندی دكه‌نێ تژی نابیت، هندی ژ عویرێ ته دكێشنه ده‌رێ ژی به‌ریكا تژی ناكه‌ت.
تو وه‌لاته‌كێ سه‌یری كوردستان، نۆشدارێن ته بازرگانیێ ب ساخله‌میا مه دكه‌ن و ئه‌ندازیارێن ته نزانن جاده‌كێ ژی چێكه‌ن، بازرگانێن ته نه‌هنگن یان ژی پێشینه خوینا مرۆڤان دمێژن، كه‌سێن پاك و بژین د بێ خودانن و دز ل سه‌رێن كوچكا فیتكا ل ره‌شه‌كان ڤه‌دده‌ن، به‌حسێ قاره‌مانێن ته ل به‌ر كوچكێن بالاڤیان ژی نینه و ترسنۆك ل پشت مێزان به‌ژن و بالا بادده‌ن. تو وه‌لاته‌كێ سه‌یری كوردستان ل هه‌می دونیایێ شه‌هید دساخن و نامرن و ب تنێ د هه‌مبێزا ته‌دا شه‌هید دمرن و زوو ژبیر دچن، ل هه‌می دونیایێ خێزانێن شه‌هیدان د سه‌ر بلندن و ل كوردستانێ هه‌ڤژینێن شه‌هیدان ل رۆژا وه‌رگرتنا مووچه‌ی شه‌رم ژ زارۆیێن خوه دكه‌ن. تو وه‌لاته‌كێ وه‌كو خۆی كوردستان، ل هه‌می جهێن دونیایێ دزیكه‌ر یێن د زیندانان ڤه و ل كوردستانێ دزیكه‌ر یێن د جوانترین خانیان ڤه و ل باشترین ترۆمبێلان سووار دبن، ل هه‌می دونیایێ دزیكه‌ر یێ بێ بها و شكه‌ستیه، به‌لێ ل كوردستانێ ل سه‌رێن دیوانان دروونن و گه‌له‌ك ده‌ستێ خوه بۆ وان دده‌ته سینگێ خوه و ده‌نگێ ئه‌زبه‌نیان دفریته ئه‌سمانی.
تو وه‌لاته‌كێ سه‌یری كوردستان، خه‌لكێ ته ب تنێ ل ده‌وات و شه‌هیانان ده‌ستێن ئێك و دو دگرن، دوژمن ل سه‌ر ته رێكدكه‌ڤن و كوڕێن ته ل سه‌ر ته لێكدكه‌ڤن، ل هه‌می دونیایێ هه‌لبژارتنان دكه‌ن دا ئێك وه‌لاتێ وان برێڤه ببه‌ت، ئه‌م هه‌لبژارتنان دكه‌ین دا سه‌را كورسیكێ لێككه‌ڤین، سیاسه‌تا مه یا بوویه گرارا ب پێنج كابانیان و دوژمن ل به‌ر ڤه‌نیٍساندینه دا ل خوه لێكڤه‌كه‌ن، به‌لێ بێهنا وێ گرارێ یا دهێته مه و ئه‌م دزانین دێ رێژنه كولانێ و پشیك و سه دێ خۆن.
ئه‌م ژ روونشتنێ و به‌رێخوه‌دانا شاشێن ته‌له‌ڤزیۆنان و گوهداریا نووچان بێزار بووین، ئه‌م ژ هه‌لویست و گۆتنان بێزار بووین، ئه‌م ژ سۆز و ژ ڤان و هۆشداری و گه‌ف و دره‌وان بێزار بووین، ئه‌م ژ مینبه‌ر و حڕحڕا قاره‌مانێن میحوه‌رێن مال بێزار بووین، ئه‌م ژ هاتن و چوونا كاره‌بێ و ئاڤێ و پانزینێ و نه‌هاتنا مووچان بێزار بووین. ئه‌م ژ قومارا پێنج قولی و كه‌نیا به‌رپرسان بێزار بووین و ل هیڤیا هێكا دیكلینه كو یا بوویه كابووسه‌ك و ئه‌م یێن فه‌تساندین و كرینه به‌نده‌وارێن خه‌ونان، ئه‌م یێ وه‌لاتێ خوه دكوژین كو د بنیات دا هێشتا ژ دایك نه‌بووی بێی ئه‌م تاوانباران دادگه‌ه بكه‌ین، هه‌تا وی راده‌ی كو ئه‌م د فه‌رهه‌نگا شه‌ره‌ف و ره‌وشتان دا كه‌تین و به‌رزه‌بووین، مه بنیاتێ ئه‌ده‌ب و توره‌یێن جڤاكی و ره‌وشتێن شارستانی د ناڤ حه‌فحه‌فا “كورسیكا سه‌رۆكاتیێ” دا كوشتن، مه پیڤه‌رێ وه‌لاتپارێزیێ شكاند و ب پیڤه‌رێ حزباتیێ گوهارت، مه مه‌زناهیا خوه یا پۆخ و سه‌رنه‌كه‌فتنا خوه د ئه‌ڤینا وه‌لاتی دا ل سه‌ر شاشێن ته‌له‌ڤزیۆنان كرنه مه‌تحه و په‌سنه و كێلكرنا سینگان، سه‌ركه‌فتا حزبه‌كێ ل سه‌ر یا دی یا هاتیه به‌رامبه‌ر راگه‌هاندنا ده‌وله‌تێ. د دارستانێ دا شێر دنڕیت هه‌می بێده‌نگ دبن و فه‌رمانان بجهدئینن، د عه‌شیره‌تێ دا ئاغا د ئاخڤیت و هه‌می بچووك و مه‌زن دبن، د ده‌وله‌تێ دا قانوون د سه‌ر هه‌میان را یه، ئه‌م ژ ڤێ چه‌ندێ ل كیڤیه‌ینه؟ ئه‌م یێن بووینه سرۆدا كه‌سێن كه‌ڕ و ئاوازا لالان و وێنێ نابینان و مه‌یدانا په‌ككه‌فتیان، ئه‌م ب ره‌نگكرنا دره‌وان ڤه حولی بووین دا بكه‌ینه راستی چونكو ئه‌م گه‌له‌ك باوه‌ر ژ دره‌وان دكه‌ین، خوزی كوردستان دره‌وه‌ك با دا شیاباین ب ساناهی باوه‌ر ژێ بكه‌ین.
هه‌وه چ دڤێت؟ ل هه‌ولێرێ و ل دهۆكێ و ل سلێمانیێ و ل هه‌له‌بجه، هه‌وه چ ژ ڤی وه‌لاتی دڤێت گه‌لی حزبان؟
شه‌رێ داعش؟ كه‌ره‌مكه‌ن ئه‌و مه‌یدانا شه‌ڕی.
به‌رسینگگرتنا حوكمه‌تا عیراقێ؟ نوكه باشترین ده‌مه بۆ بده‌ستڤه‌ئینانا مافێن مه ل به‌غدا چونكو یا نه‌باشترین ره‌وش دا دژیت.
هه‌وه دڤێت شه‌ڕێ ئێك و دو بكه‌ن؟ كه‌ره‌مكه‌ن، هوین ئه‌ڤرۆ د باشترین ره‌وشا پارچه‌بوونێ و بێرێزیێ دانه به‌رامبه‌ر كوردستانێ.
هه‌وه دڤێت كوردستانێ ئاڤاكه‌ن؟ كه‌ره‌مكه‌ن نوكه كوردستان ژ هه‌می ده‌مان پتر پێدڤی ب وه‌فاداریێ و كه‌سێن نه كرێگرتی هه‌یه.
