دو هزار پارچەیێن ئەردی ل دهۆكێ دێ هێنە بەلاڤكرن
سندس سالح سلێڤانەیی:
ئەندازیار دیار بەحری، ڕێڤەبەرێ گشتی یێ باژێرڤانیان ل پارێرگەها دهۆكێ دیاركر كو دو هزار پارچەیێن ئەردی ل دهۆكێ هاتینە بەرهەڤكرن و د ڤان دو یان سێ ڕۆژان دا ل سەر فەرمانبەر و پێشمەرگەیان دێ هێنە بەلاڤكرن.
ناڤهاتی گۆت: «هەر وەكی بەری چەند مەهان مە ڕاگەهاندی، كو د ئەڤ سالە دا دێ پرۆسەیا بەرهەڤكرنا پارچەیێن ئەردی بلەزتر ب رێڤەچیت، لەورا نوكە دو هزار پارچە هاتینە بەرهەڤكرن و لیستەیێن ناڤان هاتینە ئامادەكارن و ڕێكارێن بەلاڤكرنێ ب دووماهی هاتینە، هەكە دو ڕۆژێن بهێن نەبوونە بێنڤەدان دێ بەلاڤكەین، لێ هەكە ژ بەر جەژنێ بوو بێنڤەدان، بەلاڤكرنا وان دێ چیتە پشتی جەژنێ».
گۆت ژی: «تیمێن باژێرڤانیێ ب هەڤكاری ل گەل لایەنێن پەیوەندیدار ل سەر بەرهەڤكرنا پارچەیێن ئەردی د بەردەوامن و پشتی ڤێ گەڕێن كو گەڕا پێنجێ یا بەلاڤكرنا پارچەیێن عەردی یە، دێ بەرهەڤیان بۆ گەڕا شەشێ كەین و ل دووڤ راسپاڕدەیێن سەرۆكایەتیا حكومەتا هەرێما كوردستانێ و كارگێڕیا پارێزگەها دهۆكێ دێ ل سەر پرۆسەیا بەلاڤكرنێ د بەردەوامبین هەتا هەموو پێشمەرگە و فەرمانبەرێن دهۆكێ پارچەیێن ئەردی وەردگرن».
