دو فەستیڤالێن بەرهەمێن خۆمالی ل ئامێدیێ هاتنە گێڕان
ئامێدیێ، مەحمود نهێلی:
ل دەڤەرداریا ئامێدیێ دو فەستیڤالێن بەرهەمێن خۆمالی هاتنە گێڕان، ئێك: فەستیڤالا ئێكێ یا بەرهەمێن خۆمالی ل دەڤەرا بەرواری بالا ل ناوچەداریا كانی ماسێ، دو: فەستیڤالاسێیێ یا دانیكان ل ناوچەداریا بامەرنێ هاتە گێڕان و تێدا چەندین جۆرێن بەرهەمێن خۆمالی و كارێن دەستی هاتنە نیشادان.
ل ژێر چاڤدێری و ب بەرلاهەڤبوونا د . عەلی تەتەر، پارێزگارێ دهۆكێ و بەرەڤان حەمدی، بەرپرسێ لقێ 18 یێ پارتی و هەژمــــارەكا زۆر ژ بەرپرسێن دام و دەزگەهێن میری و حزبی و جۆتیار و خەلكەكێ زۆرێ دەڤەرێ و پارێزگەها دهۆكێ، ل رۆژێن ٢٥ و ٢٦ و ٢٧/10/2023 فەستیڤالا ئێكێ یا بەرهەمێن خۆمالی ل كۆمـەلگەها بریفكا ل دەڤەرا بـەرواری بــالا ل سنوورێ ناوچەداریا كانی ماسێ هاتە گێڕان.
پارێزگارێ دهۆكێ د پەیڤەكێ دا پشتەڤانیا حوكمەتا هەرێما كوردستانێ و كارگێڕیا پارێـزگەها دهۆكێ بـۆ بـەرهەمێن خۆمالی یێن دەڤـەرێ و تەڤایا سنوورێ پارێزگەها دهۆكێ نیشا دا و گۆت: «ژ بەر كو سێڤا بەرواریا یا ئێكێ یە ل سەر ئاستێ هەموو كوردستانێ و ئیراقێ، لەو بوویە درووشمێ ڤێ فەستیڤالێ، كار بۆ هندێ دهێتە كرن نە ب تنێ بەرهەمێن ڤێ دەڤەرێ بهێنە نیشادان، بەلكو بەرهەمێ دەڤەرێن دەوروبەر ژی بهێنە نیشادان، هەرەسا ببیتە پرەكا گرێدانێ بۆ بەرهەمێن چاندنێ و یێن كەلتۆری د ناڤبەرا باكوور و باشوور دا».
پارێزگارێ دهۆكێ دەستخوەشی ل رێكخەرێن فەستیڤالێ كر و گۆت: «د سەرەدانا جەنابێ سەرۆك بارزانی دا بۆ دەڤەرێ گەلەك دوپاتی ل سەر گرنگیا بابەتێن چاندنێ و گەشتیاری هاتیە كرن، خوەشبەختانە چەندین فەستیڤالێن چاندنێ ل پارێزگەها دهۆكێ هاتینە ئەنجامدان و هەژمارەكا فەستیڤالێن دیتر ژی یێن مایی دێ ل دەڤەرا ئامێدیێ هێنە ئەنجامدان، دیسا د ڤێ فەستیڤالێ دا، زێدەباری چەندین جۆرێن بەرهەمێن خوەمالی یێن دەڤەرێ، وەكو: سێڤێن، هنگڤین، بـرنجێ كوردی، فێقیێ هشككری، پێشانگەهەكا فوتۆگرافی و چەنـدین بەرهەمێن دی یێن خۆمالی یێن دەڤەرێ بۆ بەرهەڤبوویان هاتنە بــەرچاڤكرن».
دیسا ژ لایەكێ دیڤە و ب بەرهەڤبوونا هەژمارەكا بەرپرسێن حزبی و حكومی و خەلكێ پارێزگەها دهۆكێ ب گشتی ل رۆژا ئەینی ٢٧/١٠/٢٠٢٣ فەستیڤالا سێیێ یا دانیكان ل سەنتەرێ ناوچەداریا بامەرنێ هاتە گێڕان، د ڤێ فەستیڤالێ دا زێدەباری كەلاندنا چەندین مەنجەلێن مەزنێن دانیكان و بلاڤكرنا وان ل سەر مێهڤانێن فەستیڤالێ، كەلوپەلێن كەلەپۆری و كارێن دەستی و كوردەواری و بەرهەمێن خۆمالی یێن جۆتیارێن وێ دەڤەرێ هاتنە بەرچاڤكرن.
ل دووڤ ئاخڤتنا رێكخەرێن فەستیڤالێ، ئەڤ فەستیڤالە نموونەكا نوو یا گەشتیاری، رەوشەنبیری و كەلتۆری یا ناوچەداریا بامەرنێ و خەلكێ بامەرنێ ب خوەیە.
