دڤێت ب بەردەوامی مووچەیێن فەرمانبەرێن هەرێما كوردستانێ بهێنە دان
وەزارەتا دەرڤە یا ئەمریكا راگەهاند: وەزیرێ دەرڤەیێ ئەمریكا ل سەر بابەتێ پێدانا مووچەیێ فەرمانبەرێن هەرێما كوردستانێ و هنارتنا پەترۆلا هەرێما كوردستانێ و مەترسییا هەژموونا گرۆپێن چەكدار ل سەر سەروەرییا ئیراقێ گەنگەشە ل گەل محەمەد شیاع سۆدانی كریە.
دوهی چارشەمبی 23/7/2025، وەزارەتا دەرڤەیا ئەمریكا د بەیاننامەیەكێدا راگەهاند، ماركۆ روبیۆ، وەزیرێ دەرڤەیێ ئەمریكا د پەیوەندییەكا تەلەفۆنیدا ل گەل محەمەد شیاع سۆدانی، سەرۆك وەزیرێن ئیراقێ گەنگەشە ل سەر سێ پرسێن گرنگ كر، ژ وان ژی مەزاختنا مووچەیێ فەرمانبەرێن هەرێما كوردستانێ و دەستپێكرنا هنارتنا پەترۆلێ ب رێكا بۆرییا ئیراق – توركیا و كێمكرنا كاریگەرییا هەژموونا ئیرانێ ل سەر ئیراقێ.
ماركۆ روبیۆ، دوپاتكر كر كو دڤێت لێپرسین ل وان هێرشكەران بهێتە كرن كو دەست هەبوو د هێرشێن ڤێ دوماهیێ ل سەر ژێرخانەیا وزەیا ئیراقێ و گوتە سۆدانی: دڤێت پێرابوونێن توند وەربگری بۆ رێگریێ ل دوبارە نەبوونا هێرشێن دی ل پاشەڕۆژێ.
هەروەسا باس ل گرنگییا مەزاختنا مووچەیێ فەرمانبەرێن هەرێما كوردستانێ ب بەردەوامی و هنارتنا پەترۆلا هەرێمێ ب رێكا بۆرییا ئیراق- توركیا.
روبیۆی جدی بوونا دلگرانییا وەلاتێ خوە ل دۆر دەربازكرنا پڕۆژە قانوونا گرێدای ب حەشدا شەعبیڤە گەهاندە سۆدانی. هەر د وێ پەیوەندییا تەلەفۆنیدا ب سەرۆك وەزیرێن ئیراقێ راگەهاند كو دەربازكرنا وێ پڕۆژە قانوونا گرێدای حەشدا شەعبی كو نوكە ل جڤاتا نوونەرێن ئیراقێیە، دێ بیتە ئەگەرێ زێدەبوونا هەژموونا ئیرانێ و گرۆپێن چەكدار ل سەر سەروەرییا ئیراقێ.
ئەو پەیوەندییا تەلەفۆنی د دەمەكی دایە تنێ د ڤێ مەهێدا گرۆپێن میلیشیێن چەكدار یێن ئیراقێ یێن ژ دەرڤەی قانوونێ 19 هێرش ب 58 درۆنێن مینڕێژكری هێرش كریە سەر زەڤیێن پەترۆلی یێن هەرێما كوردستانێ.
هەر ل دۆر هێرشێن سەر زەڤیێن پەترۆلی یێن هەرێما كوردستانێ، تامی برووس، پەیڤدارا وەزارەتا دەرڤەیا ئەمریكا گوت» ب توندی هێرشێن سەر زەڤیێن پەترۆلی پرەتەستۆ دكەین، چونكە ئارامییا ئیراقێ و پاشەڕۆژا وێ تووشی مەترسیێ دكەن».
