دڤێت تورکیا سیاسەتا خوە ل هەمبەر کوردان بگوهۆڕیت
پەیڤدارا دەم پارتی راگەهاند ژ ئالیەکێ بەرپرسێن تورکیا بەحسێ ئاشتیێ دکەن و ل ئالیێ دی رۆژانە سیاسەتمەدار و ئەندامێن پارتا وان دەستەسەر دکەن ئەو یەک ناهێتە قەبوول کرن و دڤێت دەولەتا تورکیا سیاسەتا خوە ل هەمبەر گەلێ کورد بگوهۆڕیت.
عایشەگول دۆغان پەیڤدارا دەم پارتی راگەهاند، کو ئەڤە دەمەکە بەرپرسێن تورکیا بەحسێ ئاشتیێ دکەن، لێ ل ئالیێ دی رۆژانە ئۆپەراسیۆنێن تورکیا ل دژی سیاسەتمەدارێن کورد و ئەندامێن دەم پارتی بەردەوامن و ب تنێ دوهی نێزیکی سێسەد کەس هاتینە دەستەسەر کرن، ئەو یەک ل گەل قۆناغا نها ناگونجیت و دڤێت دەولەتا تورکیا خوە ئێکلا بکەت کا براستی وان دڤێت پرسا کوردی چارەسەر بکەن یان نە؟ هەکە مەبەستا تورکیا چارەسەری بیت وی دەمی دڤێت ئۆپەراسیۆنێن نها بهێنە راگرتن و گۆت: (د دەمەکێ دا کو بەحسێ ئاشتیێ و چارەسەرکرنا پرسا کورد ل تورکیا دهێتە کرن هەڤسەرۆکێ باژێرڤانیا وانێ ژ کاری هاتە دوورخستن، براستی ژی ئەو یەک ئاریشەیەکا گەلەک مەزنە، چاوا دبیت هوون ل رەخەکێ بەحسێ ئاشتیێ و براتیا کورد و تورکان بکەن و ل ئالیێ دی نوونەرێن گەلێ کورد دەستەسەر بکەن، ژ بەر ڤێ یەکێ ژی دڤێت دەولەتا تورکیا هەلوەستێ خوە ل هەمبەر گەلێ کورد بگوهۆڕیت، براستی ژی سیاسەتا نها یا دەولەتا تورکیا زیانێن خوە یێن گەلەک مەزن بۆ قۆناغا نها هەنە و ب دەستەسەرکرنا هەڤالێن مە ئاشتی ل تورکیا بجه ناهێت).
ناڤهاتیێ ئەو یەک ژی دیار کر، وەکو دەم پارتی وان بەری نها ژی گەلەک جاران دیار کریە، کو یا ژ دەستێ وان بهێت دێ بۆ ئاشتیێ و چارەسەرکرنا پرسا کوردی کەن، لێ دڤێت ل هەمبەر نیەتا باش یا گەلێ کورد دەولەتا تورکیا ژی هەست ب بەرپرسیاریا خوە بکەت و دەست ژ سیاسەتا خوە یا نها بەردەت، چاوا دبیت د دەمەکێ دا کو رۆژەڤا کوردان ئاشتی و چارەسەریە هوون د رۆژەکێ دا نێزیکی ٣٠٠ سیاسەتمەدار و ئەندامێن پارتا کوردان دەستەسەر بکەن؟ هەکە دەولەتا تورکیا ل سەر سیاسەتا خوە یا نها بەردەوام بیت بێگومان باوەریا کوردان ژی ب سۆزێن دەولەتێ ناهێت.
پەیڤدارا دەم پارتی د دووماهیا ئاخڤتنا خوە دا داخواز ژ بەرپرسێن تورکیا کر، کو دەست ژ سیاسەتا خوە یا نها بەردەن و رێزێ ل ئیرادەیا گەلێ کورد بگرن، چونکی ئەردۆغان و هەڤالێن وی بخوە ژی دزانن هەتا پرسا کورد ل تورکیا نەهێتە چارەسەرکرن دێ رەوشا نها یا ئالۆز بەردەوام بیت، نها زەمینەیەکا گونجای هاتیە پێش و گرنگە دەولەتا تورکیا ژی دەست ژ ئۆپەراسیۆنێن خوە ل دژی سیاسەتمەدارێن کورد بەردەت، ب گرتنا نوونەرێن گەلێ کورد رەوشا هەی دێ خرابتر لێ هێت و گۆت: (هیڤیدارین تورکیا دووماهیێ ب سیاسەتا قەیوومان بینیت و ئۆپەراسیۆنێن خوە یێن ل دژی پارتا مە ژی بدەتە راگرتن، چونکی د رەوشەکا وەسا ئالۆز دا گەلەک زەحمەتە مرۆڤ بەحسێ ئاشتیێ بکەت).
