دو یاریزانێن زاخۆ بۆ قارەمانییا رۆژئاڤا ئاسیا هاتنە داخوازكرن
رێكخەرێ راگەهاندنێ ل فیدراسیۆنا باسكێت بۆلا ئیراقێ دیار كر ل دووڤ داخوازا راهێنەرێ هەلبژارتیێ لاوێن ئیراق یێ تونسی ماهر خنفیر 16 یاریزان بۆ ناڤ رێزێن تیمێ داخوازكرینە خوە بەرهەڤكرن بۆ هەڤڕكیێن قارەمانییا رۆژئاڤا ئاسیا ئەوا دهێتە چاڤەڕێ كرن ل ناڤەڕاستا مەها تەمووزا بهێت پایتەختێ ئیراقێ بەغدا مێڤاندارییا وێ بكەت.
عەهد فالح بۆ دەزگەهێن راگەهاندنێ گۆت: ئەو 18 یاریزانێن هاتینە داخوازكرن دێ ل شەشێ مەها بهێت كەڤنە د كەمپەكێ راهێنانێ دا ل هۆلا گرتییا شەعب ل بەغدا ژبۆ زانینا ئاست و هێز و خالا كێماسیێ یا جەستەیی و شیانێن وان و هەمی یاریزان دێ دناڤ لیستەیا هەلبژارتیێ ئیراقێ دابن هەتا دگەنە لیستەیا دووماهیێ یا بەرهەڤی بۆ قارەمانیێ ئەوا بڕیارە ل 10ێ مەها تەمووزا بهێت ل بەغدا ب پشكدارییا هەشت هەلبژارتییان بهێتە ئەنجامدان.
ناڤهاتی دیاركر ئەو یاریزانێن پشكدار بڤی شێوەی نە دو یاریزانێن یانەیا زاخۆ ئەو ژی زنار هشیار و سالح فارس، دیسان كیانۆش سەربەست ژ دەبەندیخان، عەلی عەلا ژ حللە، نور ئەدهەم، محەمەد سەیفددین و ئەیسەر عومەر ژ دیجلە ئەلجامعە، محەمەد سەباح ژ نەفت، سامر تەغەلب ژ غاز ئەلشیمال، حسین عەلی، عەبدوللا مورتەزا وعەبدوللا نوری ژ حەشد ئەلشەعبی، عەباس محەمەد، محەمەد تالب و حەمزە حەمۆد ژ كارەبا، هەرسێ یاریزانێن ڕەڤەند، ئەندرێ جەلال ل ئەمریكا، بەدرەدین هیلال ژ ئوردن و جاسم سەعدۆن ل سویسرا.
ل دووڤ ژێدەرێن نێزیك ژ هەلبژارتیێ ئیراقێ راهێنەرێ تونسی ماهر خنفیر پشت گەرمییا خوە ب چەند یاریزانان كرییە بێ تاقیكرنێن راهێنانێ ژوانا یێن یانەیا زاخۆ زنار هشیار و سالح فارس كو جهێ وان د ناڤ رێزێن هەلبژارتیێ ئیراقێ دا پاراستییە.
