دو یاریزانێن پارێزگەهێ میدالییا زیڤی یا عەرەبی ب دەستڤە ئینا
ب پشكدارییا هەردو یاریزانێن پارێزگەها دهۆكێ وەهبی سلێمان و سەربەست عەبدوللا، هەلبژارتیێ ئیراقێ ل سەر ئاستێ پێشكەڤتیان میدالییا زیڤی یا عەرەبی ب دەستڤە ئینان، پشتی شیایین بۆ بەریكانەیا 145كم ڕێزا دویێ بهێن، ئەوا هەلبژارتیێ ئیمارات ڕێزا ئێكێ هاتی و هەلبژارتیێ ئوردن ڕێزا سێیێ هاتی، د هەڤڕكیێن قارەمانییا عەرەبی یا پایسكلان دا ئەوا دوهی ب فەرمی ل باژێرێ سلێمانیێ ب دووماهی هاتی.
وەهبی سلێمان یاریزانێ پارێزگەهێ و سەركەڤتیێ قارەمانیێ بۆ رۆژنامەیا ئەڤرۆ گۆت: پێخوەشحالم ب هەڤكارییا هەڤالێن خوە یێن هەلبژارتیێ ئیراقێ شیاین دەستكەڤتەكێ ژ هەژی بۆ ئیراقێ و یێ كەسۆكی ب دەستڤە بینن و ئەڤە دەستكەڤتە، ئەڤە ژی ڤەڕێژەیا زەحمەتا چەندین سالانە و شیان بو جارا ئێكی ل سەر درێژترین بەریكانە كو 145 كم دەرباز بكەین، پیرۆزبیت ل هەموو هەڤالێن من، پێنەڤێت كەیفخوەشین كو دناڤا ڕێزێن هەلبژارتیێ ئیراقێ دا پێنچ یاریزانێن پارێزگەها دهۆكێ دگەل ڕاهێنەرێ مە یێ خودان شیان تارق سەعید ڕاهێنەرێ یانەیا دهۆك و هەلبژارتیێ ئۆلمپیێ ئیراقێ.
هەروەسان ناڤهاتی گۆت: هەڤڕكیێن ڤێ قارەمانیێ ئێك ژ ب هێزترین بەریكانەیان بوو كو ل سەر ئاستێ ئاسیا یاریزانێن قارەمان دناڤ دا هەبوون تایبەت یێن، ئیماراتی، ئوردنی و قەتەری، ل دیدارا پێشتر دا مە گۆت بوو دێ بزاڤا كەین هەتا دووماهی چركە نا ڕاوەستیین شەڕی بۆ ڕێزێن پێشیێ كەین، پێخوەشحالین ئەم گەهشیتنە ئارمانج و هیڤییا خوە.
بۆ زانین ل سەر ئاستێ هەلبژارتیێ لاوان ژ یانەیا دهۆكێ، ئاڤەند هشیار فەریق، یوسڤ جیهاد و عیسا عەلی، دو یاریزانێن دی خەلكێ پارێزگەهێ نە و یاریێ بۆ یانەیێن دەرڤەیی پارێزگەهێ دكەن ئەو ژی وەهبی سلیمان ژ یانەیا سیناعە یا بەغدایی بۆ ئۆلمپیێ ئیراقێ و سەربەست عەبدوللا ژ یانەیا كۆیە یا هەولێری بۆ ئاستێ پێشكەڤتیان دێ پشكداربن.
