دو پارتێن مەزن یێن تورکیا چاڤەرێی هەلوەستێ دووماهیێ یێ کوردانن
تورکیا بەر ب هەلبژارتنێن باژێرڤانیان ڤە دچیت، ئاکپارتی و پارتا کۆماری چاڤەرێی هەلوەستێ دووماهیێ یێ کوردانن کا دێ ل باژێرێن مەزن یێن تورکیا دەنگێ خوە دەنە کێ، لێ پارتا دەم ژی دڤێت ڤێجارێ ل گەل پارتێن دی یێن کوردی هەڤپەیمانیەکێ ئاڤا بکەت و وەسا پشکداریێ د هەلبژارتنان دا بکەت.
تونجەل باکرخان هەڤسەرۆکێ پارتا دەم د داخۆیانیەکێ دا راگەهاند، وان نەڤێت وەکو هەلبژارتنێن بۆری ل باژێرێ مەزن یێن تورکیا پشتەڤانیێ ل بەربژارێن پارتەکا سیاسی یا تورکیا بکەن، بەلکو ڤێجارێ وان دڤێت ل گەل پارتێن دی یێن کوردی ل تورکیا هەڤپەیمانیەکێ ئاڤا بکەن و وەسا پشکداریێ د هەلبژارتنان دا بکەن، چونکی ڤێجارێ وان نەڤێت ل باژێرێن مەزن یێن تورکیا دەنگێ خوە بدەنە پارتا کۆماری، چونکی دەنگدەرێن کورد ژ سیاسەتا بەری نها یا هەدەپێ رازی نەبوون و ڤێجارێ وان نەڤێت شاشیێن بەری نها دوبارە بکەن.
ناڤهاتی ئەو یەک ژی دیار کر، ل باژێرێن مەزن یێن تورکیا ب تایبەتی ژی ل ئەنقەرە و ئستەنبولێ رێژەیەکا مەزن دەنگدەرێن کورد هەنە، د هەلبژارتنێن هەری دووماهیێ یێ باژێرڤانیان دا ب دەنگێ کوردان هەر دو سەرۆکێن باژێرڤانیێ هاتنە هەلبژارتن، ژ بەر ڤێ یەکێ ژی نها هەر دو پارتێن مەزن یێن تورکیا ئانکۆ ئاکپارتی و پارتا کۆماری چاڤەرێی هندێ نە دا بزانن کا دی کورد دەنگێ خوە دەنە کێ و گۆت: (مە دڤێت وەکو پارتا دەم ڤێجارێ ل گەل هەموو پارتێن دی یێن کوردی هەڤپەیمانیەکێ ئاڤا بکەین و وەسا پشکداریێ د هەلبژارتنان دا بکەین، ئەم دێ ل گەل هەموو پارتێن دی یێن کوردی دەست ب هەڤدیتنان کەین و مە دڤێت ڤێجارێ کورد پێگەهەکێ خوە یێ بهێز ل تورکیا هەبیت، ئەو یەک بۆ هەموو وەلاتیێن کورد ژی گەلەک گرنگە).
ل ئالیێ دی ئاکپارتی ب هەموو رەنگەکێ کار دکەت دا ڤێجارێ بشێت هەر دو سەرۆکێن باژێرڤانیێن مەزن یێن تورکیا، ئانکۆ ئستەنبول و ئەنقەرە ژ دەستێ پارتا کۆماری دەرخینیت و دەست ب خەباتەکا مەزن ژی کریە، ژ بەر ڤێ یەکێ ژی بۆ ئاکپارتیێ گەلەک یا گرنگە کورد د ڤان هەلبژارتنان دا وەکو هەلبژارتنێن بۆری دەنگێ خوە نەدەنە بەربژارێن پارتا کۆماری.
چاڤدێرێن سیاسی ژی دیار دکەن، سیاسەتا ڤێجارێ یا پارتا دەم گەلەک باشە، لێ ژ بەر کو ل هەر دو باژێرێن مەزن یێن تورکیا ئانکۆ ل ئستەنبول و ئەنقەرە پارتا دەم نەشێت سەرۆکاتیا باژێرێن مەزن بدەستڤە بینیت، ژ بەر ڤێ یەکێ ژی گەلەک گرنگە ل باژێرێن مەزن یێن تورکیا پارتا دەم سیاسەتەکا خوە یا تایبەت هەبیت و پێشوەخت رێککەفتنەکێ ل گەل ئاکپارتیێ یان ژی پارتا کۆماری بکەت و وەسا پشتەڤانیێ ل بەربژارێن وان بکەت، لێ ژ بەر کو نها ئاکپارتی و پارتا بزاڤا نەتەوەپەرست هەڤپەیمانن گەلەک یا زەحمەتە ئاکپارتی خوە نێزیکی پارتا دەم بکەت.
