دڤێت ئۆکرانیا د دەمەکێ دیارکری دا رۆسیا ژ ئاخا خوە دەرئێخیت
ب، سه‌رجان مەحمود:
مارک میلی سه‌رۆک ئه‌رکانێ لەشکرێ ئه‌مریکا د داخۆیانیه‌کی دا بۆ ئاژانسا BBC راگه‌هاند، کو ئۆکرانیا هه‌تا نها نه‌شیایه وه‌ک پێدڤی ئێرشی هێزێن رۆسیا بکەت و ئاخا خوە ژ دەستێ لەشکرێ رۆسیا رزگار بکەت و گۆت: (مه وه‌سا چاڤه‌رێ دکر کو ئۆکرانیا د هاڤینا ئەڤسالە دا ب ره‌نگه‌کێ رێکخستی و بهێز ئێرشی هێزێن رۆسیا بکەت و ئاخا خوه یا داگیرکری رزگار بکه‌ت، لێ مخابن هه‌تا نها هێزێن ئۆکرانیایێ نه‌شیاینه ئێرشێن خوه ب سه‌رکه‌فتی ئه‌نجام بده‌ن، ئەو یەک ژی وەسا دکەت رۆسیا یا رژد بیت بەردەوامیێ بدەتە شەڕی و خوە ژ دانوستاندنان دوور بکەت).
ناڤهاتی هه‌روه‌سا راگه‌هاند ژی، کو د ڤێ قۆناغێ دا پێدڤیە ئۆکرانیا هه‌موو هێزێن خوه ژ بۆ ئێرشێن بەرفرەه ل سەر هێزێن رۆسیا به‌رهه‌ڤ بکه‌ت، ژ به‌ر کو زێده وه‌خت نه‌مایه و هه‌تا 30 یان 45 رۆژێن دی ره‌وشا سەقایێ دێ خرابتر لێ هێت و ئەو یەک د بەرژەوەندیا لەشکرێ ئۆکرانیایێ دا نینە، ژ بەر هندێ ژی گەلەک گرنگە ئۆکرانیا خوە بۆ قۆناغەکا نوو یا شەڕی بەرهەڤ بکەت و گۆت: (د ده‌ستپێکا شه‌ڕی دا من گۆتبوو شه‌ڕێ د ناڤبه‌را ئۆکرانیایێ و رۆسیا دا دێ شه‌ڕه‌کی گه‌له‌ک دژوار و خویناوی بیت، مخابن راستیا نها نیشا ددەت پێشبینیا من د جهێ خوە دا بوو، زیانێن شەڕی گه‌له‌ک زێده‌نه و هه‌تا نها ژی چو ئه‌نجامه‌ک ژ شه‌ڕی ده‌رنه‌که‌فتیه. ژ بۆ ڤێ یه‌کێ هه‌که ئۆکرانیا بشێت به‌ری زڤستانێ دەست ب قۆناغەکا نوو یا شەڕی بکەت و هندەک دەڤەرێن داگیرکری ژ دەستێ هێزێن رۆسیا رزگار بکەت ئەو یەک دێ ئەنجامێن خوە یێن باش بۆ ئۆکرانیایێ هەبیت، لێ سەرکەفتنا ئۆکرانیایێ د رەوشا نها دا گەلەک یا ب زەحمەتە).
