دو خویشكێن دەستڕەنگین د مالەكێ دا كاردكەن
سندس سالح سلێڤانەیی:
وارڤین و وارژین نەبی، دو خویشكێن ئێكن، دەرچۆیێن زانكۆیێ نە، هەردو پێكڤە كارێ دەست رەنگینێ دكەن و هیڤیا وان ئەوە رۆژەك بهێت وان جهەكێ تایبەت بۆ كارێ خوە هەبیت و ب گۆتنا وان ئەو داهاتێ بۆ وان دهێت دشێن هەتا رادەیەكی پێدڤیێن مالا خوە دابین بكەن.
وارڤینێ ب ناڤێ خوە و خویشكا خوە (وارژینێ) گۆت: پشتی مە زانكۆ ب دووماهی ئینای مە هزر دوێ چەندێ دا كر ئەم خوە ل هیڤیا دامەزراندنێ نەگرین و بۆ خوە كارە بكەین، ئەو بوو ئەم ل سەر وێ چەندێ رێككەفتین كو كارێ دەستڕەنگینیێ بكەین و ل دەستپێكێ مە چانتەیێن زارۆكان و مەدالی چێدكرن و ب رێیا ئۆنلاین دفرۆشین و سوپاس بۆ خودێ نوكە كارێ مە یێ باشە.
هەروەسا گۆت: كەرەستەیێن ئەم بكاردئینین هەموو ل بازاڕی یێ هەكە و نوكە داخوازی پتر ل سەر چێكرنا (مەدالیان) هەیە، ئانكو خەلكەك ژ هەردو رەگەزان دهێن داخوازا چێكرنا مەدالیان ژمە دكەن و پیتا ناڤێ خوە داخواز دكەن و ل جەژنان ژی پتر داخوازی ل سەر چانتەیان هەیە، لەورا هیڤیا مە ئەوە مە جهەكێ بەرفرەهتر هەبیت دا ئەم ژی بشێین كارێ خوە بەرفرەهتر لێ بكەین و سوپاسیا خێزانێ ب تایبەت ژی (دایكا) خوە دكەین كو ئەو پشتەڤانا مەیە.
