دو پاركێن مەزن ل دهۆكێ دهێنە چێكرن و نێزیكی 700 دۆنەمان دێ بنە كەسكاتی
سندس سالح سلێڤانەیی:
دەمەكە سەرۆكاتیا باژێرڤانیا دهۆكێ مژوولی چێكرنا دو پاركێن مەزن یێن گشتی یە، ئێك ل رۆژهەلاتێ باژێری یا دی ل رۆژئاڤایێ باژێری یە و بەرپرسێ هۆبا راگەهاندنێ ل سەرۆكاتیا باژێرڤانیێ دبێژیت: پشتی ئەو پارك ب دووماهی دهێن دێ رێژەیا كەسكاتی ل سەنتەرێ باژێری زێدەتر لێ هێت.
ئیسماعیل مستەفا، بەرپرسێ هۆبا راگەهاندنێ ل سەرۆكاتیا باژێرڤانیا دهۆكێ ل دۆر وان پاركان بۆ رۆژنامەیا ئەڤرۆ گۆت: د بەردەوامیا پرۆژە و چالاكیێن سەرۆكاتیا باژێرڤانیا دهۆكێ دا، نوكە كار د چێكرنا دو پاركان دا یێ بەردەوامە، یا ئێكێ دكەڤیتە ئالۆكا و رۆبەرێ وێ (660) دونەمن و ئەڤە مەزنترین پاركە ل سنۆرێ پارێزگەها دهۆكێ، یا دویێ ژی پاركا سەرهلدانە رۆبەرێ وێ ( 46) دونەمن، كار ل سەر هەردو پاركان یێ بەردەوامە و پشتی ب دووماهی دهێت دێ رێژەیا كەسكاتیێ ل ناڤ باژێری زێدەتر لێ هێت و بۆ سالێن بهێن پتر پرۆژە دڕێ دا هەنە و ئەڤە هەموو ژبۆ وێ چەندێ نە كو ژینگەها باژێرێ دهۆكێ جوانتر و پاقژتر لێ بهێت و ئەڤە چەندە دێ بیتە دەرگەهەك كو پتر گەشتیار سەرەدانا باژێرێ مە بكەن.
هەروەسا گۆت: د سالێن بۆری دا ( 143) باغچە و پارك ل دهۆكێ هاتینە چێكرن كو هندەك ژوان ژلایێ كەرتێ تایبەت ڤە بووینە و نوكە دەمێ موولەتا ئاڤاكرنێ بۆ هەر پرۆژەیەكێ ئاكنجیبوونێ یان خانیەكی دهێتە دان داخواز ژ خودانێن وان دهێتە كرن كو چەند دارەكان بچینن دا رێژەیا كەسكاتیێ زێدەتر لێ بهێت و ئەڤ چەندە بوویە مەرج.
ل دووماهیێ ئیسماعیل مستەفا، بەرپرسێ هۆبا راگەهاندنێ ل سەرۆكاتیا باژێرڤانیا دهۆكێ، گۆت: پاقژ راگرتنا ژینگەهێ نە بەس ئەركێ باژێرڤانیێ یە، بەلكو پێدڤیە خەلكەك ژی یێ هاریكار بیت و ل دەمێ چێكرنا هەر پرۆژەیەكێ ئاڤاكرنێ هندەك داران بچینیت.
