دو باشنڤیس ل باژێرێ مەریوان هاتنە خەلاتکرن
شاكر ئەتروشی:
بەرزان حاجی و مستەفا سەعید وەكو دو باشنڤیسێن كورد ژ قەزایا كەلار ل سنۆرێ ئیدارەیا گەرمیان بۆ سالا دویێ پشكداری د فەستیڤالەكا مەزنا باشنڤیسیێ دا كرن، ل باژێرێ مەریوان ل رۆژهەلاتێ كوردستانێ و بوونە ئەندام د گرۆپێ باشنڤیسێن وی باژێری دا.
بەرزان حاجی، سەرۆكێ گرۆپێ باشنڤیسێن كەلار، بۆ رۆژنامەیا ئەڤرۆ گۆت: ئەز و ماموستا (مستەفا سەعید) كو ئەو ژی ئەندامێ سەرۆكێ گرۆپێ باشنڤیسێن كەلارە، ب شێوەیەكێ فەرمی بۆ وێ فەستیڤالێ هاتبووینە داخوازكرن، دەمێ فەستیڤالێ سێ رۆژ بوون و ژ هەر پارێزگەهەكا وەلاتێ ئیرانێ سێ هەتا چار باشنڤیسان د پشكداربوون، بەرنامەیەكێ باش هاتبوو دانان، ئەو ژی ژ چەندین چالاكیی كو گرێدای بۆارێ باشنڤیسیێ بوون هاتنە ئەنجامدان، ژوانا ئەم ل پێكڤە ل سەر چەند مێزەیان روونشتین و مە كەڤالێن باشنڤیسیێ چێكرن و ل رۆژا دووماهیێ ژی هەموو پشكدارێن فەستیڤالێ برنە چەند جهێن شوونواری ل وی باژێری.
هەروەسا گۆت: مە خەلاتەكێ مەزن یێ وێ فەستیڤالێ وەرگرت، هەروەسا ئەم بووینە ئەندام ژی د گرۆپێ باشنڤیسێن مەریوان دا و داخواز ژمە كرن كو سالا بهێت ژی د فەستیڤالێ دا پشكدار ببین.
