دو هزار و 500 خانی ل شنگالێ بۆ زڤڕینا ئاوارەیان دهێنە ئاڤاكرن
لەزگین :
جێگرێ پارێزگارێ نەینەوا بۆ كارۆبارێن ئاوارە و پەنابەران دیاركر، حوكمەتا ئیراقێ بریار دایە كەمپێن ئاواران بهێنە دائێخستن، بۆ ڤێ مەبەستێ ژی چەند پێنگاڤ هاتینە هاڤیتن، ژ وانا ژی دانا گوژمێ چوار ملیۆن دیناران بۆ ئاوارە و دابینكرنا پێدڤیێن ناڤمالێ و ئاڤاكرنا دوو هزار و 500 خانیان ل شنگال».
عومەر عەلی، جێگرێ پارێزگارێ نەینەوا بۆ كارۆبارێن ئاوارە و پەنابەران راگەهاند، حوكمەتا ئیراقێ بەرنامە دانایە بۆ گرتنا هەموو كەمپێن ئاواران، هەر ئاوارەكێ بزڤریتە سەر جهـ وخانیێن خۆ دێ چوار ملیۆن دیناران وەرگریت، دگەل هەموو پێدڤیێن ناڤمالێ، هەكە چو كار نەبن دێ كارەك بۆ هێتە دابینكرن، ئانكو دەلیڤێن كاركرنێ بۆ ئاواران دهێنە دابینكرن و دەمێ دزڤرنە شنگال هەكە مۆچی چاڤدێریا جڤاكی نەبیت كەسەكێ هەژار بیت دێ مۆچە بۆ هێتە دابینكرن و دوو هزار و 500 خانی دێ ل شنگال ب هەڤكاریا رێكخراوان دێ هێنە ئاڤاكرن ئەو خێزانێن خانیێن وان هاتینە خرابكرن و جهێ ئاكنجیبوونێ لێ نەبن، دێ دناڤدا هێنە ئاكنجیكرن».
زێدەتر گۆت:» بریار وەسا هاتیەدان كەمپ نەمینن، هەر ئاوارەكێ بڤێت ل كیڤە ئاكنجی بیت یێ ئازادە، ب تنێ بەرنامە ئەوە كەمپێن ئاواران نەمینن و بهێنە گرتن. ل دووڤ بریارا حوكمەتا ئیراقێ كەمپ نامینن و هەتا هەیڤا حەفت ژ ئەڤ سالا چو كەس ب ناڤێ ئاوارە دناڤ ئیراقێ دا نامینن».
عومەر عەلی خۆیا كر، هەتا نوكە 13 هزار مامەلە بۆ وەرگرتنا قەرەبووكرنێ تەمامبووینە و كار یێ ل سەر دهێتە كرن هەموو خەلكێ زیان گەهشتی ل سەر دەستێن تێرۆرستێن داعش بهێنە قەرەبووكرن، ب تنێ ئەم چاڤەرێینە پارە بهێت و خەلكێ زیانڤێكەفتی وەربگرن ل دووڤ رێژا زیانا گەهشتیا وەلاتیان دێ قەرەبووكرنێ وەرگرن».
د ئالیەكێ دێ دا، پیر دەیان جەعفەر، رێڤەبەرێ كۆچ و كۆچبەر و بەرسڤدانا قەیرانان ل پارێزگەها دهۆكێ دیار كر، حوكمەتا ئیراقێ فشارەكا مەزن ل سەر ئاواران دكەت بۆ زڤرینا شنگالێ و رۆژ بۆ رۆژێ هەڤكاریا ئاواران یا كێم دبیت».
رێڤەبەرێ كۆچ و كۆچبەر و بەرسڤدانا قەیرانان ل پارێزگەها دهۆكێ دیاركر، دانا چوار ملیۆن دیناران بۆ زڤرینا ئاواران ئەڤ گوژمێ پارەی گەلەك كێمە، ب كیماسی پێدڤیە حوكمەتا ئیراقێ گوژمەكێ باش یێ پارەی تەرخان بكەت بۆ زڤرینا ئاوارەیان، ژبەركو گەلەك ئاوارە هەنە خانی وێ ل شنگال خراب بوویە و نوكە جهێ ئاكنجیبوونێ نینە ل شنگال».
گوتژی، ئاوارە بۆ زڤرینا سەر جهێن خۆ د ئازادن و هیچ ئاوارەك ب زۆرداری ناهێتە زڤراندن، ئەم دێ بەردەوام هاریكاری و پشتەڤانیا ئاواران كەین هەتا دناڤ كەمپان دا مابن و گۆت: هەتا نوكە پتر ژ 300 هزار ئاوارە دناڤ 20 كەمپێن سنورێ پارێزگەها دهۆكێدا دژین».
پیر دەیان جەعفەر، گۆت:» حوكمەتا هەرێما كوردستانێ نوكە د وارێ دابینكرنا ئاڤ و كارەب و پەروەردە و ساخلەمی و شارەوانیێ هەڤكاریا ئاواران دكەت و دێ هاریكاری و پشتەڤانیا حوكمەتا هەرێما كوردستانێ بۆ ئاواران یا بەردەوام بیت نوكە حوكمەتا ئیراقێ فشارەكا گەلەك مەزن ل سەر ئاواران چێكریە بۆ زڤرینا شنگالێ و خەلك ناڤێن خۆ تۆماردكەن».
