دو دیمەنێـن جوان و بالكێش
رەمەزان ئیسماعیل
-١-
شلخا مێشا
ئەڤە: كەڤرەكە، كونـەكا ل ڤی كەڤری، دبێژنێ: ( كونمێش). بڤێنا مێشـێن هنگڤینی یا ژ ڤێ كونمێشێ دهێت و شیشلتە یێن وان یێ ژێ دەردكەڤن و داددەنە سەر چەقێ دارەكا ل نێزیكی وێ و هەمی پێكڤە دبنە شلخەكا مێشا هەروەكی گومتلەكێ ئاخێ یان ئویشیەكێ تــریێ ڕەشمێوی یێ مەزن و ب شێوێ هرمیكەكێ ب وی چەقێ دارێڤە شـۆڕ دبن و بلەز و بێ گیرۆ بوون هندەك ژوان مێشا دەست دهاڤێژنێ ئاڤێ دئینن و هندەكێن دی شیراڤا گول و كولیلكا دمێژن و خوارنێ ژێ چێدكەن و بڤی ئاوایی ئاڤ ڕادوەستیت و ئەڤ چێكریێن خودێ ڕاناوەستن و هەمی پێكڤە وەسا كاردكەن دێ بێژی زبارا موختارێ گوندییە.
-٢-
ڕێــزكا مێریــا
ئەڤا دی ژی كونەكە د ئاخێ، دبێژنێ : (كونمێری).
مێریێن وێ یێن ڕێز بووین و یێ پشتییێن خوە ژ دندكێن جەهی و جەهداسی و زلێن گیایێ هشك هەلدگرن و جار جار ددانن، مرۆڤ هەست پێ دكەت كو هندی هند بارێن وان دگرانن و ئەو گەلەك پێڤە دبهێن هلماینە و گەلەك یێن پێڤە دكەرخن و دوەستییێن، لەوڕا دێ بینی جار جارا بار و پشتییێن خوە دهاڤێن و دهێلن و دەسـتا ژێ بەرددەن و پاشی پشتی دەمەكێ كورت پەشێمان دبن و جارەكا دی لێ دزڤڕنەڤە و دوبارە هەلدگرن و دەست ژ بێئومێدی و بێهیڤیبوونێ بەر ددەن و سەر ژ نوی وەسا ب حەز و ژ دل دەست بكارێ خوە دكەنەڤە دێ بێژی ئەڤە هەمی پالەنە و شۆلێ خوە یێ بقەبالە گرتی و دكەن.
