دڤێت ئاشێن چێكرنا تەحینێ مۆلەتێن كاری هەبن
ئامێدیێ، مەحمود نهێلی:
بەرپرسێ لژنا ئابووری و رێڤەبەرێ چاڤدێریا بازرگانی ل ئامێدیێ بۆ رۆژناما ئەڤرۆ دیار كر، پێدڤیە هەموو ئاشێن چێكرنا تەحینێ ل دەڤەرا وان مۆلەتێن كاری دروست بكەن، داكو كارێ وان یێ یاسایی بیت.
كاروان حاجی، سەرۆكێ لژنا ئابووری و رێڤەبەرێ چاڤدێرییا بازرگانی ل ئامێدیێ دیار ژی كر، ئەوان بۆ ڤێ مەرەمێ سەرەدانا پڕانیا ئاش و كارگەهێن چێكرنا تەحینێ كریە و خودانێن وان هاتینە ئاگەهداركرن، پێدڤیە هەموو خودانێن ئاشان یێن هەتا نوكە مۆلەت نەچێكری یان ژی یێن مۆلەت ب سەرڤەچووی، مۆلەتێن كاری چێكەن و نوو بكەنە ڤە و گۆت: «هەژمارەكا ڤان ئاشان نوكە مۆلەتا كاری هەیە بەلێ چێدبیت ب سەرڤەچووبیت، ژ بەر وێ یەكێ، دڤێت سەرەدانا جهێن پەیوەندیدار بكەن بۆ برێڤەبرنا كاروبارێن خوە ل دووڤ رێنمایان».
گۆتژی: «زێدەباری مۆلەتا كاری، پێدڤیە مۆلەتا ساخلەمیێ ژی دروست بكەن و ئەڤ كارمەندێن كارێ چێكرنا تەحینێ دكەن، دڤێت كەسانێن ساخلەم بن، دیسا جهێ ئاشی و ئەو ئامیرە و كەرەستەیێن بكار دئینن، دڤێت یێن دپاقژ و ساخلەم بن».
