دو سه‌رۆك و ئێك ئاراسته، بۆ چاره‌سه‌ریێ و بهێزتركرنێ
غیاس خالد زێبارى
د ڤان نه‌هــ ـ ده‌هــ سالێن داویێ دا هه‌رێما كوردستانێ كه‌فته به‌ر ژماره‌كا پێلێن دژوار یێن سیاسى و ئابوورى، راسته پڕانیا ڤان پێلان ل ده‌رڤه‌ى هه‌رێما كوردستانێ ب مه‌ره‌م دهاتنه ئاراسته‌كرن، لێ كاریگه‌ریێن نه‌رێنى لسه‌ر ئاستێ په‌یوه‌ندیێن ناڤخۆیى و ئیداره‌دانا هه‌رێمێ ژى كرن، چونكى هنده‌ك ئالیێن سیاسى یێن كوردستانێ پێ د گرنژین، ڤان كاریگه‌ریا وه‌كر ره‌وشا ئابووریا كوردستانێ بتایبه‌ت دانا مووچه‌ى سست و له‌نگه‌ر ببیت، ژلایه‌كێ دیتر ده‌ستێن وه‌لاته‌كێ هه‌رێمى ب زیقى هاته د ناڤ پرسێ و بوویه ئه‌گه‌رێ لاوازبوونا په‌یوه‌ندیێن د ناڤبه‌را هه‌ردو ئالیان و هنده‌ك جاران گه‌هشته ئاستێ لێدانا هه‌رێما كوردستانێ ب مۆشه‌ك و دڕۆنان.
ڤێ ره‌وشێ گڤاشه‌كا زۆرا دژوار یا سیاسى و ئابوورى لسه‌ر ئاستێ هه‌رێمایه‌تى و ناڤخۆیى لسه‌ر هه‌رێما كوردستانێ دروستكرن، ئه‌گه‌ر خودان سه‌ركرده‌یێن خۆڕاگر و دووربین نه‌بان ڕه‌نگه ڕه‌وش به‌ره‌ڤ ئالۆزیه‌كا زۆرا مه‌زن چووبا، لێ سه‌رۆك نێچیرڤان بارزانى سه‌رۆكێ هه‌رێما كوردستانێ و سه‌رۆك مه‌سرۆر بارزانى سه‌رۆكێ حوكمه‌تا هه‌رێما كوردستانێ، وه‌كى دو سه‌ركرده‌یێن دووربین و خه‌مخۆر ئاراسته‌یێن چاره‌سه‌ریێ و خۆڕاگریێ گرتن، ل ده‌مه‌كێ كێم دا شیان پیلان و به‌رنامێ نه‌یاران بهه‌لوه‌شینن و ژلایه‌كێ دیتر شییان پلانێن خوه یێن كورتبین و دووربین بۆ بهێزتركرنا هه‌رێما كوردستانێ بچه‌سپینن، هه‌ردو سه‌رۆك ب ڤان ئاراسته‌یان شییان ل گه‌ل ده‌وله‌ت و حوكمه‌ت و ئالیێن سیاسى یێن ئیراقێ بگه‌هنه‌ك ئه‌نجامه‌كێ باش یێ چاره‌سه‌ریێ، كو چ ئالى زیانبه‌خش نه‌بن، یا ژ هه‌میێ گرنگتر ب سیاسه‌تا ڤان هه‌ردو سه‌رۆكان، ده‌وله‌تا ئیراقێ نه‌شییا مه‌رامێن خوه یێن نه ده‌ستوورى لسه‌ر هه‌رێما كوردستانێ بسه‌پینیت، به‌لكى هه‌رده‌م داكۆكى لسه‌ر چاره‌سه‌ریێن د چارچووڤه‌یێ ده‌ستوورى دكرن، لسه‌ر ئاستێ ناڤخوه‌یى ژى بتایبه‌ت پرسا هه‌لبژارتنێن په‌رله‌مانى كو مه‌ترسیه‌كا زۆر لسه‌ر هه‌بوو، هه‌تا رادده‌یه‌كێ هاتیه چاره‌سه‌ركرن و چ مه‌ترسى لسه‌ر نه‌مانه، لسه‌ر ئاستێ په‌یوه‌ندیێن دبلۆماسى ل گه‌ل وه‌لاتێن جیران، كۆ كاكلكا سه‌قامگیریێ و ڤه‌ژاندنێ نه، پێشڤه‌چوونێن زۆر ئه‌رێنى هه‌نه بتایبه‌ت پشتى سه‌ره‌دانا شاندێن بلندێن دناڤبه‌را هه‌ردوو لایه‌نان دا.
گاڤێن ڤان هه‌ردو سه‌رۆكان بۆ ئاراسته‌یێ چاره‌سه‌ریێ بهێزتركرنا هه‌رێما كوردستانێ گاڤێن پیرۆز و پێدڤى بوون و پێدڤى ب به‌رده‌وامبوونێ هه‌یه بۆ گه‌هشتن ب ئه‌وا خه‌لكێ كوردستانێ دڤێت، وه‌ك ئارامى و سه‌قامگیرى و ڤه‌ژاندنا ئابوورى ل هه‌رێما كوردستانێ.
