دویماهی نامە
نزار عیسا نۆردینی
سالەکا تێر بەفر بوو، بەفر کەتبوو ل سەر گۆپیتکا چیای و هەناسەیا فەرهادی دبوو دویکێل ژبەر سارماتییێ. ئەو پێشمەرگەیەکێ سیهـ و هەشت سالی و چار سال بوو ل سەنگەران بوو. د بەرویکا ویدا وێنەیەکێ کچا وی یا شەش سالی هەبوو(ڤیان). وی چار سال بوو ئەو نەدیتبوو.
هەڤالێ وی ئازادی پرسیار کر»خەریبە، تو بێرییا بەفرێ دکەی؟» فەرهادی گۆت:»نە، ئەز هزر د کچا خۆدا دکەم، ئەڤڕۆ ژدایکبوونا وێ یە.» ئازادی دەستێ خۆ دانا سەر ملێ فەرهادی. پێشمەرگەیێن دی ئاگر هەلکربوو و چایا تەحل ڤەدخوارن، ل ژێر تاریاتییا ئاسمانێ تژی ستێر.
ژ فەرهادی خواستن «نامەیەکێ بنڤیسە بۆ وێ. ئەم دێ ڕێکەکێ بۆ گەهاندنا نامەیێ بینن».فەرهادی سەرێ خۆ هەژاند و نامەیەک ل سەر کاغەزەکا زەر و سپی نڤیسی:
کچا من یا خۆشتڤی
« ڕۆژا ژدایکبوونا تە پیرۆز بیت، شەش سالیا تە، ئەز ل سەر چیایەکێ بلند ڕوینشتیمە و ستێر گەلەک نێزیکن ل ڤێرێ، ئەز ستێرەکێ دبینم یا ب ناڤێ تە گەش و جوان. ئەز سۆزێ ددەمە تە، کو ئەم دێ پێکڤە ڤەگەڕین و دێ هەمی سالڕۆژێن تە پێکڤە ل مال پیرۆز کەین.»
بابێ تە یێ هەژی تە/ فەرهاد
سپێدێ زوو، دەنگێ تۆپان هات، فەرهاد هشیار بوو، هەڤالێن وی گازی ئەوی کرن. دەمێ فەرهاد چوویە دەرڤە، وێنەیەکێ خراب ل بەر چاڤێن وی بوو. دۆژمن ب هێزەکا مەزن و زێدە هاتبوو. دەنگێ تڤە تڤەیا گولەیان دهات، ئەو بەرەڤ سەنگەرێ خۆ چوو. «ڤەگەڕن!» فەرهادی ب هێز گازی کر. «هوین خوە دویر بکەن، دێ دۆژمنی گیرۆکەم و زڤرم.» دەمەکێ درێژ وی بەرخوەدان کر هەتا هەڤالێن وی دویرکەفتین. پاشی گولەیەک ب سینگێ وی دکەفیت، وێنەیێ ڤیانێ و نامە ژ بەرویکا خۆ دەرێخستن، بەفر هاتبوو خوارێ ل سەر چاکێتێ وی و نڤێسی»کچا من، ئەگەر نەهاتم، بزانە هەردەم من چەکێ هەلگرتی ژبەرتە و وەلاتی، هوین ئازاد بن، هوین بەردەوام ب زمانێ خۆ باخفن و سەربەست بژین … تو دێ بابی ژبیرکەی، بەلێ بیرا تە بیت، کو بابێ تە تو ژبیرنەکری هەتا دویماهی هەناسە.» بابێ تە.
دەنگێ کەفتنا جەستەیەکی ل سەر بەفرێ، سپیاتییا پاقژب بێدەنگی سۆر بوو ژ خوینێ، پشتی هەیڤەکێ، گەنجەک هاتە گوندەکێ بچویک و نامەیەک داڤ ژنکەکێ ب ناڤێ ئەڤین و کچکەکا بچویکا جوان ل تەنشتا ئەوێ بوو. ڤیانێ نامە ڤەکر و ڕۆندک ژ چاڤێن وێ ڕژیان. دایکا وێ بەرێ خۆدایێ و پرسیار کر:»چ هەیە کچا من؟».. گۆت دایێ «بابێ من ژدایکبوونا من پیرۆز کر، وی گۆت ئەم دێ هەمی سالان پێکڤە پیرۆز کەین … « ڤیانێ ب گری گۆت و دایکا وێ هەمبێز کرێ و ب بێدەنگی گرین.
