دڤێت ئەو شاشیێن مە د هەلبژارتنێن بۆری دا کری دوبارە نەکەین
پەرلەمانتارەکێ کورد ل پەرلەمانێ تورکیا راگەهاند، د هەلبژارتنێن هەری دووماهیێ یێن پەرلەمانێ تورکیا دا وەکو هەدەپە وان شاشیێن مەزن کرینە و دڤێت ژ بۆ هەلبژارتنێن باژێرڤانیان ئێدی ئەڤ شاشیە نەهێنە دوبارەکرن، چونکی دێ ئەنجامێن خوە یێن گەلەک خراب هەبن.
سڕی ساکیک ئەندامێ پەرلەمانێ تورکیا سەر ب پارتیا چەپ یا دیموکرات راگەهاند، مخابن د هەلبژارتنێن هەری دووماهیێ دا هەدەپێ و پارتیا چەپ یا کەسک شاشیێن مەزن کرن، ژ بەر هندێ ژی رێژەیا دەنگێن کوردان ل گەلەک باژێران کێمتر لێ هاتن، نها بەرهەڤی بۆ هەلبژارتنێن باژێرڤانیان ل تورکیا و باکورێ کوردستانێ دهێنە کرن، دڤێت ڤێجارێ کورد شاشیێن بۆری دوبارە نەکەن و گۆت: (نابیت پارتیا چەپ یا کەسک ژ بۆ هێزەکا دی یا سیاسی کار بکەت یان ژی ل هندەک باژێران دەنگێ خوە بدەتە پارتەکا دی، ئەو یەک ب چو رەنگەکێ د بەرژەوەندیا کوردان دا نینە، دڤێت کوردان ل هەموو باژێرێن تورکیا و باکورێ کوردستانێ نوونەرێن خوە هەبن، دڤێت ڤێجارێ ل سەر ستراتیژیەکا جودا کار بهێتە کرن، چونکی هەلبژارتنێن باژێرڤانیان گەلەک گرنگن و دڤێت کورد بۆ خوە کار بکەن، نابیت ژ بەر هندەک ناکۆکیێن سیاسی کورد ل هندەک باژێرێن مەزن یێن تورکیا دەنگێ خوە بدەنە نوونەرێن پارتیێن دی، ئەو یەک شاشیەکا مەزنە و نابیت ئەم جارەکا دی هەمان شاشیێ دوبارە بکەین).
ناڤهاتی ئەو یەک ژی دیار کر، دڤێت ئەو باژێرڤانیان بەری نها د دەستێ کوردان دا بوون جارەکا دی بکەڤنە دەستێ کوردان، نابیت رێ بدەین باژێرێن کوردان ب رێیا قەیومان بهێنە برێڤەبرن، ژ بۆ هەلبژارتنێن ڤێجارێ دڤێت پارتیا چەپ یا کەسک و هێزێن دی یێن کوردی پێکڤە کار بکەن، ب جهێ هندێ پشتەڤانی ل هندەک هێزێن دی یێن سیاسی ل باژێرێن مەزن یێن تورکیا بهێتە کرن، بلا کورد بخوە ل سەر بنەمایێ بەرژەوەندیێن هەڤپشک کار بکەن، وی دەمی دێ کورد شێن سەرکەفتنەکا مەزن تۆمار کەن، پێدڤیا هەموو کوردان ل تورکیا ب سەرکەفتنەکا مەزن د هەلبژارتنێن ڤێجارێ یێن باژێرڤانیان دا هەیە، ژ بەر هندێ ژی دڤیت هەر زوو هەمی سازی و دەزگەهێن سەر ب هەدەپێ و پارتیا کەسک و پارتیێن دی بەرهەڤیێن خوە بکەن.
پەرلەمانتارێ کورد د دووماهیا ئاخڤتنا خوە دا ئەو یەک ژی نەڤەشارت، نابیت وەکو هەلبژارتنێن بۆری کورد کار بۆ هندەک هێزێن دی بکەن، ژ بەر کو وێ سیاسەتێ زیانەکا خوە یا مەزن بۆ هەموو کوردان هەبوو، دڤێت ئەم وانان ژ شاشیێن بەرێ وەربگرین، ژ بەر هندێ ژی دڤێت ئەم ب رەنگەکێ گەلەک جودا خوە بۆ هەلبژارتنێن سالا بهێت یێن باژێرڤانیان ل تورکیا و باکورێ کوردستانێ بەرهەڤ بکەین.
