دڤێت ب هەموو شیانێن خوە هاریکاریا ئۆکرانیایێ بکەین
وەزارەتا بەرگریێ یا فرەنسا دیار کر، رۆسیا ب چەکێ گران ئێرشی ئۆکرانیایێ دکەت و ل هەمبەر دا دڤێت هەموو وەلاتێن رۆژئاڤایی ب تایبەتی ژی وەلاتێن ئەندامێن ناتۆ هاریکاریا ئۆکرانیایێ بکەن و رێ نەدەت رۆسیا د شەڕی دا سەرکەڤیت، چونکی سەرکەفتنا رۆسیا دێ بیتە ئەگەرێ مەترسیەکا گەلەک مەزن ل سەر هەموو وەلاتێن ئۆرۆپا و دڤێت رێگری ل رۆسیا بهێتە کرن.
وەزارەتا بەرگریێ یا فرەنسا ئەو یەک ژی دیار کریە وان مۆشەکێن دوورهاڤێژ داینە ئۆکرانیایێ و نها لەشکرێ ئۆکرانیا دشێن وان مۆشەکان ل دژی لەشکرێ رۆسیا بکار بینن.
ئەو یەک د دەمەکێ دایە کو هەفتیا بۆری هندەک ژ بەرپرسێن ئێکەتیا ئۆرۆپا ژی دیار کربوون هەکە رۆسیا د شەڕێ ل ئۆکرانیایێ دا سەرکەڤیت دێ ئێرشی چەندین وەلاتێن ئێکەتیا ئۆرۆپا کەت و ژ بۆ ڤێ یەکێ ژی گرنگە هەموو وەلاتێن ئێکەتیا ئۆرۆپا هاریکاریا ئۆکرانیایێ بکەن و نەهێلن رۆسیا بگەهیتە ئارمانجێن خوە یێن ل ئۆکرانیایێ.
