دڤێت ئاگربه‌ستا د ناڤبه‌را ئسرائیلێ و حه‌ماسێ دا بهێتە درێژ کرن
هەر دو سەرۆک کۆمارێن ئیرانێ و تورکیا دیار دکەن، ئاگربەستا نها یا د ناڤبەرا ئسرائیلێ و حەماسێ دا هاتیە راگەهاندن پێنگاڤەک گەلەک باشە، لێ دڤێت ئاگربەستا بەروەخت بۆ ئاگربەستەکا بەردەوام بهێتە گوهۆرین و کار بۆ ڤێ یەکێ ژی بهێتە کرن هەموو گرتیێن هەی بهێنە ئازادکرن و شەڕ ژی ب تەمامی ب دووماهی بهێت.
ره‌جه‌ب ته‌یب ئه‌ردۆغانێ سه‌رۆک کۆمارێ تورکیا و ئیبراهیم ره‌ئیسی سه‌رۆک کۆمارێ ئیرانێ د په‌یوه‌ندیه‌کا تەلەفۆنی دا سەبارەت ب رەوشا نها ل غەزە، ئاگربەستا د ناڤبەرا ئسرائیلێ و حەماسێ دا و بابەتێ ئازادکرنا گرتیان ئاخڤین.
دەزگەهێن راگەهاندنا تورکیا دیار کرن، سه‌رۆک کۆمارێن تورکیا و ئیرانێ راگه‌هاندن ئاگربه‌ستا کو د ناڤبه‌را ئسرائیلێ و حه‌ماسێ دا هاتیه راگه‌هاندن ئه‌رێنیە و داخواز ژ هه‌ر دو ئالیان کرن کو بلا ئاگربەستا نها یا بەروەخت ببیتە ئاگربەستا بەردەوام و شەر ب تەمامی بهێتە راگرتن. هه‌ر دو سه‌رۆک کۆمارێن ئیرانێ و تورکیا ئەو یەک ژی ئاشکرا کرن کو چاره‌سەریا گونجای بۆ پرسا فه‌له‌ستینێ، راگه‌هاندنا دو ده‌وله‌تێن سه‌ربخوه یه و ژ بۆ ڤێ یه‌کێ ژی پێدڤی ب دیالۆگێ و چارەسەر‌یه‌کا سیاسی هه‌یه.
د پشکه‌کا دی یا په‌یوه‌ندیا ته‌له‌فۆنی دا ژی ره‌ئیسی و ئه‌ردۆغانی راگه‌هاندن کو دڤێت وه‌لاتێن ئیسلامی بۆ راگرتنا ئێرشێن ئسرائیلێ و په‌یداکرنا چارەسەر‌یه‌کا سیاسی پێکڤه کار بکه‌ن. هەر دو سەرۆک کۆمارێن ئیرانێ و تورکیا ره‌خنه ل حوکمەتا ئسرائیلێ ژی گرتن و داخواز ژ بەرپرسێن ئسرائیلێ ژی کرن کو ده‌ست ژ ئێرشێن بۆ سه‌ر وه‌لاتیێن سڤیل به‌رده‌ت، رێزێ ل مافێن مرۆڤی بگریت، چونکی ژ بەر ئێرشێن بەردەوام یێن ئسرائیلێ هەتا نها چەند هزار وەلاتیێن سڤیل ل غەزە بووینە قوربانی.
د دووماهیا په‌یوه‌ندیا ته‌له‌فۆنی دا سه‌رۆک کۆمارێن تورکیا و ئیرانێ راگه‌هاندن کو دێ ل تورکیا کۆمبوونه‌کا تایبەت د ناڤبه‌را شاندێن تورکیا و ئیرانێ دا هێته سازکرن و هەر دو وەلات دێ دەست ب بزاڤەکا نوو کەن دا پرسا فەلەستینێ ب تەمامی بهێتە چارەسەرکرن.
چاڤدێرێن سیاسی ژی دیار دکەن، هەر دو وەلاتێن ئیران و تورکیا بابەتێ فەلەستینێ ل دژی ئسرائیلێ بۆ بەرژەوەندیێن خوە بکار دئینن، هەر دو وەلات ژی ب سالانە سیاسەتەکا وەسا برێڤە دبەن، وەلاتێن عەرەبی ب تایبەتی ژی عەرەبستانا سعوودیێ و مسر ژ سیاسەتا هەر دو وەلاتێن ئیران و تورکیا یا سەبارەت ب فەلەستینێ دلگرانن، چونکی ئەو وەسا دبینن هەر دو وەلات ژ بەر بەرژەوەندیێن خوە ناهێلن ئالۆزیێن هەی ب دووماهی بهێن، ژ بەر ڤێ یەکێ ژی هەتا نها سەبارەت ب پرسا فەلەستینێ و چاوانیا چارەسەرکرنا قەیرانا وی وەلاتی د ناڤبەرا وەلاتێن عەرەبی و تورکیا و ئیرانێ دا هەماهەنگی نینە.
ل گۆر باوەریا چاڤدێرێن سیاسی بەری ئێرشا ڤێ دووماهیێ یا حەماسێ رێککەفتنەکا دیرۆکی د ناڤبەرا هندەک ژ وەلاتێن عەرەبی ل گەل ئسرائیلێ هەبوو، ب تایبەتی ژی عەرەبستانا سعوودیێ دخواست ب رێیا رێککەفتنەکا دیرۆکی ل گەل ئسرائیلێ رۆژهەلاتا ناڤین بەر ب قۆناغەکا نوو یا ئارامیێ ڤە ببەن، لێ ئەو یەک د بەرژەوەندیا هەر دو وەلاتێن ئیران و تورکیا دا نەبوو، ئێرشا حەماسێ بۆ ئەگەرێ ئالۆزیێن نوو ل دەڤەرێ، لێ وەلاتێن عەرەبی هەتا نها ژی شەرێ هەی وەکو شەرەک د ناڤبەرا ئسرائیلێ و حەماسێ دا دبینن و ناخوازن وەکو شەرێ فەلەستینیان و ئسرائیلێ بهێتە دیتن، چونکی ئەو دزانن حەماسێ دڤێت بابەتێ پرسا فەلەستینان ب رەنگەکێ دی ل گۆر بەرژەوەندیا خوە بکار بینیت، ژ بەر هندێ ژی هەر پشتی شەری سەرۆکێ دەستهەلاتا فەلەستینێ مەحمود عەباسی راگەهاند کو حەماس نوونەراتیا گەلێ فەلەستینێ ناکەت.
ل ئالیێ دی دوهی نەبین ئەبو رەدینە پەیڤدارێ سەرۆکاتیا فەلەستینێ ژی راگەهاند وەزیرێ بەرگریێ یێ ئسرائیلێ داخواز کریە د بۆدجەیا سالا نوو دا پارەکێ زێدە بۆ وەزارەتا بەرگریێ بهێتە تەرخانکرن، ئەو یەک ژی نیشا ددەت هێزێن توندرەو ل ئسرائیلێ کار بۆ داگیرکرنا ئاخا فەلەستینێ دکەن، ژ بەر ڤێ یەکێ ژی دڤێت ئەمریکا و وەلاتێن دی یێن جیهانێ ل هەمبەر بزاڤێن ئسرائیلێ یێن بۆ داگیرکرنا ئاخا فەلەستینێ بێدەنگ نەمینن، چونکی ئەو یەک دێ بیتە ئەگەرێ روودانا ئالۆزیێن نوو ل دەڤەرێ.
