دو نەخۆشخانە ل شنگالێ دێ هێنە ئاڤاكرن
دهۆك، لەزگین جوقی:
دەڤەردارێ شنگالێ دیار كر، رازیبوون ل سەر ئاڤاكرنا دو نەخۆشخانەیان بۆ دەڤەرداریا شنگالێ هاتیە كرن و دبێژیت: نوكە پڕۆژە د قووناغا تەندەر و راگەهاندنێ دایە و دێ دەستپێ هێتە كرن.
نایف سەیدۆ، دەڤەردارێ شنگالێ ب وەكالەت بۆ رۆژناما ئەڤرۆ گۆت: «دو نەخۆشخانە ل دەمەكێ نێزیك ل شنگالێ دێ هێنە ئاڤاكرن، ئەو ژی دێ نەخۆشخانەكا 100 تەختی بیت ل سەنتەرێ شنگالێ، بۆ ڤێ نەخۆشخانێ گوژمێ 77 ملیار دیناران هاتینە تەرخانكرن، دیسا نەخۆشخانەكا 50 تەختی ل ناوچەداریا سنوونێ ژی دی هێتە ئاڤاكرن و گوژمێ زێدەتر ژ 40 ملیار دیناران بۆ هاتینە تەرخانكرن، ئەرد بۆ ئاڤاكرنا وان هاتیە دەستنیشانكرن و ئەم چاڤەرێینە دەست ب ئاڤاكرنا ڤان نەخۆشخانەیان بهێتە كرن».
گۆتژی: «نوكە پڕۆژەیێ هەردو نەخۆشخانەیان د قووناغا راگەهاندنێ دایە و پشتی بالێندەر وەردگریت دێ دەست ب ئاڤاكرنا هەردو نەخۆشخانەیان هێتە كرن، داكو خزمەتا خەلكێ شنگال بهێتە كرن».
