دڤێت جڤاکێ نێڤدەولەتی پشتەڤانیێ ل داخوازیێن کوردان بکەت
بسپۆرەکێ کاروبارێن سیاسی یێ ئەمرکی دیار دکەت، وەلاتێن رۆژئاڤایی لەزێ د بابەتێ فەلەستینێ دا دکەن، چونکی گەلەک پرس هەنە دڤێت بهێنە ئێکلاکرن، یا نها وەلاتێن رۆژئاڤایی ژ بۆ فەلەستینێ دکەن دڤێت هەمان پشتەڤانی بۆ کوردان ژی هەبیت.
دێیڤید هاریس بسپۆرێ کاروبارێن سیاسی یێ ئەمریکی دیار دکەت، وەلاتێن رۆژئاڤایی سەبارەت ب پرسا فەلەستینێ گەلەک بلەزن، چونکی بابەت تنێ راگەهاندنا دەولەتا فەلەستینێ نینە، نها حەماس و هندەک گرۆپێن دی هەنە کو ب سالانە ناهێلن خەلکێ فەلەستینێ ب ئارامی بژین، دڤێت حەماس دەست ژ چەکێ خوە بەردەت و ئێدی چو ئالۆزیان بۆ خەلکێ فەلەستینێ دروست نەکەت و گۆت: (هەکە حەماس دەست ژ چەکێ خوە بەردەت و چو مەترسی ل سەر ئسرائیلێ نەمینن وی دەمی بێگومان بابەتێ فەلەستینێ دشێت ببیتە رۆژەڤا جڤاکێ نێڤدەولەتی و چارەسەریەکا گونجای ژی بۆ بهێتە دیتن، لێ مخابن هەتا نه تشتەک وەسا نینە، ژ بەر ڤێ یەکێ ژی گرنگە وەلاتێن رۆژئاڤایی ژ بۆ دەولەتا فەلەستینێ لەزێ نەکەن).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، سالا ٢٠١٧ کوردان ل هەرێما کوردستانێ ریفراندۆمەکا سەرکەفتی ئەنجام دان، پرۆسیسەکا قانوونی بوو، لێ وەلاتێن رۆژئاڤایی وی دەمی پشتەڤانی ل مافێن رەوا یێن گەلێ کورد نەکرن، ژ بەر ڤێ یەکێ ژی گرنگە نها ئەو پشتەڤانیا بۆ فەلەستینێ دهێتە کرن هەمان پشتەڤانی بۆ کوردان ژی هەبیت، چونکی پرسا کوردان ژ یا فەلەستینێ گەلەک مەزنترە.
بسپۆرێ کاروبارێن سیاسی یێ ئەمریکی ئەو یەک ژی دیار کر، کورد ئێک ژ گەلێن هەری کەڤن یێن رۆژهەلاتا ناڤین و جیهانێ نە، کوردان چو دەمەکێ مەترسی بۆ خەلکێن دی دروست نەکرینە، ل هەرێما کوردستانێ ب دەهان نەتەوە و پێکهاتەیێن جودا جودا پێکڤە دژین، کورد هەردەم رێزێ ل بیروباوەرێن جودا دگرن، ژ بەر ڤێ یەکێ ژی گرنگە وەلاتێن رۆژئاڤایی رێزێ ل داخوازیێن کوردان بگرن، نابیت ل هەمبەر فەلەستینێ سیاسەتەک هەبیت و ل هەمبەر کوردان ژی سیاسەتەکا جوداتر، ئەو یەک دێ ئەنجامێن خوە یێن خراب بۆ رۆژهەلاتا ناڤین هەبیت.
هەمان بسپۆری د دووماهیا ئاخڤتنا خوە دا ئەو یەک ژی دیار کریە، راگەهاندنا دەولەتا فەلەستینێ نابیتە ئەگەرێ چارەسەرکرنا پرسێن نها ل رۆژهەلاتا ناڤین، چونکی نها پرسا هەری مەزن یا رۆژهەلاتا ناڤین پرسا کوردی یە و دڤێت کورد ژی وەکو هەموو گەلێن دی یێن جیهانێ و رۆژهەلاتا ناڤین ببنە خوەدان دەولەت، دڤێت وەلاتێن رۆژئاڤایی یێن نها رۆژانە بەحسێ مافێن رەوا یێن خەلکێ فەلەستینێ دکەن هەمان داخوازیێ ژ بۆ کوردان ژی بکەن، چونکی رۆژانە زۆرداری ل کوردان دهێتە کرن و دڤێت کورد ژی بگەهنە مافێن خوە و دەولەتا خوە ئاڤا بکەن.
