دو یانەیێن كوردستانی نوونەرێن ئیراقێ نە د قارەمانیا عەرەبی دا
قەیس وەیس:
ب فەرمی هەردو یانەیێن ئەكاد ژ هەولێرا پایتەخت و غازا باكۆر ژ كەركووكا كوردستانێ نوونەراتییا وەلاتێ ئیراقێ د دو قارەنانیێن جودا یێن عەرەبی دا كەن.
تیما ڤۆلی بۆلا یانەیا ئەكاد عەنكاوە ژ هەولێرا پایتەخت دێ پشكداریێ د قارەمانییا عەرەبی یا چاپا هەشتێ دا ل سەر ئاستێ كچان دا كەن، ئەوا بڕیارە ئەڤرۆ ل باژێرێ شاریقە ل وەلاتێ ئیماراتێ دەست ب هەڤڕكیێن خوە بكەن.
ژلایێ خوەڤە تیما باسكێت بۆلا یانەیا غازا باكۆر ژ كەركووكا دلێ كوردستانێ پشكداریێ د قارەمانییا عەرەبی دا دا بكەن كو بڕیارە ل هەمان باژێر و وەلات هەر ئەڤرۆ بهێنە كرن و ئێكەم یارییا وێ بەرانبەر یانەیا ئەلحالە یا بەحرێنی بكەت.
ل دۆر ڤێ قارەمانیێ ڕزگار رەئۆف راهێنەرێ یانەیا غازا باكۆر گۆت: پێخوەشحالم بۆ سالا پێنجێ یە دگەل یانەیا خوە و ناسناڤان ب دەستڤە دئینن، ل سەر ژیێن جودا هەموو قارەمانیێن ئیراقێ بدەستڤەئیناینە، چار قارەمانیێن پێشتر یێن نێڤدەولەتی مە پشكداری كرینە و دەستكەڤت و سەركەڤتنێن باش هەبووینە، ب هیڤی نە د ڤێ قارەمانیێ دا بەردەوامبیێ بدەینە دەستكەڤتان.
هەژی گۆتنێ یە دەستنیشانكرنا هەردو یانەیێن كوردستانی هاتن، پشتی تیما ئەكاد ئەنكاوە شیایی ل وەرزێ بۆری ڕێزا دویێ ل سەر ئاستێ قارەمانییا ئیراقێ بۆ پێشكەڤتیان بهێت ئەوا یانەیا سەنحاریب بوویە قارەمان، ژلایێ خوەڤە یانەیا غاز ل سەر ئاستێ تازەپێگەهشتییان بوو قارەمانا ئیراقێ یا یارییا باسكێت بۆلێ
