دو زارۆیێن دی بوونه قوربانیێن شه‌ڕێ په‌كه‌كێ و توركیا
ئامێدیێ، مه‌حمود نهێلی:
ژ ئه‌نجامێ شه‌ڕه‌كی د ناڤبه‌را چه‌كدارێن په‌كه‌كێ و له‌شكرێ توركیا دا ل باله‌فڕخانا بامه‌رنێ ل رۆژا ئه‌ینیا بۆری دو زارۆ شه‌هید بوون و زارۆیه‌ك ژی بریندار بوو.
عیماد زێوا سه‌ری ئێك ژ كه‌سوكارێن قوربانیان بۆ رۆژناما ئه‌ڤرۆ دیار كر، ئه‌و چووبوونه گوندێ ئه‌ره‌دنا ل سنوورێ ناحیا بامه‌رنێ بۆ مه‌به‌ستا سه‌یرانا گوندی و گۆت: “ل ده‌وروبه‌رێن ده‌مژێر شه‌شێ ئێڤاری چه‌كدارێن په‌كه‌كێ هێرشی بنگه‌هێ له‌شكرێ توركیا كر ل باله‌فرخانا بامه‌رنێ، له‌شكرێ توركیا ژی به‌رسڤ دای و هه‌ردولایان ب چه‌كێن گران ده‌وروبه‌رێن مه بوردۆمانكرن”.
گۆتژی: “ئێك ژ وان توپان، كو ناهێته زانین یا كیژ لای بوویه، د ناڤ سه‌یرانا گوندی كه‌فت و د ئه‌نجام دا دو زارۆ بناڤێ (یوسف كوڤان و ره‌ڤه‌ند هشیار) د ژییێ 13 و 10 سالیێ دا شه‌هید بوون و ئێك ژی بناڤێ (سیپان فه‌رهاد) بریندار بوو.
ژ لایێ خوه‌ڤه دژه تیرۆرا كوردستانێ به‌یاننامه‌ك ل دۆر روودانێ به‌لاڤ كر، زێده‌باری شه‌رمزاركرنا وێ هێرشێ دیاركریه، چه‌كدارێن په‌كه‌كێ ل گوندێ ئه‌ره‌دنا سه‌یرانا گونده‌كی بوردۆمانكریه و د ئه‌نجام دا دو زارۆ شه‌هید بوونه و ئێك ژی برینداربوویه.
پارێزگارێ دهۆكێ و ده‌ڤه‌ردارێ ئامێدیێ و لقێ 18 هه‌ر زوو ئه‌ڤ روودانه شه‌رمزار كر و دیار كرن كو په‌كه‌كه ئیستفزازێ ب خه‌لكێ ده‌ڤه‌رێ دكه‌ت و ئه‌ڤه چه‌ندین جاره روودانێن ب ڤی ره‌نگی ل ده‌ڤه‌رێ دروست دبن و خه‌لكێ بێ گونه‌هـ دبیته قوربانی شه‌ڕێ چه‌په‌لێ د ناڤبه‌را له‌شكرێ فاشێزمێ توكیا و چه‌كدارێن په‌كه‌كێ دا.
