دچیتە مالا زاڤایێ خوە و ساتۆڕه‌كێ لێ ددەت
ئه‌ڤرۆ نيوز:
پارێزەرەکێ دادگەھا دھۆکێ راگەھاند کو کەسەک ب شەڤ دچیتە مالا زاڤایێ خوە بۆ مەرەما چارەسەریا ئاریشەکێ کو دناڤبەرا خووشکا وی و ھەڤژینێ وێ دا روودا بوو و گۆت: د کێش و ڤەکێشا ئاخفتنێ دا دناڤبەرا برایێ ژنکێ و زاڤایێ ویدا، شەرەدەڤ پەیدا بوو برایێ ژنکێ پەنایێ دبەتە بەر توندوتیژیێ و کێرەکێ ژ بەریکا خوە دئینتە دەر و ل ناڤ ملێن زاڤایێ خوە ددەت.
پارێزەر موسا محەمەد عەلی ل دادگەھا دھۆکێ بۆ ئەڤرۆ دیار کر کو کەسەک ب شەڤ دچیتە مالا زاڤایێ خوە ل دەوروبەرێن سێمێلێ بۆ مەرەما چارەسەریا ئاریشەکێ کو دناڤبەرا خووشکا وی و ھەڤژینێ وێ دا روودا بوو و گۆت: ئەو ماوەکێ درێژ بوو ناکوکیێن خێزانی ھەبوون و برایێ ژنکێ ژی دڤیا لایەنێ خێرێ بیت و جارەکا دی دناڤبەرا وان ھەردو ھەڤژینان خوش ببیت و ھێلینا وان خراب نەبیت.
پارێزەری گۆتژی: د کێش و ڤەکێشا ئاخفتنێ دا دناڤبەرا برایێ ژنکێ و زاڤایێ وی دا، شەرەدەڤەک پەیدا بوو، برایێ ژنکێ پەنایێ دبەتە بەر توندوتیژیێ و کێرەکێ ژ بەریکا خوە دئینتە دەر و ل ناڤ ملێن زاڤایێ خوە دەت، نێزیکی حەفت سانتیمەتران کێر د لەشێ زاڤایێ وی دا دچیتە خوار، زاڤایێ وی ھەر ئێکسەر ژ مالا خوە دەردکەڤیت و سکالایێ ل سەر خزمێ خوە تومار دکەت ل نێزیکترین بنگەھێ پولیسان ل سێمێلێ.
پارێزەری ئاشکرا ژی کر کو پشتی ڤەکۆلین ل دادگەھا سێمێلێ ب رێڤە چوویی دادوەری بریارا ڤەگوھاستنا سکالایێ دا بۆ دادگەھا تاوانان ل دھۆکێ، دادوەرێ دادگەھا تاوانان ناڤەروکا سکالایێ خویار کر و گۆت: ل دووڤ ماددێ قانوونی 405 یا سزایان ژ 30 و 47 و 48 و 49، داواکارێ گشتی ژی پەیڤا خوە خواند و پارێزەرێ تاوانباری ژی بەرەڤانی ژێ کر و داخواز ژ دادگەھێ کر ماددێ قانوونی ب گۆھوریت، چۆنکی ئەو ماددە ل سەر کریارا وی ناھێتە چەسپاندن، ئانکو مەرەما وی کوشتنا زاڤایێ وی نەبوو، بەلکو ب تنێ چوو مالا وان دا خووشکا خوە و ھەڤژینێ وێ پێک بینیت.
پارێزەر موسا محەمەد زێدەتر گۆت: پشتی دادوەری گوھداریا پارێزەرێ تاوانباری کری ماددێ قانوونی د گۆھوریت و تاوانباری بۆ ماوێ سێ ھەیڤان حوکم دکەت.
