دو هەلبەست
موئەیەد تەیب
دو باسک و کوریەک
تە دو باسک هەنە و کوریەک!
ئەسمانی ژی
نە سنۆر هەنە،
نە دەر و دیوار پێڤەنە.
تە دڤێت بالندەیەکێ ئازاد بە و
بلند بفڕە!
تە دڤێت ژی خشۆکەک بە
ل ناڤ بیابانێ
کوریا خۆ د دویڤ خۆ ڕا بخشینە و
د چالەکێ دا بمرە!
ب تە و بێ تە
ئەسمان هەر ئەسمانە.
ب تە و بێ تە
بیابان ژی هەر بیابانە.
تو هەمی
چ ڕێ نینن
ئەگەر تو ڕێڤینگ نەبی.
چ ئەسمان نینن
ئەگەر تو ستێر نەبی.
چ چەم و دەریا نینن.
ئەگەر تو گەمی نەبی.
چ مرۆڤ ژی نینن
ئەگەر تو هەمی نەبی!
