دو یاریزانێن كورد بەر ب سعۆدیێ چوون
قەیس وەیس:
دوهی هەلبژارتیێ لاوێن ئیراقێ یێ فوتبۆلێ بەر ب وەلاتێ سعۆدیێ ب ڕێكەڤتن ژبۆ پشكداریێ د قارەمانییا رۆژئاڤا ئاسیا ئەوا بڕیارە هەڤڕكیێن وێ ل25ێ هەتا دووماهییا ڤێ مەهێ ل باژێرێ ئەلتاییف بهێنە كرن.
ل دووڤ لیستەیا دووماهیێ یا یاریزانێن هاتینە داخوازكرن هەر ئێك ژ یاریزانێ گەنج و خەلكێ باژێرێ دهۆكێ و ستێرێ تیما لاوێن یانەیا زاخۆ سیداد حەجی باجلۆری و هەلگورد قەیس یاریزانێ یانەیا هەولێر دگەل هەلبژارتیێ لاوێن ئیراقێ هاتینە جێگێركرن وەكو یاریزانێن سەرەكی د ناڤ رێزێن تیمێ دا.
د داخویانیەكا رۆژنامەڤانی دا حەیدەر جەبار راهێنەرێ هەلبژارتیێ لاوێن ئیراقێ دیار كر دوهی هەلبژارتیێ وان ئێكەم یەكا خوە یا راهێنانێ ل باژێرێ ئەلتاییف ئەنجامدایە و ئەو یاریزانێن هاتینە ژێگرتن باشترین كۆما ئەوان یاریزانانە ئەوێن د یاریێن هەڤالینی و كەمپێ راهێنانێ دا پشكداربووین و گۆت: مە باوەری یا هەیی دێ ئەنجامدەكێ سەرفەراز د قارەمانیێ دا ئینن سەرباری ئارمانجا مە قارەمانیا ئاسیا یە.
بۆ زانین سیداد حەجی نوری ژ دایكبوویێ 2005ێ ل باژێرێ دهۆكێ یاریزانێ لاوێن یانەیا زاخۆ یە یاریێ د هێلا ناڤین دا دكەت، بەری نوكە یاری بۆ ئەكادیمییا دالكۆرد، یانەیا دهۆك، گارە و نوكە زاخۆ، ل سالا بۆری دگەل هەلبژارتیێ لاوێن ئیراقێ چار یاری كرینە دو دگەل ئیمارات گۆلەك كرییە و دو یاری دگەل هەلبژارتیێ سوریێ بووینە و دووماهی یارییا خوە دگەل عومانێ شیا گۆلەكێ تۆماربكەت.
