دو هزار و 700 جهێن شوونواری ل دهۆكێ هاتینە تۆماركرن
دهۆك، لەزگین جوقی:
دەمێ دهۆك بەری 56 سالان بوویە پارێزگەهـ، چو گرنگی ب شوونواران ژ لایێ رژێمێن ئیراقێ نەدهاتە دان، پشتی سەرهلدانا سالا 1991ێ دەست ب كارێ هەلكۆلین و ڤەدیتن و پاراستن و نووژەنكرنا شوونوارێن دهۆكێ هاتیە كرن.
د. بێكەس بریفكانی، رێڤەبەرێ شوونوار و كەلەپوورێن پارێزگەها دهۆكێ بۆ ئەڤرۆ خویا كر، ژ ئەنجامێ گرنگیدانا حكومەتا هەرێما كوردستانێ، هەتا نوكە پتر ژ دو هزار و 700 شوونوار و جهێن شوونواری ل پارێزگەها دهۆكێ هاتینە تۆماركرن و گۆت: «دەمێ دهۆك بەری 56 سالان بوویە پارێزگەهـ، حكومەتا دكتاتۆرا ئیراقێ چو گرنگی ب شوونواران نەددا، لێ پشتی سەرهلدانا سالا 1991ێ دەست ب گرنگیدان و پاراستنا شوونواران هاتیە كرن و پشتی سالا 2003ێ پتر دەرفەت بۆ رێكخراوێن بیانی چێبوویە، كو قەستا هەرێما كوردستانێ بكەن ل سەر نووژەنكرن و ڤەدیتن و هەلكۆلین و پاراستنا شوونواران و كەلەپوورێن دهۆكێ كار بكەن، چەندین زانكۆ و تیمێن بیانی و ڕێكخراو ب هەڤكاری و پشتەڤانیا حكومەتا هەرێما كوردستانێ كار دكەن».
گۆتژی: «هەتا نوكە كارەكێ مەزن ل سەر شوونوارێن دهۆكێ هاتیە كرن و بەردەوام كار ل سەر ڤەدیتن و هەلكۆلین و پاراستن و نووژەنكرنا شوونواران دهێتە كرن».
