دو برا بۆ ڤاڤارتنێن هەلبژارتیێ ئیراقێ بەرهەڤن
ب فەرمی فدراسیۆنا تێنسا ل سەر مێزێ یا ئیراقێ لیستا گشتی یا ئەوا یاریزانێن هاتنە داخوازكرن بۆ ڤاڤارتنێن هەلبژارتیێن ئیراقێ ل سەر ئاستێ ئۆلمپی، نشتیمانی و كچان، ئەوا بڕیارە هەڤڕكیێن وان دناڤبەرا 10 هەتا 17ێ ڤێ مەهێ ل باژێرێن جودا بهێنە كرن.
ل دور ڤێ یەكێ عەلی بامەرنی ئەندامێ فدراسیۆنا تێنسا ل سەر مێزێ بۆ رۆژنامەیا ئەڤرۆ گۆت: ل دووڤ بەرنامەیێ سالانە یێ فدراسیۆنێ و ئەو پلانا هاتییە دانان دێ ڤاڤارتن بۆ كۆمەكا یاریزانێن ڕێزێن پێشیێ یێن هەموو ئاستان هێنە كرن ژبۆ ژێگرتنا وان بۆ ناڤ ڕێزێن هەلبژارتیێ ئیراقێ خوە بەرهەڤكرن بۆ قارەمانیێن داهاتی و ئاسیایی و ئەڤ پرۆسێسە سالانە یا بەردەوامە.
ل دووڤ پلانا هاتییە دانان، ل سەر ئاستێ ئۆلمپی-ردیف- 14 یاریزان هاتینە ژێگرتن، ژ وانا یاریزانەكێ پارێزگەها دهۆكێ دگەل دایە ئەوژی جودی عەلی، هەڤڕكیێن وان دێ 10-11 ڤێ مەهێ ل پایتەختێ ئیراقێ بەغدا هێتە كرن، هەروەسان ل سەر ئاستێ پێشكەڤتیان بڕیارە هەڤڕكیێن وان ل 15-16ێ ڤێ مەهێ بهێنە كرن ژ سەرجەمێ هەشت یاریزانا ئێكێ پارێزگەها دهۆكێ تێدا یە ئەو ژی پیرس عەلی كو دبیتە برایێ جودی عەلی، ل سەر ئاستێ كچان ژی هەشت یاریزانن لێ چو یاریزانێن پارێزگەهێ دگەل دا نینن، دو یاریزان ل سەر ئاستێ ئۆلمپی-ردیف- دێ بۆ هەلبژارتیێ ئیراقێ هێنە ژێگرتن د قۆناغا ئێكێ دا.
ناڤهاتی ئەوچەندە ژی دیار كر ژبەر ئاستێ نە چاڤەڕێ كری یێ یاریزانێن پارێزگەها دهۆكێ ڕێژەیا وان دكێمن لێ ئەو دێ بزاڤێ كەت رێژەیا وان زێدەتر لێبكەت و گۆت: مە یاریزانێن خودان شیان هەنە تایبەت لسەر ئاستێن ژیێن جودا، گەشبینم بۆ داهاتی دێ رۆلێ خوە بینن و هێتە پێش.
