دو كارگه‌هێن نوو یێن ئوكسجینێ گه‌هشتنه دهۆكێ
دهۆك، له‌زگین جوقی:
رێڤه‌به‌رێ نه‌خۆشخانا كۆرۆنایێ ل پارێزگه‌ها دهۆكێ دیار كر، دو كارگه‌هێن نوو یێن ئوكسجینێ گه‌هشتنه پارێزگه‌ها دهۆكێ و دبێژیت: د ده‌مه‌كێ نیزیك دا ئه‌و كارگه‌هه دێ كه‌ڤنه د خزمه‌تا تووشبوویێن كۆرۆنایێ دا.
د. هه‌كار مسته‌فا، رێڤه‌به‌رێ نه‌خۆشخانا كۆرۆنایێ ل پارێزگه‌ها دهۆكێ بۆ رۆژناما ئه‌ڤرۆ گۆت:” ب پشته‌ڤانیا رێكخراوا UNDP دو كارگه‌هێن پشكه‌ڤتنی یێن ئوكسجینێ گه‌هشتنه پارێزگه‌ها دهۆكێ، رێڤه‌به‌ریا گشتی یا ساخله‌میا پارێزگه‌ها دهۆكێ به‌رده‌وام پشته‌ڤانیا دابینكرنا ئامیره و پێدڤیێن نۆشداری بۆ چاره‌سه‌ركرنا تووشبوویێن كۆرۆنایێ دكه‌ت و د نوكه دا ل دهۆكێ باشترین جۆرێ ئوكسجینێ بۆ نه‌خۆشان دهێته بكارئینان، ئه‌و گازنده‌یێن به‌ری نوكه ل سه‌ر قنینێن ئوكسجینێ‌َ ل دهۆكێ دهاتنه كرن نامینن، دیسا چو قنینێن ئوكسجینێ د ناڤ نه‌خۆشخانا كۆرۆنایێ ژی دا نامینن”.
ناڤهاتی گۆتژی: “هه‌ردو كارگه‌ه رۆژانه دشێن 100 قنینێن ئوكسجینێ بۆ تووشبوویێن كۆرۆنایێ به‌رهه‌م بینن، ئه‌ڤه بووینه ئه‌گه‌ر ره‌وشا ئوكسجینێ د ناڤ نه‌خۆشخانا كۆرۆنایێ دا گه‌له‌ك باش ببیت و ئه‌م پێدڤی قنینێن ئوكسجینێ نه‌بین، ژ نوكه و پێڤه چو ئاریشه‌یێن ئوكسجینێ په‌یدا نابن”.
